មេដឹកនាំនានានៃបណ្ដាប្រទេសជាសមាជិកសហភាពអឺរ៉ុប បានបើកកិច្ចប្រជុំរយៈពេល ២ ថ្ងៃ នៅក្នុងទីក្រុងប្រ៊ុចសែល ប្រទេសប៊ែលហ្ស៊ិក នៅថ្ងៃព្រហស្បតិ៍នេះ ដើម្បីដោះស្រាយបញ្ហាផ្សេងៗចាប់តាំងពីបញ្ហាការចាកចេញដែលគ្រោងទុករបស់ចក្រភពអង់គ្លេសពីសហភាអឺរ៉ុប រហូតដល់ការធ្វើឲ្យសេដ្ឋកិច្ចកើនឡើងម្ដងទៀត។
នៅក្នុងកិច្ចប្រជុំនេះ នាយករដ្ឋមន្ត្រីចក្រភពអង់គ្លេសលោកស្រី Theresa May ត្រូវគេរំពឹងថា នឹងថ្លែងសុន្ទរកថាអំពីការធានាជាថ្មីអំពីអនាគតរបស់ប្រជាពលរដ្ឋចំនួន ៣ លាននាក់ នៃបណ្ដាប្រទេសនានានៅក្នុងសហភាពអឺរ៉ុប ដែលបច្ចុប្បន្នកំពុងរស់នៅក្នុងចក្រភពអង់គ្លេស។
បន្ថែមទៅនឹងប្រជាពលរដ្ឋចក្រភពអង់គ្លេសចំនួនជាង ១ លាននាក់ ដែលរស់នៅក្នុងបណ្ដាប្រទេសនានាក្នុងសហភាពអឺរ៉ុប បញ្ហានេះគឺជាប្រធានបទដ៏សំខាន់មួយ ដែលភាគីទាំងពីរត្រូវតែឯកភាពជាផ្នែកមួយនៃការចរចា ដែលបានចាប់ផ្ដើមកាលពីដើមសប្ដាហ៍នេះ។
បន្ទាប់ពីលោកស្រី Theresa May បញ្ចប់ការថ្លែងរបស់លោកស្រីនៅយប់ថ្ងៃព្រហស្បតិ៍នេះ មេដឹកនាំផ្សេងទៀតនឹងជួបពិភាក្សាគ្នាដោយគ្មានវត្តមានលោកស្រី ដើម្បីពិភាក្សាអំពីដំណើរការចាកចេញរបស់ចក្រភពអង់គ្លេសពីសហភាពអឺរ៉ុប ដែលបានកើតឡើងបន្ទាប់ពីការធ្វើប្រជាមតិមួយនៅក្នុងចក្រភពអង់គ្លេសកាលពីឆ្នាំមុន និងគ្រោងនឹងបញ្ចប់នៅចុងខែមិនា ឆ្នាំ ២០១៩ ខាងមុខនេះ។
កិច្ចប្រជុំរបស់សហភាពអឺរ៉ុបនេះ ក៏នឹងផ្ដោតលើបញ្ហាចំណាកស្រុក ការដាក់ទណ្ឌកម្មឡើងវិញប្រឆាំងនឹងប្រទេសរុស្ស៊ី និងកិច្ចប្រឹងប្រែងដើម្បីប្រយុទ្ធប្រឆាំងនឹងភាពជ្រុលនិយមផ្សេងៗតាមប្រព័ន្ធអ៊ីនធឺណិត៕
