ការជជែកដេញដោលលើកចុងក្រោយរវាងលោកប្រធានាធិបតី Donald Trump ខាងគណបក្សសាធារណរដ្ឋ និងបេក្ខជនប្រធានាធិបតីខាងគណបក្សប្រជាធិបតេយ្យលោក Joe Biden គ្រោងធ្វើឡើងនៅថ្ងៃព្រហស្បតិ៍ខាងមុខ ដោយមានវិន័យថ្មីដើម្បីរារាំងបេក្ខជនមិនឲ្យកាត់សម្ដីគ្នា។
លោកប្រធានាធិបតី Trump សម្ដែងការមិនពេញចិត្តចំពោះការរៀបចំបែបនេះ ដោយបានប្រាប់អ្នកសារព័ត៌មានកាលពីថ្ងៃច័ន្ទថា ទោះបីជាលោកគិតថា «វាអយុត្តិធម៌ខ្លាំងក៏ដោយ» ក៏លោកនឹងចូលរួមនៅក្នុងការជជែកដេញដោលនេះ ដែលធ្វើឡើងនៅក្នុងទីក្រុង Nashville រដ្ឋ Tennessee។
លោក Trump បាននិយាយថា៖ «ខ្ញុំនឹងចូលរួម ប៉ុន្តែវាអយុត្តិធម៌ណាស់ដែលពួកគេប្ដូរប្រធានបទ ហើយវាអយុត្តិធម៌ណាស់ដែលជាថ្មីម្ដងទៀត យើងមានអ្នកសម្របសម្រួលដែលលម្អៀងទាំងស្រុង»។
អ្នកស្រី Kristen Welker អ្នកសារព័ត៌មានរបស់ទូរទស្សន៍ NBC ប្រចាំសេតវិមាន គឺជាអ្នកសម្របសម្រួលការជជែកដេញដោលនេះ និងបានត្រៀមសំណួរដើម្បីសួរលោក Trump និងលោក Biden អំពីការប្រយុទ្ធប្រឆាំងនឹងជំងឺកូវីដ១៩ បញ្ហារបស់ក្រុមគ្រួសារអាមេរិកាំង បញ្ហាជាតិសាសន៍នៅសហរដ្ឋអាមេរិក ការប្រែប្រួលអាកាសធាតុ បញ្ហាសន្តិសុខជាតិ និងភាពជាអ្នកដឹកនាំ។
យុទ្ធនាការឃោសនាបោះឆ្នោតរបស់លោក Trump បានឲ្យដឹងកាលពីថ្ងៃចន្ទថា ការជជែកដេញដោលគួរផ្តោតខ្លាំងលើបញ្ហាអន្តរជាតិ។
ចំណែកឯយុទ្ធនាការរបស់លោក Biden វិញថា លោក Trump ចង់គេចវេសពីការពិភាក្សាលើរបៀបដែលរដ្ឋបាលរបស់លោកដោះស្រាយវិបត្តិជំងឺកូវីដ១៩ ហើយថា ភាគីទាំងពីរបានយល់ស្របរួចទៅហើយថាឲ្យអ្នកសម្របសម្រួលជាអ្នកជ្រើសរើសប្រធានបទសម្រាប់ការជជែកដេញដោលនេះ៕
