ភ្ជាប់​ទៅ​គេហទំព័រ​ទាក់ទង

ព័ត៌មាន​​ថ្មី

គណៈកម្មាធិការពិសេស​មួយ​របស់​ស.រ.អ ផ្តល់​ការគាំទ្រ​ចំពោះ​ការអនុម័ត​ប្រើប្រាស់​វ៉ាក់សាំង​កូវីដ១៩​ដំបូង​បង្អស់


រូបឯកសារ៖ ស្ត្រីម្នាក់ ទទួល​ការចាក់​វ៉ាក់សាំង Pfizer-BioNTech ការពារ​ជំងឺ​កូវីដ១៩ នៅ​មណ្ឌល​សុខភាព​មួយ​នៅ​ទីក្រុង Cardiff កាលពី​ថ្ងៃទី៨ ខែធ្នូ ឆ្នាំ២០២០ នៅ​ពេល​ដែល​ចក្រភព​អង់គ្លេស ចាប់ផ្តើម​កម្មវិធី​ចាក់វ៉ាក់សាំង​ធំ​បំផុត​មិន​ធ្លាប់​មាន។

ក្រោយការ​ពិភាក្សា​អស់​រយៈពេល​៩​ម៉ោង នៅថ្ងៃព្រហស្សតិ៍​ម្សិលមិញ គណៈកម្មាធិការ​ពិសេស​មួយ​នៃទីភ្នាក់ងារ​ម្ហូបអាហារ​និង​ថ្នាំពេទ្យ​របស់​សហរដ្ឋ​អាមេរិក បាន​ផ្តល់​ការគាំទ្រ​ចំពោះ​ការប្រើប្រាស់​ថ្នាំ​វ៉ាក់សាំងការពារជំងឺកូវីដ​១៩ សម្រាប់គ្រា​អាសន្ន ដែល​ផលិត​ដោយ​ក្រុមហ៊ុន​ឱសថ​របស់​សហរដ្ឋ​អាមេរិក Pfizer និង​ក្រុម​ហ៊ុន BioNTech របស់​ប្រទេស​អាល្លឺម៉ង់​។

គណៈកម្មាធិការ​ពិសេសដែល​មាន​សមាជិក​២២នាក់​របស់​ទីភ្នាក់ងារ​ម្ហូបអាហារ​និង​ថ្នាំពេទ្យ​ បាន​បោះឆ្នាត​គាំទ្រ ៤នាក់ ​បាន​បោះឆ្នោតប្រឆាំង​ និងម្នាក់​បាន​បោះ​ឆ្នោត​អនុបវាទ​លើ​បញ្ហា​នេះ។

រដ្ឋាភិបាល​សហរដ្ឋ​អាមេរិក នឹង​ចែកចាយ​ភ្លាមៗ​នូវ​វ៉ាក់សាំង​ចំនួន ៦ លាន ៤ សែន​ដូស​នៅ​ទូទាំង​សហរដ្ឋ​អាមេរិក។ បុគ្គលិកសុខា​ភិបាល​នឹង​ទទួល​បាន​អាទិភាព​មុន​គេ ​ដើម្បី​ចាក់​វ៉ាក់សាំង​នេះ។

សេចក្តី​សម្រេច​របស់​ក្រុម​ប្រឹក្សា​នៃ​ទីភ្នាក់ងារ​ម្ហូបអាហារ​និង​ថ្នាំពេទ្យ​របស់​សហរដ្ឋ​អាមេរិកនេះ បាន​ធ្វើឡើង ខណៈដែល​សហរដ្ឋអាមេរិក ជួប​ប្រទះ​នឹងការ​កើន​នូវ​ករណី​ជំងឺ​កូវីដ​១៩ ដល់​កំរិត​ខ្ពស់​ដែល​មិន​ដែល​មានពីមុន​មក។ មកទល់​នឹង​ល្ងាច​ថ្ងៃ​ព្រហស្សតិ៍នេះ សហរដ្ឋអាមេរិក មាន​ករណី​ជំងឺ​កូវីដ១៩​ ដល់ទៅ១៥​លាន​កន្លះ​ហើយ។ ចំណែក​ចំនួន​អ្នកស្លាប់វិញ​ បាន​កើនដល់លើស ២៩ម៉ឺន​នាក់ហើយ នេះបើ​តាមទិន្ន័យ​របស់​សាកល​វិទ្យាល័យ Johns Hopkins។

លោក Joe Biden ប្រធានាធិបតី​ជាប់​ឆ្នោត បាន​បញ្ជាក់​នៅ​ក្នុង​សេចក្តី​ថ្លែងការណ៍មួយថា «ប៉ុន្តែ​អនុសាសន៍​នៅ​ថ្ងៃ​នេះ ​ដោយ​គណៈកម្មាធិការ​ពិគ្រោះយោបល់​របស់​ទីភ្នាក់ងារ​ម្ហូបអាហារ​និង​ថ្នាំពេទ្យ​ដែល​អនុ​ញ្ញាតិ​ឲ្យ​ប្រើ​ក្នុង​គ្រាអាសន្ន​នូវ​ថ្នាំ​វ៉ាក់សាំង​ការពារ​ជំងឺ​កូវីដ១៩​របស់​ក្រុមហ៊ុន Pfizer និង BioNTech ជា​ពន្លឺ​ដ៏ភ្លឺ​ច្បាស់​មួយ​នៅ​ក្នុង​ពេល​វេលា​ដ៏​ខ្មៅ​ងងឹត»។

សេចក្តី​ថ្លែងការណ៍​នោះ បាន​សម្តែង​នូវ​ការដឹងគុណ​ដល់​អ្នក​វិទ្យាសាស្ត្រ​ ​និង​មនុស្ស​ផ្សេង​ទៀត ​ដែល​បាន​ធ្វើការ​លើ​ថ្នាំ​វ៉ាក់​សាំង​នោះ​ថា «សុចរិត​ភាព​នៃ​វិទ្យាសាស្ត្រ​បាន​នាំ​យើង​ទាំង​អស់​គ្នា​មក​ដល់​ចំណុច​នេះ»។

វ៉ាក់សាំង​របស់​ក្រុមហ៊ុន Pfizer និង BioNTech នាំ​មុខគេ​នៅ​ក្នុង​កិច្ច​ប្រឹងប្រែង​ជា​សាកល​ដើម្បី​បង្កើត​វ៉ាក់សាំង​បង្ការ​ជំងឺ​កូវីដ១៩។ ចក្រភព​អង់គ្លេស​បាន​ក្លាយ​ជា​ប្រទេស​ទីមួយ​នៅ​បស្ចឹមប្រទេស ដែល​ចាប់ផ្តើម​ចាក់​វ៉ាក់សាំង​នេះ ជូនមហាជន កាលពីថ្ងៃ​អង្គារ តែ​ប៉ុន្មានថ្ងៃ​ក្រោយ​ទីភ្នាក់ងារ​ត្រួតពិនិត្យ​ថ្នាំពេទ្យ​នៃ​ចក្រភព​អង់គ្លេស បាន​អនុម័ត​ការប្រើប្រាស់​ថ្នាំ​នេះ៕

ផែនទីលទ្ធផលការបោះឆ្នោតប្រធានាធិបតីអាមេរិកពីឆ្នាំ ១៩៩២-២០២០

XS
SM
MD
LG