ភ្ជាប់​ទៅ​គេហទំព័រ​ទាក់ទង

មន្រ្តី​អាមេរិក៖ រុស្ស៊ី​បាន​ចាត់​គោលដៅ​លើ​ប្រព័ន្ធ​បោះឆ្នោត​ក្នុង​រដ្ឋ​ចំនួន ២១

  • Michael Bowman

អ្នកស្រី Jeanette Manfra អនុរដ្ឋ​មន្រ្តី​នៃ​ក្រសួង​សន្តិសុខ​មាតុភូមិ​។

ការ​ផ្តល់​សក្ខីកម្ម​​នៅ​ចំពោះ​មុខ​បណ្តា​គណៈកម្មាធិការ​សភា និង​ព្រឹទ្ធសភា កាល​ពី​ថ្ងៃ​ពុធ​កន្លង​ទៅ បាន​បង្ហាញ​ពី​ភាព​តានតឹង​កាន់​តែ​ខ្លាំង​រវាង​មន្រ្តី​ទទួល​បន្ទុក​ការ​បោះឆ្នោត​តាម​រដ្ឋ​ និង​ទីភ្នាក់ងារ​នានា​របស់​រដ្ឋាភិបាល​សហព័ន្ធ​ ដែល​កិច្ចសហប្រតិបត្តិការ​របស់​ទីភ្នាក់ងារ​ទាំង​នោះ ត្រូវ​បាន​ចាត់​ទុក​ថា មាន​សារៈសំខាន់​ក្នុង​ការ​ការពារ​ការ​បោះឆ្នោត​នា​ពេល​អនាគត។

មាន​តែ​រដ្ឋ​ចំនួន​ពីរ​ប៉ុណ្ណោះ ​ដែល​បាន​ទទួល​ស្គាល់​ជា​សាធារណៈ​ថា ប្រព័ន្ធបោះឆ្នោត​តាម​កុំព្យូទ័ររបស់​ខ្លួន ត្រូវ​បាន​គេ​លួច​ចូល។ សមាជិក​សភា​នៅ​រដ្ឋ​ទាំង​ពីរ​ ត្រូវ​បាន​គេ​ប្រាប់​ថា ការ​វាយប្រហារ​តាម​ប្រព័ន្ធអ៊ីនធឺណិត​ពី​រុស្ស៊ី គឺ​មាន​ការ​ប៉ះពាល់​ធំធេង​ជាង​នេះ​ទៅ​ទៀត។

អនុរដ្ឋ​មន្រ្តី​នៃ​ក្រសួង​សន្តិសុខ​មាតុភូមិ​ទទួល​បន្ទុកផ្នែក​សន្តិសុខ​ប្រព័ន្ធ​អ៊ីនធឺណិត អ្នកស្រី Jeanette Manfra បាន​និយាយ​ថា៖

«យើង​មាន​ភស្តុតាង​ពី​រដ្ឋ​ចំនួន ២១ ឬ​ ប្រព័ន្ធ​ពាក់ព័ន្ធ​នឹង​ការ​បោះឆ្នោត​ក្នុង​រដ្ឋ​ចំនួន ២១ ដែល​ត្រូវ​បាន​គេ​ចាត់​វាយប្រហារ»។

លោក Richard Burr សមាជិក​ព្រឹទ្ធសភា​រដ្ឋ North Carolina មក​ពី​គណបក្ស​សាធារណរដ្ឋ និង​ជា​សមាជិក​មួយ​រូប​នៃ​គណៈកម្មាធិការ​ស៊ើបអង្កេត​និយាយ​ថា៖

«ប៉ុន្តែ​ មិនមាន​ករណី​ណា​ ដែល​ចំនួន​សំឡេង​ឆ្នោត​ពិត​ប្រាកដ ​ត្រូវ​បាន​ធ្វើ​ឲ្យ​ប្រែប្រួល​ នៅ​ក្នុង​ទម្រង់​ឬ​បែបផែន​ណា​មួយ​ទេ។ មែន​ទេ?»

អ្នក​ស្រី Jeanette បាន​ឆ្លើយ​មក​វិញ​ថា៖

«ត្រឹមត្រូវ​ហើយ»។

ក្រុម​មន្រ្តី​បាន​បដិសេធ​មិន​ផ្តល់​ឈ្មោះ​រដ្ឋ​ ដែល​រង​ការ​ប៉ះពាល់ ឬ​ប្រាប់​ឲ្យ​ដឹង​ពី​ចំនួន​រដ្ឋ​ ដែល​រង​ការ​លួច​ចូលតាម​ប្រព័ន្ធ​អ៊ីនធឺណិត ដើម្បី​កែប្រែបញ្ជី​អ្នកបោះឆ្នោត ឬ​ទិន្នន័យ​ដទៃ​ទៀត​ឡើយ។ ការណ៍​នេះ​បាន​បង្ក​ឲ្យ​មាន​ការ​រិះគន់​យ៉ាង​ខ្លាំង។

លោក Mark Warner សមាជិក​ព្រឹទ្ធសភា​រដ្ឋ Virginia មក​ពី​គណបក្ស​ប្រជាធិបតេយ្យ​ និង​ជា​សមាជិក​មួយ​រូប​នៃ​គណៈកម្មាធិការ​ស៊ើបអង្កេត​ បាន​និយាយ​ថា៖

«ខ្ញុំ​មិន​ជឿ​ថា ការ​លាក់បាំង​ព័ត៌មាន​ពី​សាធារណជន​អាមេរិកាំង​ គឺ​ធ្វើ​ឲ្យ​ប្រទេស​យើង​មាន​សុវត្ថិភាព​ជាង​មុន​នោះ​ទេ។ ហើយ​ខ្ញុំ​ក៏​មិន​ចង់​ធ្វើ​ឲ្យ​រដ្ឋ​ណា​មួយ​អាម៉ាស់ដែរ»។

ប៉ុន្តែ​មន្រ្តី​ទទួល​បន្ទុក​ការ​បោះឆ្នោត​តាម​រដ្ឋ​មួយ​រូប បាន​ប្រាប់​ឲ្យ​មាន​ការ​ប្រយ័ត្នប្រយែង​ពី​ការ​បង្ហាញ​ព័ត៌មាន​ផ្សេងៗ​ទៅ​កាន់​សាធារណៈ។

លោកស្រី Connie Lawson រដ្ឋមន្រ្តី​ការបរទេស​ប្រចាំ​រដ្ឋ Indiana បាន​និយាយ​ថា៖

«ខ្ញុំ​គេង​មិន​លក់​នៅ​ពេល​យប់​ ដោយ​ព្រួយបារម្ភ​ពី​ជំនឿ​ទុកចិត្ត​របស់​សាធារណជនទៅ​លើ​ប្រព័ន្ធ​បោះឆ្នោត​របស់​យើង... អ្វីអាក្រក់​បំផុត​ដែល​យើង​អាច​ធ្វើ​នោះ គឺធ្វើ​ឲ្យ​ប្រជាពលរដ្ឋ​គិត​ថា សំឡេង​ឆ្នោត​របស់​ពួកគេ​មិន​មាន​តម្លៃ»។

ក្រុម​មន្រ្តី​ទទួល​បន្ទុក​ការ​បោះឆ្នោត​តាម​រដ្ឋ​មាន​ភាព​យឺតយ៉ាវក្នុង​ការ​ទាក់ទង​សុំ​ជំនួយ​ពី​រដ្ឋាភិបាល​សហព័ន្ធ​ក្នុង​ការ​កំណត់ និង​បង្ក្រាប​ការ​គំរាមកំហែង​តាម​ប្រព័ន្ធ​អ៊ីនធឺណិត។ នេះ​បើ​យោង​ទៅ​តាម​ មន្រ្តី​ជាន់ខ្ពស់​មួយ​រូប​ក្នុង​ជួរ​រដ្ឋបាល​អតីត​ប្រធានាធិបតី​លោក​បារ៉ាក់ អូបាម៉ា។

លោក Jeh Johnson អតីត​រដ្ឋមន្រ្តី​ក្រសួង​សន្តិសុខ​មាតុភូមិ​ បាន​និយាយ​ថា៖

«យើង​បាន​ឃើញ​ការ​វិវត្ត​ទៅ​មុខនៃ​សកម្មភាព​ស្កេន និង​សកម្មភាព​ស៊ើបអង្កេត​ទៅ​លើ​មូលដ្ឋាន​ទិន្នន័យ​ចុះ​បញ្ជី​អ្នក​បោះឆ្នោត ដែល​នេះ​ធ្វើ​ឲ្យ​ខ្ញុំ​ព្រួយបារម្ភ និង​ជា​ហេតុ​ដែល​ខ្ញុំ​តែងតែ​ជំរុញ​ឲ្យ​មន្រ្តី​តាម​រដ្ឋ​ មក​ស្នើ​សុំ​ជំនួយ​ពី​យើង»។

ប៉ុន្តែ​ការ​ចាត់ទុក​ប្រព័ន្ធ​បោះឆ្នោត​ជា​ផ្នែក​មួយ​នៃ​ហេដ្ឋារចនាសម្ព័ន្ធ​សំខាន់​នៅ​អាមេរិក​ដោយ​រដ្ឋបាល​លោក​អូបាម៉ា ដែលធ្វើ​ឲ្យ​រដ្ឋ​នានា​មាន​សិទ្ធិ​ទទួល​ធនធាន​ពី​រដ្ឋាភិបាល​សហព័ន្ធ​នេះ​ មិន​សូវ​បំពេញ​ចិត្ត​ក្រុម​មន្រ្តី​តាម​រដ្ឋ​នានា​ទេ។ ពួកគេ​ជឿ​ថា ការបោះឆ្នោតវិមជ្ឈការ​ថា​ជា​ រឿង​វិជ្ជមាន។

លោកស្រី Connie Lawson រដ្ឋមន្រ្តី​ការបរទេស​ប្រចាំ​រដ្ឋ Indiana បាន​និយាយ​ថា៖

«ស្វ័យភាព​បែប​នេះដើរ​តួ​ជា ការ​ត្រួត​ពិនិត្យ​មួយ​ទៅ​លើ​សមត្ថភាព​ក្រុម​ទុច្ចរិត»។

ខណៈ​ពេល​មាន​ភាព​មិន​ស្រុះស្រួល​គ្នា​រវាង​ក្រុម​មន្រ្តី​តាម​រដ្ឋ និង​ក្រុម​មន្រ្តី​រដ្ឋាភិបាល​សហព័ន្ធ ក៏​មាន​ការ​ព្រមាន​មួយ​ផង​ដែរ​ពី​សំណាក់​អ្នក​វិទ្យាសាស្រ្ត​កុំព្យូទ័រ ដែល​បាន​សិក្សា​ទៅ​លើ​ភាព​ងាយ​រង​ការ​ប៉ះពាល់​នៃ​ប្រព័ន្ធ​បោះឆ្នោត​តាម​កុំព្យូទ័រ។

លោក Alex Halderman នៃ​សកលវិទ្យាល័យរដ្ឋ​ Michigan បាន​និយាយ​ថា៖

«រាល់​ករណី​នីមួយៗ យើង​បាន​រក​ឃើញ​ពី​របៀប​ ដែល​ពួក​លួច​ចូល​តាម​ប្រព័ន្ធ​អ៊ីនធឺណិត​ អាច​ចូល​ទៅ​បំផ្លាញ​ម៉ាស៊ីន និង​លួច​សំឡេង​ឆ្នោត។ សមត្ថភាព​ទាំង​នេះ​ អាច​ធ្លាក់​នៅ​ក្នុង​កណ្តាប់​ដៃ​របស់​សត្រូវ​របស់​សហរដ្ឋអាមេរិក​ច្បាស់​ណាស់»។

មាន​ការ​កត់​សម្គាល់​ផង​ដែរ​ថា ទោះ​បី​ជា​ ​ម៉ាស៊ីន​កត់ត្រា​សំឡេង​ឆ្នោត​មិន​ភ្ជាប់​ទៅ​ប្រព័ន្ធ​អ៊ីនធឺណិត​ក៏​ដោយ ​កម្មវិធី​កុំព្យូទ័រ​សម្រាប់​ការ​បោះឆ្នោត​ក៏​អាច​ត្រូវ​គេ​លួច​ចូល​បាន​ដែរ៕

ប្រែសម្រួលដោយ ណឹម សុភ័ក្រ្តបញ្ញា

XS
SM
MD
LG