អ្នកចរចាជាន់ខ្ពស់របស់សហរដ្ឋអាមេរិកអំពីវិបត្តិរវាងក្រុមបស្ចិមប្រទេស និងប្រទេសរុស្ស៊ី ទាក់ទិននឹងការបង្កើនកម្លាំងកងទ័ពរបស់រុស្ស៊ីនៅតាមបណ្តោយព្រំដែនរុស្ស៊ីជាប់ប្រទេសអ៊ុយក្រែន បានជូនដំណឹងដល់ប្រទេសសម្ព័ន្ធមិត្តនានានៃអង្គការអូតង់ (NATO) កាលពីថ្ងៃអង្គារម្សិលមិញ បន្ទាប់ពីបានជួបពិភាក្សាជាមួយមន្ត្រីរុស្ស៊ីដោយមិនមានដំណោះស្រាយអ្វីរួចមក។ នេះ បើយោងតាមសេចក្ដីរាយការណ៍របស់ទីភ្នាក់ងារព័ត៌មាន AFP។
អនុរដ្ឋមន្ត្រីការបរទេសអាមេរិកអ្នកស្រី Wendy Sherman បានធ្វើដំណើរពីទីក្រុងហ្សឺណែវ ប្រទេសស្វីស ទៅកាន់ទីស្នាក់ការកណ្ដាលរបស់អង្គការអូតង់នៅក្នុងទីក្រុងប្រ៊ុចសែល ប្រទេសប៊ែលហ្ស៊ិក។ កាលពីថ្ងៃចន្ទ អ្នកស្រីបានជួបពិភាក្សាជាមួយអនុរដ្ឋមន្ត្រីការបរទេសរុស្ស៊ីលោក Sergei Ryabkov។
មន្ត្រីអឺរ៉ុបមួយចំនួនបានត្អូញត្អែរថា រដ្ឋាភិបាលក្រុងវ៉ាស៊ីនតោន កំពុងដឹកមុខនៅក្នុងការចរចាជាមួយរដ្ឋាភិបាលក្រុងមូស្គូ។ ពួកគេបារម្ភថា ពួកគេត្រូវបានផាត់ចេញពីដំណើរការនៃការស្វែងរកដំណោះស្រាយចំពោះភាពតានតឹងនៅព្រំដែនអ៊ុយក្រែន និងការបង្ការមិនឲ្យមានការប្រឈមមុខដាក់គ្នា។
ប៉ុន្តែ អ្នកស្រី Sherman បានបញ្ជាក់ថា សម្ព័ន្ធមិត្តអឺរ៉ុប នឹងត្រូវបានរាយការណ៍ប្រាប់គ្រប់ដំណាក់កាលទាំងអស់។ អ្នកស្រីថ្លែងដូច្នេះ បន្ទាប់ពីអ្នកស្រីបានជួបជាមួយអគ្គលេខាធិការអង្គការអូតង់លោក Jens Stoltenberg និងឯកអគ្គរដ្ឋទូតនានារបស់បណ្ដាប្រទេសជាសមាជិកអង្គការអូតង់។
អ្នកស្រីបានបញ្ជាក់នៅលើ Twitter ថា៖ «សហរដ្ឋអាមេរិកតាំងចិត្តធ្វើការគ្រប់ជំហានទាំងអស់ជាមួយសម្ព័ន្ធមិត្តនិងដៃគូរបស់ខ្លួន ដើម្បីជំរុញឲ្យមានភាពធូរស្រាល និងឆ្លើយតបទៅនឹងវិបត្តិសន្តិសុខដែលបង្កឡើងដោយរុស្ស៊ី»។
នៅក្នុងជំនួបជាមួយលោក Stoltenberg អ្នកស្រី Sherman «បានគូសបញ្ជាក់អំពីវិធីសាស្ត្ររួបរួមគ្នារបស់អង្គការអូតង់នៅក្នុងការតតាំងជាមួយនឹងប្រទេសរុស្ស៊ី ដោយធ្វើឲ្យមានតុល្យភាពរវាងការកម្លាសត្រូវនិងការចរចា និងបានសង្កត់ធ្ងន់អំពីការគាំទ្រមិនងាករេចំពោះប្រទេសអ៊ុយក្រែន»។
ទន្ទឹមនឹងនេះដែរ នៅក្នុងសារ Twitterបញ្ជាក់ទៅកាន់អនុរដ្ឋមន្ត្រីការបរទេសអ៊ុយក្រែនអ្នកស្រី Emine Dzhaparova អ្នកស្រី Sherman បានធានាដល់រដ្ឋាភិបាលអ៊ុយក្រែនថា ក្រុមសម្ព័ន្ធមិត្ត «នឹងមិនធ្វើសេចក្តីសម្រេចណាមួយស្តីពីអ៊ុយក្រែន ដោយគ្មានប្រទេសអ៊ុយក្រែនចូលរួមនោះឡើយ»។
បន្ទាប់ពីការចរចាអស់រយៈពេលជាង ៧ ម៉ោងនៅក្នុងទីក្រុងហ្សឺណែវ ប្រទេសស្វីស កាលពីថ្ងៃចន្ទមក រុស្ស៊ី និងសហរដ្ឋអាមេរិក បានសន្យាបន្តការចរចាគ្នាតទៅមុខទៀត ទោះបីជាមិនមានសញ្ញាដំណោះស្រាយណាមួយក៏ដោយ៕
