ឧទ្ធម្ភាគចក្រកងទ័ពជើងទឹកអាមេរិកបានបាញ់ពន្លិចនាវាតូចៗ ៣ គ្រឿងក្នុងចំណោម ៤ គ្រឿង ដែលក្រុមឧទ្ទាមហ៊ូធី (Houthi) នៃប្រទេសយេមែន បានប្រើដើម្បីវាយប្រហារលើកប៉ាល់ពាណិជ្ជកម្មមួយគ្រឿងនៅសមុទ្រក្រហមកាលពីថ្ងៃអាទិត្យ។ នេះបើតាមការបញ្ជាក់របស់បញ្ជាការដ្ឋានសហរដ្ឋអាមេរិកទទួលបន្ទុកកិច្ចការតំបន់មជ្ឈិមបូព៌ានិងអាស៊ីកណ្ដាល (CENTCOM) នៅលើបណ្ដាញសង្គមអនឡាញ X។
ឧទ្ធម្ភាគចក្រមកពីនាវាដឹកយន្តហោះចម្បាំង USS Eisenhower និងនាវាពិឃាត USS Gravely របស់សហរដ្ឋអាមេរិក ដែលបានឆ្លើយតបចំពោះការដង្ហោយរកជំនួយពីនាវា Maersk Hangzhou បានបាញ់តបតទៅវិញលើនាវារបស់ក្រុមហ៊ូធីនិងបានធ្វើឱ្យនាវា៣ គ្រឿងក្នុងចំណោមនោះលិច។ គេមិនឃើញមានអ្នកនៅរស់ពីនាវាដែលលិចទាំង៣គ្រឿងនេះទេ ហើយនាវាមួយគ្រឿងទៀតបានបើកគេចខ្លួនពីតំបន់នោះ។
នេះគឺជាលើកទីពីរនៅក្នុងរយៈពេលតិចជាង ២៤ ម៉ោងដែលក្រុមហ៊ូធីដែលគាំទ្រដោយអ៊ីរ៉ង់បានវាយប្រហារលើកប៉ាល់ដឹកកុងតឺន័រ Maersk Hangzhou ដែលមានដាក់ទង់ជាតិសិង្ហបុរី។
កាលពីថ្ងៃអាទិត្យ យោធាសហរដ្ឋអាមេរិកបានបាញ់ទម្លាក់គ្រប់ផ្លោងមីស៊ីលបាញ់នាវា ២ គ្រាប់ដែលក្រុមឧទ្ទាមហ៊ូធីបានសំដៅវាយប្រហារលើកប៉ាល់ដឹកកុងតឺន័រនេះនៅសមុទ្រក្រហម។
បញ្ជាការដ្ឋានសហរដ្ឋអាមេរិកទទួលបន្ទុកកិច្ចការតំបន់មជ្ឈិមបូព៌ានិងអាស៊ីកណ្ដាលបានបញ្ជាក់ថា៖ «នេះគឺជាការវាយប្រហារខុសច្បាប់លើកទី ២៣ របស់ក្រុមហ៊ូធីលើការដឹកជញ្ជូនអន្តរជាតិតាមផ្លូវសមុទ្រតាំងពីថ្ងៃទី១៩ ខែវិច្ឆិកាឆ្នាំមុនមក»។
ការវាយប្រហារកើនឡើងនៅសមុទ្រក្រហមនេះបានបង្កឱ្យក្រុមហ៊ុនដឹកជញ្ជូនជាច្រើនបង្វែរផ្លូវធ្វើដំណើររបស់កប៉ាល់របស់ខ្លួនកាលពីដើមខែធ្នូកន្លងទៅនេះ ដោយបញ្ចៀសសមុទ្រក្រហមរហូតទាល់តែមានការជូនដំណឹងបន្ថែម។
ការវាយប្រហាររបស់ក្រុមឧទ្ទាមហ៊ូធីនេះ ដែលជាការបង្ហាញការគាំទ្រលើក្រុមសកម្មប្រយុទ្ធហាម៉ាស់ (Hamas) ដែលកំពុងប្រយុទ្ធជាមួយអ៊ីស្រាអែលនៅក្នុងតំបន់ហ្កាហ្សា បានសំដៅលើផ្លូវដឹកជញ្ជូនទំនិញជាពិសេសប្រេងឥន្ធនៈពីទិសខាងកើតទៅទិសខាងលិច។ ការដឹកជញ្ជូនទំនិញនេះបានប្រើព្រែកជីកស៊ុយអេដើម្បីចំណេញពេលវេលានិងការចំណាយដែលធ្វើដំណើរព័ទ្ធជុំវិញទ្វីបអាហ្វ្រិក។
សហរដ្ឋអាមេរិក ចក្រភពអង់គ្លេស និងប្រទេសផ្សេងទៀតរួមទាំងបណ្ដាប្រទេសជាសមាជិកសហភាពអឺរ៉ុបផងដែរ បានចាត់ទុកក្រុមហាម៉ាស់ថាជាក្រុមភេរវកម្មបន្ទាប់ពីក្រុមនេះបានធ្វើការវាយប្រហារកាលពីថ្ងៃទី៧ ខែតុលាឆ្នាំមុនលើអ៊ីស្រាអែលដោយសម្លាប់ជនស៊ីវិលប្រហែល១.២០០ នាក់និងចាប់មនុស្សប្រហែល ២៤០ នាក់ធ្វើជាចំណាប់ខ្មាំង៕
ព័ត៌មានខ្លះសម្រាប់សេចក្ដីរាយការណ៍នេះត្រូវបានដកស្រង់មកពីទីភ្នាក់ងារសារព័ត៌មាន AP ទីភ្នាក់ងារសារព័ត៌មាន AFP និងទីភ្នាក់ងារសារព័ត៌មាន Reuters។
