បន្ទាប់ពីមានការតវ៉ានៅទូទាំងប្រទេសអស់រយៈពេលរាប់សប្ដាហ៍ចាប់តាំងពីការស្លាប់របស់លោក George Floyd មក លោកប្រធានាធិបតី ដូណាល់ ត្រាំ បានចុះហត្ថលេខាលើបទបញ្ជាមួយស្ដីពីកំណែទម្រង់ប៉ូលិសកាលពីថ្ងៃអង្គារ។ លោក ត្រាំ បានមានប្រសាសន៍ថា បទបញ្ជានេះនឹងជួយលើកទឹកចិត្តឲ្យប៉ូលិសប្រតិបត្តិការបានប្រសើរជាងមុន និងបង្កើតបណ្ដុំទិន្នន័យ Database មួយ ដើម្បីរក្សាទុកទិន្នន័យអំពីប៉ូលិសណា ដែលមានប្រវត្តិប្រើប្រាស់កម្លាំងជ្រុលហួសហេតុ។
ថ្លែងនៅក្នុងសួន Rose Garden នៅសេតវិមាន លោក ត្រាំ បាននិយាយសង្កត់ធ្ងន់ទៅលើតម្រូវការឲ្យមានបទដ្ឋានខ្ពស់ជាងមុននានា និងបានសម្តែងនូវការសោកស្ដាយចំពោះក្រុមគ្រួសារសពដែលកំពុងកាន់ទុក្ខ។ ក៏ប៉ុន្តែ លោក ត្រាំ ក៏បានលើកឡើងថា មន្ត្រីប៉ូលិសភាគច្រើនគឺជាមន្ត្រីរដ្ឋការដែលមិនគិតពីខ្លួនឯង និងគោរពទៅតាមច្បាប់និងសណ្ដាប់ធ្នាប់សង្គមរបស់លោក។
លោក ត្រាំ និងគណបក្សសាធារណរដ្ឋបានប្រញាប់ប្រញាល់ឆ្លើយតបទៅនឹងការតវ៉ាទ្រង់ទ្រាយធំប្រឆាំងនឹងភាពសាហាវឃោរឃៅរបស់ប៉ូលិសនិងការរើសអើងជាតិសាសន៍ ដែលបានកើតឡើងអស់រយៈពេលជាច្រើនសប្ដាហ៍មកហើយនៅទូទាំងប្រទេស។ ការតវ៉ាទាំងនេះគឺពាក់ព័ន្ធនឹងករណីស្លាប់របស់លោក Floyd និងពលរដ្ឋអាមេរិកាំងដើមកំណើតអាហ្វ្រិកដទៃទៀត។ នេះគឺជាការផ្លាស់ប្ដូរដ៏លឿនមួយសម្រាប់គណបក្សសាធារណរដ្ឋ ដែលបង្ហាញពីការឆ្លើយតបយ៉ាងឆាប់រហ័សទៅនឹងការតវ៉ានានាដែលបានផ្លាស់ប្ដូរការសន្ទនានយោបាយ និងបានដាក់សម្ពាធរដ្ឋាភិបាលក្រុងវ៉ាស៊ីនតោនឲ្យចាត់វិធានការភ្លាមៗ។
លោក ត្រាំ ក៏បានប្រឈមនឹងការរិះគន់ផងដែរ ចំពោះការមិនទទួលស្គាល់អំពីភាពលំអៀងលើជាតិសាសន៍ដែលមានលក្ខណៈជាប្រព័ន្ធ និងបានតស៊ូមតិឲ្យប៉ូលិសប្រព្រឹត្តតឹងរ៉ឹងជាងមុនទៅលើជនសង្ស័យ ដើម្បីបង្ហាញពីការគាំទ្ររបស់លោកចំពោះការអនុវត្តច្បាប់។ នៅក្នុងពិធីចុះហត្ថលេខានោះ លោក ត្រាំ បាននិយាយប្រឆាំងនឹងអ្នកដែលបានប្រព្រឹត្តអំពើហិង្សា ក្នុងអំឡុងពេលនៃការតវ៉ាដោយសន្ដិវិធី ប៉ុន្តែលោកមិនបានលើកឡើងអំពីការរើសអើងជាតិសាសន៍ទេ៕
