រដ្ឋសភាសហរដ្ឋអាមេរិកដែលដឹកនាំដោយគណបក្សប្រជាធិបតេយ្យ និងព្រឹទ្ធសភាដែលដឹកនាំដោយគណបក្សសាធារណរដ្ឋ រំពឹងថា ក្នុងសប្តាហ៍នេះនឹងធ្វើការបោះឆ្នោតសំខាន់ៗទាក់ទងនឹងសេចក្តីព្រាងច្បាប់កំណែទម្រង់ស្ថាប័នប៉ូលិសជាតិ ដោយទាំងព្រឹទ្ធសភានិងរដ្ឋសភាបានព្រមព្រៀងចំពោះសេចក្តីព្រាងច្បាប់មួយចំនួនប៉ុន្តែមិនទាន់ប្រាកដថាត្រូវកែប្រែចំណុចណាខ្លះនោះទេ។
ការជំរុញឲ្យមានការតាក់តែងច្បាប់ថ្មីនេះ កើតមានឡើងក្រោយពីមានការស្លាប់ក្រោមសមត្ថកិច្ចប៉ូលិសរបស់ពលរដ្ឋអាមេរិកដើមកំណើតអាហ្វ្រិកលោក George Floyd ដែលព្រឹត្តិការណ៍នេះបានជំរុញឲ្យមានការតវ៉ានៅទូទាំងប្រទេសនិងពិភពលោកប្រឆាំងនឹងការរើសអើងជាតិសាសន៍និងការប្រើកម្លាំងរបស់កងកម្លាំងសមត្ថកិច្ចអនុវត្តច្បាប់។
ចំណុចខ្វែងគំនិតគ្នាសំខាន់រវាងសេចក្តីព្រាងច្បាប់របស់គណបក្សប្រជាធិបតេយ្យនិងគណបក្សសាធារណរដ្ឋទាក់ទងនឹងអភ័យឯកសិទ្ធិរបស់មន្ត្រីប៉ូលិសឬហៅជាភាសាអង់គ្លេសថា qualified immunity ដែលនេះធ្វើឲ្យពលរដ្ឋមានការលំបាកក្នុងការប្តឹងមន្ត្រីប៉ូលិសនៅពេលដែលពួកគេគិតថាសិទ្ធិពលរដ្ឋរបស់ពួកគេត្រូវបានប៉ូលិសរំលោភបំពាន។
ក្រុមប្រជាធិបតេយ្យចង់ឲ្យគេលុបចោលអភ័យឯកសិទ្ធិប៉ូលិសនេះ ប៉ុន្តែក្រុមសាធារណរដ្ឋនិងលោកប្រធានាធិបតី ដូណាល់ ត្រាំ បានប្រឆាំងនឹងការលុបចោលនេះ។
ប៉ុន្តែគណបក្សទាំងពីរឯកភាពគ្នាចំពោះការប្រើកាមេរ៉ាជាប់ខ្លួនមន្ត្រីប៉ូលិសច្រើនជាងមុនការសម្លាប់ដោយចាប់យកទៅព្យួរក ដោយគ្មានការជំនំជំរះទោសជាបទឧក្រិដ្ឋសហព័ន្ធ ការបណ្តុះបណ្តាលមន្ត្រីប៉ូលិស និងការប្រមូលទិន្នន័យច្រើនជាងមុន៕
