ភ្ជាប់​ទៅ​គេហទំព័រ​ទាក់ទង

ព័ត៌មាន​​ថ្មី

ក្រុមហ៊ុន​អាមេរិកាំង​គាំទ្រ​ការចរចា​ដំឡើង​ប្រាក់​ខែ​កម្មករ


ក្រុមហ៊ុន H&M ស្ថិត​ក្នុង​ចំណោមក្រុម​ហ៊ុន​ធំៗ​មួយ​ចំនួនដែល​​បាន​សរសេ​រ​លិខិត​មួយ​ជូន​ទៅ​លោក​គាត ឈុន ​ឧបនាយករដ្ឋ​មន្ត្រី​ប្រចាំ​ការ​ដោយ​បញ្ជាក់​ថា​ ខ្លួន​នឹង​គាំទ្រ​ដល់​កម្រិត​ប្រាក់​ខែ​គោល​ថ្មី​។
ក្រុមហ៊ុន H&M ស្ថិត​ក្នុង​ចំណោមក្រុម​ហ៊ុន​ធំៗ​មួយ​ចំនួនដែល​​បាន​សរសេ​រ​លិខិត​មួយ​ជូន​ទៅ​លោក​គាត ឈុន ​ឧបនាយករដ្ឋ​មន្ត្រី​ប្រចាំ​ការ​ដោយ​បញ្ជាក់​ថា​ ខ្លួន​នឹង​គាំទ្រ​ដល់​កម្រិត​ប្រាក់​ខែ​គោល​ថ្មី​។

ក្រុមហ៊ុន​ធំៗ​ដែល​បញ្ជា​ទិញ​សម្លៀក​បំពាក់រោងចក្រកាត់​ដេរ​ពី​ប្រទេស​កម្ពុជា​មួយ​ចំនួនកំពុង​តាម​ដាន​យ៉ាង​ដិតដល់ ​លើ​ការវិវត្តន៍​នៃ​ការទាមទារ​ជាថ្មី​របស់​សហជីព​កម្មករដែល​សុំ​ឱ្យ​ដំឡើង​ប្រាក់ខែឱ្យ​ដល់​១៧៧​ដុល្លារ​ក្នុង​មួយ​ខែ ហើយ​ពួកគេ​ទទូចឱ្យ​រដ្ឋាភិបាល​កម្ពុជា​ ដោះស្រាយ​បញ្ហា​នេះ​ប្រកបដោយ​តម្លាភាព។​

​ក្រុមហ៊ុន​បញ្ជាទិញ​ដែល​មាន​ម៉ាក​ល្បីៗ​របស់​សហរដ្ឋ​អាមេរិក​ដូច​ជា​ Columbia, Gap, និង​ Levi Strauss ​បាន​ស្នើ​សុំ​ឱ្យ​រដ្ឋាភិបាល​កម្ពុជា​និង​ក្រុម​អ្នក​ផលិត​ទំនិញ​ផ្គត់​ផ្គង់​មក​ទីផ្សារ​សហរដ្ឋ​អាមេរិក​ពិនិត្យ​មើល​យន្ត​ការ​ក្នុងការ​ដំឡើង​ប្រាក់​បៀវត្សរ៍​ឱ្យ​បាន​ត្រឹម​ត្រូវ​ដល់​ក្រុម​កម្មករ​ដែល​បាន​ចេញ​មក​ធ្វើ​ការតវ៉ា​សារជាថ្មី ​កាលពី​ថ្ងៃ​ទី​១៧​ខែ​កញ្ញា​បន្ទាប់​ពី​បាន​ស្ងប់​ស្ងាត់​មួយ​រយៈក្រោយ​ពី​មាន​ការ​បង្រ្កាប​ដោយ​ហិង្សា​មក​លើ​ការ​តវ៉ា​របស់​ពួកគេ​កាលពីខែ​មករា។​

ក្រុម​ហ៊ុន ​Levi Strauss ​បាន​បញ្ជាក់​ថាកម្មករ​ដែល​ធ្វើការ​ផលិត​ផ្គត់​ផ្គង់​សម្ភារៈ​ត្រូវ​តែ​ទទួល​បាន​កម្រិត​ជីវភាព​រស់​នៅ​សមរម្យ​ក្នុង​នោះ​មាន​អាហារ​គ្រប់​គ្រាន់​ សម្លៀក​បំពាក់ ផ្ទះ​ស្នាក់​នៅ​ ការថែរក្សា​សុខភាព​និង​សេវាសង្គម​នានា។

នៅ​ក្នុង​សារអេឡិក​ត្រូនិក​ផ្ញើ​មក​វីអូអេ​សំឡេង​សហរដ្ឋ​អាមេរិក​ លោក​ស្រី​អេមប៊ឺ រេនសឹន ​អ្នក​នាំពាក្យ​ក្រុមហ៊ុន​ Levi Strauss ​បាន​បញ្ជាក់​ថា៖

«ដើម្បី​សម្រេច​បាន​នូវ​អ្វី​ដែល​បាន​លើក​ឡើង​ខាង​លើ​ យើង​សូម​លើក​ទឹក​ចិត្ត​រដ្ឋាភិបាល​ឱ្យ​បង្កើត​ដំណើរការ​ប្រកប​ដោយ​តម្លា​ភាព​និង​មាន​ការ​ចូលរួម​គ្រប់​ភាគី​ដើម្បី​រៀបចំ​ប្រាក់​បៀវត្សរ៍​អប្បបរមា​ឱ្យ​បាន​ជាប្រចាំ​ដើម្បី​ធានា​ថា​សេចក្តី ​ត្រូវ​ការ​របស់​កម្មករ​អាច​សម្រេច​បាន​នៅ​ក្នុង​ស្ថានភាព​សេដ្ឋកិច្ច​កំពុង​រីក​ចម្រើន​ដែល​យើង​បាន​បញ្ជា​ទិញ​ទំនិញ»។​

តំណាង​សហជីព​ តំណាង​ថៅកែ​រោងចក្រ​ និង​រដ្ឋាភិបាល​កម្ពុជា​បាន​ជួប​ពិភាក្សា​សារជាថ្មី​កាលពីថ្ងៃ​សុក្រ​ទី​២៦​ខែ​កញ្ញា​ប៉ុន្តែ​មិន​ឈាន​ដល់​កិច្ច​ព្រម​ព្រៀង​អ្វី​ទេ​ដោយ​តំណាង​ថៅកែ​រោងចក្រ​លើក​ឡើង​ថា​ខ្លួន​អាច​ដំឡើង​ប្រាក់​ខែ​បាន​ត្រឹម​១១០​ដុល្លារ​តែប៉ុណ្ណោះ​ក្នុង​ខណៈ​ពេល​ដែល​ក្រុម​សហជីព​បន្តទាមទារ​ចំនួន​១៧៧​ដុល្លារ។

លោកស្រី​អេមប៊ឺ រេនសឹន​បន្ត​ថា​ក្រុម​ហ៊ុន​រង់ចាំ​តែអនុវត្ត​តាម​តារាង​ប្រាក់​ខែ​ថ្មី៖

«នៅ​ពេល​ដែល​ប្រាក់​ខែ​គោល​ថ្មី​ត្រូវ​បាន​កំណត់​ក្នុង​ប្រទេស​កម្ពុជា​ យើងនឹង​ធានា​ថា​អ្នក​ផ្គត់​ផ្គង់​សម្លៀក​បំពាក់​របស់​យើង​នឹង​ផ្តល់​ឱ្យ​កម្មករ​នូវ​ប្រាក់​ខែ​ថ្មី​ក៏ដូច​ជា​ប្រាក់​ធ្វើ​ការ​បន្ថែម​ម៉ោង​និង​ប្រាក់​បំណាច់​នានា»។​

ក្រុម​ហ៊ុន​ Gap​ បាន​បញ្ជាក់​ពីការ​ចង់​ឃើញ​មាន​ការ​ផ្លាស់​ប្តូរ​ប្រក​ប​ដោយ​វិជ្ជមាន​នៅ ក្នុង​វិស័យ​ឧស្សាហកម្ម​នៅ​កម្ពុជានិង​ទទូច​ឱ្យ​រដ្ឋាភិបាល​កម្ពុជាបង្កើត​ឡើង​នូវ​យន្តការ​ពិនិត្យ​មើល​ប្រាក់​បៀវត្សរ៍​ជាប្រចាំ​ស្រប​តាម​និយាម​អន្តរជាតិ។

លោក​ស្រី​ ឡូរ៉ា វីលគីនសុន ​មន្ត្រី​ព័ត៌មាន​បាន​បញ្ជាក់​ប្រាប់​វីអូអេ​តាម​សារអេឡិកត្រូនិក​ថា៖

«យើង​ទទូច​ដល់​រដ្ឋាភិបាល​កម្ពុជា​ឱ្យ​ដោះស្រាយ​ការ​ទាមទារ​ប្រាក់​ខែ​របស់​កម្មករ​ក៏​ដូចជា​បង្កើត​ឡើង​នូវ​ការពិភាក្សា​ជាប្រចាំ​រវាង​កម្មករ​រោងចក្រ​ ម្ចាស់​រោងចក្រ​និង​រដ្ឋាភិបាល​កម្ពុជា​ដោះស្រាយ​ជម្លោះ​ប្រាក់ខែ​នេះ​ក្នុង​ពេល​អនាគត»។​

​ក្រុម​ហ៊ុន Columbia ​បាន​បញ្ជាក់​ប្រាប់​វីអូអេ​តាម​សារអេឡិកត្រូនិក​ថា​ក្រុម​ហ៊ុន​នេះ​នៅ​មិន​ទាន់​បាន​ទទួល​សំណូម​ពរ​ណា​មួយ​ពី​សហជីព​កម្ពុជា​ឱ្យ​ធ្វើ​អន្តរាគមន៍​ទាក់​ទង​នឹង​ការសុំ​ដំឡើង​ប្រាក់​ឈ្នួល​អប្បបរមា​នេះ​ទេ​ប៉ុន្តែ​បាន​បញ្ជាក់​ថា​ចាប់​តាំង​ពី​បាន​ផ្ញើ​លិខិត​រួម​គ្នា​ទៅ​រដ្ឋាភិបាល​កម្ពុជា​កាលពី​ខែ​មករា​ឆ្នាំ​២០១៤​គឺ​ក្រុម​ហ៊ុន​បាន​សាកសួរ​ទៅ​ក្រុម​ហ៊ុន​ផ្គត់​ផ្គង់សម្លៀក​បំពាក់​របស់​ខ្លួនទាំងបួន​តាម​រយៈ​លិខិតចំនួន​ពី​រ​ដង​កាលពី​ខែ​មេសា​និង​ខែ​ឧសភា​ដោយ​ផ្ទៀងផ្ទាត់​លើ​ការធានាសិទ្ធិ​របស់​សហជីព​និង​ផ្តល់​ប្រាក់​បៀវត្សរ៍​តាម​ច្បាប់​កម្ពុជា​កំណត់។

លោក​រ៉ុន ផាហាម នាយក​ខាងផ្នែក​ទំនាក់​ទំនង​នឹង​សារព័ត៌មាន​របស់​ក្រុមហ៊ុន​បាន​បន្ថែម​ថា៖

«យើង​បន្ត​តាម​ដាន​ដោយ​យក​ចិត្ត​ទុកដាក់​លើ​ស្ថានការណ៍​និង​ធ្វើ​ការ​សហការ​យ៉ាង​ជិតស្និទ​ជាមួយ​នឹង​ភាគី​ពាក់​ព័ន្ធ​ដើម្បី​ឱ្យ​មាន​ការរីកចម្រើន​ជានិច្ច​លើ​បញ្ហា​ដ៏មាន​សារៈ​សំខាន់​នេះ»។​

ដោយ​ឡែកក្រុមហ៊ុន​អាឌីដាស​ដែល​មាន​មូលដ្ឋាន​នៅ​ប្រទេស​អាល្លឺម៉ង់​និង​បញ្ជា​ទិញ​ទំនិញ​ពី​ប្រទេស​កម្ពុជា​ដែរបាន​បញ្ជាក់​ថា ក្រុម​ហ៊ុន​ទាក់ទង​ជាប់​ជា​ប្រចាំ​ជាមួយ​នឹង​រដ្ឋាភិបាល​កម្ពុជា​ដោយ​សង្កត់​ធ្ងន់​ពី​ប្រាក់​ឈ្នួល​អប្បបរមា​ត្រូវ​តម្រូវ​តាម​សេចក្តី​ត្រូវ​ការ​របស់​កម្មករ​និង​អតិផរណា​ក្នុង​ប្រទេស។​

លោកស្រី​ស៊ីលវៀ រ៉ាក់​ខាញី ​ប្រធាន​ផ្នែក​ទំនាក់​ទំនង​នៃ​ក្រុម​ហ៊ុន​អាឌីដាស​បាន​បញ្ជាក់​តាម​សារអេឡិក​ត្រូនិក​ថា៖

«យើង​មាន​ការ​ព្រួយ​បារម្ភ​ពី​សុខមាលភាព​របស់​កម្មករ​ហើយ​បាន​តាម​ដាន​យ៉ាង​យក​ចិត្ត​ទុកដាក់​លើ​ស្ថានភាព​សេដ្ឋកិច្ច​និង​ឧស្សាហកម្ម​ក្នុង​ប្រទេស​កម្ពុជា»។

លោកស្រី​បន្ថែម​ថា​ក្រុម​ហ៊ុន​ត្រៀម​លក្ខណៈ​ផ្លាស់​ប្តូរ​តម្លៃ​តាម​ស្ថានភាពរបស់​កម្មករ​កម្ពុជា៖

«តម្លៃ​របស់​យើង​នឹង​ផ្លាស់​ប្តូរ​ទៅ​តាម​នោះ​ ទៅតាម​ពេល​វេលាកំណត់​ក្នុង​ការ​ចរចាពី​តម្លៃ​ដើម្បី​ឆ្លុះ​បញ្ចាំង​ពី​តម្លៃ​ដែល​ដៃ​គូរ​ពាណិជ្ជកម្ម​របស់​យើង​ត្រូវ​ការ​សម្រាប់​ការ​ចំណាយ»។​

យ៉ាង​ណា​ក៏ដោយ​ក្រុម​ហ៊ុន​បាន​ទទួល​ស្គាល់​ថា​ខ្លួន​មិន​អាច​កំណត់​តម្លៃ​សម្រាប់​អ្នកផ្គត់​ផ្គង់​និង​កម្មករ​របស់​គេ​បាន​ដោយ​ឯកឯង​បាន​ឡើយ។

លោកស្រី​បន្ថែម​ថា៖

«ដំណើរ​ការ​នេះ​ទាមទារ​ឱ្យ​មាន​កិច្ច​ព្រម​ព្រៀង​រវាង​រដ្ឋាភិបាល​ ម្ចាស់​រោងចក្រ​និង​សហជីព។ យើ​ង​នឹង​មិន​ធ្វើ​កិច្ច​ព្រម​ព្រៀង​ដោយឡែក​ដែល​រំលង​ពី​ដំណើរការ​កំណត់​ប្រាក់​ខែ​ដែល​រដ្ឋាភិបាល​បាន​កំណត់​ជា​អប្បបរិមាដោយ​មាន​កា​រចូលរួម​របស់​សហជីព​នោះ​ទេ»។​

តំណាង​ថៅកែ​រោងចក្រ​កាត់​ដេរ​តែងតែ​លើក​ឡើង​ពី​ការព្រួយ​បារម្ភ​ខ្លាច​មាន​រោងចក្រ​បិទទ្វារ​និង​ដើរ​ចេញ​ពី​កម្ពុជា​ បើ​ប្រាក់​ខែ​កម្មករ​ខ្ពស់​ពេក​ប៉ុន្តែ​កាលពី​ថ្ងៃ​ទី​១៨​ខែ​កញ្ញា​ក្រុម​ហ៊ុន​ធំៗ​មួយចំនួន​ដែល​មាន​ក្រុមហ៊ុន C&A, Inditex, N Brown Group plc, Tchibo, next, Primark, New Look និង H&M បាន​សរសេ​រ​លិខិត​មួយ​ជូន​ទៅ​លោក​គាត ឈុន ​ឧបនាយករដ្ឋ​មន្ត្រី​ប្រចាំ​ការ​ដោយ​បញ្ជាក់​ថា​ខ្លួន​នឹង​គាំទ្រ​ដល់​កម្រិត​ប្រាក់​ខែ​គោល​ថ្មី​ហើយ​តាម​ដាន​លើ​ការ​ដោះស្រាយ​ប្រកប​ដោយ​ដិត​ដល់​ដោយ​សារ​តែ​កម្រិត​នៃ​ការ​បញ្ជាទិញ​ពី​ប្រទេស​កម្ពុជា​គ្រោង​នឹង​កើនឡើង​តទៅទៀត។

ដោយ​ឡែក​សកម្មជន​សហជីព​សំខាន់​ៗ​នៅ សហរដ្ឋ​អាមេរិក​បាន​ផ្តល់​ការ​គាំទ្រ​ដល់​កម្មករ​កម្ពុជា។

លោក​ស្រី​ អាន់ណា ប៊ឺហ្កើ ​អតីត​អគ្គហិរញ្ញិក​នៃ​សហជីព​អន្តរជាតិ​សម្រាប់​សេវាកម្ម​និយោជិត​និង​ជា​អតីត​ប្រធាន​សហជីព​ការផ្លាស់​ប្តូរ​ដើម្បី​ជ័យ​ជំនះ​បាន​បញ្ជាក់​ថា​ការដំឡើង​ប្រាក់​ខែ​ឱ្យ​ដល់​ចំនួន​១៧៧​ដុល្លារ​នឹង​មិន​ប៉ះពាល់​ដល់​តម្លៃ​ផលិតផល​សម្លៀក​បំពាក់​ដែល​ត្រូវ​យក​មក​លក់​នៅ សហរដ្ឋ​អាមេរិក​ទេ​៖

«ខ្ញុំ​គិត​ថា​គឺ​មាន​តម្លៃ​តិច​បំផុត​លើ​ទំនិញ​របស់​ពួកគេ។ ខ្ញុំ​គិត​ថា​ផល​ដែល​បាន​មក​ពី​ការបង្កើន​ប្រាក់​ខែ​មក​លើ​អ្នក​ប្រើប្រាស់នៅ​ទូទាំង​ពិភពលោក​គឺ​សំខាន់​ណាស់បើ​យើង​ពិនិត្យ​មើល​លើ​ផល​ដែល​បាន​ពី​ការ​ដោះស្រាយ​បញ្ហា​ដើម្បី​ឱ្យ​កម្មករ​អាច​នៅ​ធ្វើ​ការ​បាន​និង​លទ្ធភាព​ដែល​កម្មករអាច​ចិញ្ចឹម​គ្រួសារ​របស់​គេ ​បញ្ជូន​កូន​ទៅ​សិក្សា ​គឺ​មាន​ផល​ធំធេង​ណាស់​លើ​សុវត្ថិភាព​ពិភពលោក​ ការអភិវឌ្ឍ​សេដ្ឋកិច្ច ​ហើយ​ខ្ញុំ​គិត​ថា​អស់​ថវិកា​អ្នក​ប្រើប្រាស់​តិចតួច​ណាស់។ ខ្ញុំ​គិត​ថា​ក្រុម​ហ៊ុន​ទាំង​នោះ​ត្រូវ​តែ​ធ្វើ​កិច្ចការ​បន្ថែម​ទៀត​ដើម្បី​អប់​រំ អ្នក​ប្រើប្រាស់​ឱ្យ​យល់​ថា​ហេតុអ្វី​បាន​ជា​សំខាន់​ចំពោះ​ពួកគេ​ក្នុងការ​មាន​ប្រាក់​ខែ​សមរម្យ ​និង​បរិយាកាស​ការងារ​សមរម្យ​នៅ​ទូទាំង​ពិភពលោក»។

ក្រុម​សហជីព​បាន​ព្រមាន​ថា​នឹង​ដើរ​ដាក់​ញត្តិ​តវ៉ា​ទៅតាម​បណ្តា​ស្ថានទូត​នានា​ដើម្បី​ឱ្យ​ដាក់​សម្ពាធ​កាន់​តែ​ខ្លាំង​ប៉ុន្តែ​ការសម្រេច​យ៉ាង​ណា​ពិត​ប្រាកដ​គឺ​រង់ចាំ​ដល់ក្រោយពី​ការ​ជួប​ប្រជុំ​ជា​ថ្មី ​នៅ​ថ្ងៃ​ទី​១០​ខែតុលា​ខាងមុខ​នេះ។

លោក​ អាត់​ ធន់​ ប្រធាន​សហជីព​ CCAWDU​ បាន​បញ្ជាក់​ថា៖

«បញ្ហា​ស្រុក​ខ្មែរ​ជា​បញ្ហា​នៅទូទាំង​ពិភពលោក​វាប៉ះពាល់​ដល់​កេរ្តិ៍​ឈ្មោះ​អ្នក​បញ្ជាទិញ​ពីស្រុក​ខ្មែរ​ដោយ​តម្លៃ​ថោក​នេះ​ធ្វើ​ឱ្យ​កម្មករ​ត្រូវ​បាន​គេសម្លាប់​កម្មករ​ត្រូវ​បាន​គេ​ចាប់​ដាក់​គុក​មាន​រងរបួស​ច្រើន​អញ្ចឹង​បញ្ហា​អស់​ទាំង​ហ្នឹង​បើ​មិន​មាន​ការ​ដោះស្រាយ​ទេ​អ្នក​បញ្ជាទិញ​គឺ​មាន​ឱន​ភាព​នៃ​ការ​បញ្ជា​ទិញ​ឥវ៉ាន់​គឺ​ដាច់​ខាត​ត្រូវតែ​ដោះស្រាយ​បញ្ហា​ហ្នឹង​អញ្ចឹង​នៅ​ពេល​នេះ​យើង​កំពុងតែ​ជំរុញ​បន្ថែម​ទៀត​ទៅតាម​ឆាក​អន្តរជាតិ​ទៅ​តាម​រយៈទូត​ទៅតាម​រយៈ​មិត្តភ័ក្រ​របស់​យើង​ដើម្បី​ឱ្យ​មាន​ការ​ដំឡើង​ប្រាក់​សមរម្យ​នៅ​កម្ពុជា​របស់​យើង»។

ឧស្សាហកម្ម​រោងចក្រ​កាត់​ដេរនៅ​ក្នុង​ប្រទេស​កម្ពុជា​ផ្តល់​ការងារ​ដល់​ពលរដ្ឋកម្ពុជា​ចំនួន​៦សែន​នាក់​ដែល​ភាគច្រើន​ជាស្រ្តី​មក​ពី​បណ្តា​ខេត្ត​នានា។

នេះ​គឺ​ជា​ការ​តវ៉ា​ជាថ្មី​ទៀត​បន្ទាប់​ពី​មាន​ភាពស្ងប់​ស្ងាត់​បន្តិច​ក្រោយ​ពី ​មាន​ការបង្រ្កាប​ដោយ​ហិង្សា​ដោយ​កងកម្លាំង​មាន​សមត្ថកិច្ច​របស់​រដ្ឋាភិបាល​ដែល​បាន​បណ្តាល​ឱ្យ​កម្មករ​យ៉ាង​តិចចំនួន​៥​នាក់​បាន​ស្លាប់​បាតបង់​ជីវិត​និង​ រង​របួស​ជាង​៤០​នាក់​ក្នុង​ពេល​ដែល​ពួកគេ​ទាមទារ​ឱ្យ​ដំឡើង​ប្រាក់​ខែ​គោល​ឱ្យ​ដល់​១៦០​ដុល្លារ​កាលពី​ចុងឆ្នាំ​២០១៣​និងដើមឆ្នាំ២០១៤។

ប្រទេស​កម្ពុជា​ពឹង​ផ្អែក​យ៉ាង​ខ្លាំង​លើ​ឧស្សាហកម្ម​កាត់​ដេរ​សម្លៀក​បំពាក់​ដែល​មាន​ទំហំ​នាំ​ចេញ​ប្រមាណ​ជាង​បួន​ពាន់​បួន​រយលាន​ដុល្លារ​ក្នុងឆ្នាំ​២០១៣។ ទីផ្សារ​សំខាន​របស់​កម្ពុជា​មាន​នៅ​សហរដ្ឋ​អាមេរិក​និង​សហគមន៍​អឺរ៉ុប៕

XS
SM
MD
LG