ពលរដ្ឋអាមេរិកដែលនឹងចេញទៅបោះឆ្នោតនៅស្ថានីយបោះឆ្នោត ឬផ្ញើសន្លឹកឆ្នោតរបស់គេតាមប្រៃសណីយ៍សម្រាប់ការបោះឆ្នោតប្រធានាធិបតីអាមេរិកក្នុងខែវិច្ឆិកាខាងមុខនេះ អាចជឿជាក់ថា សន្លឹកឆ្នោតរបស់ពួកគេនឹងត្រូវបានគេកត់ត្រាយ៉ាងត្រឹមត្រូវ។ នេះបើយោងតាមការបញ្ជាក់របស់មន្ត្រីម្នាក់ទទួលបន្ទុកការងារសនិ្តសុខបោះឆ្នោត។
លោក Chris Krebs នាយកទីភ្នាក់ងារសន្តិសុខហេដ្ឋារចនាសម្ព័ន្ធ និងបច្ចេកវិទ្យា បាននិយាយកាលពីថ្ងៃសុក្រថា៖ «ខ្ញុំធ្លាប់បាននិយាយកាលពីលើកមុន ហើយខ្ញុំនឹងនិយាយម្តងទៀតនៅពេលនេះ។ ការបោះឆ្នោតឆ្នាំ២០២០ជា ការបោះឆ្នោតដែលមានសន្តិសុខខ្លាំងបំផុតនៅក្នុងប្រវត្តិសាស្រ្តសម័យទំនើបរបស់អាមេរិក។
លោក Krebs បានថ្លែងក្នុងសិក្ខាសាលាតាមប្រព័ន្ធអនឡាញរបស់វិទ្យាស្ថាន Brookings ស្តីពីសុចរិតភាពនៃការបោះឆ្នោតថា ការប៉ុនប៉ងរបស់រុស្សីក្នុងការជ្រៀតជ្រែកការបោះឆ្នោតប្រធានាធិបតីអាមេរិកឆ្នាំ២០១៦ ជាការក្រើនរំឭកមួយ ហើយថាទីភ្នាក់ងាររបស់លោកមានលទ្ធភាពក្នុងការបង្កើតវិធានការមួយចំនួនសម្រាប់អនុវត្តក្នុងការបោះឆ្នោតពាក់កណ្តាលអាណត្តិក្នុងឆ្នាំ២០១៨។
វិធានការទាំងនោះរួមមាន ការប្រើប្រាស់ប្រព័ន្ធចាប់សញ្ញាដោយស្វ័យប្រវត្តិក្នុងការស្វែរងរកលទ្ធភាពនៃការចូលលុកលុយប្រព័ន្ធកំព្យូទ័រនិងបណ្តាញសំខាន់ៗ ដូចជាទិន្នន័យចុះឈ្មោះអ្នកបោះឆ្នោតក៏ដូចជា វិធានការរក្សាទុកសន្លឹកឆ្នោត ដើម្បីផ្ទៀងផ្ទាត់ក្នុងករណីត្រូវផ្ទៀងផ្ទាត់លទ្ធផលឡើងវិញ។
លោកបន្តថា រដ្ឋរបស់អាមេរិកយ៉ាងហោចណាស់ ៩២ភាគរយ ឥឡូវនេះមានប្រព័ន្ធផ្សេងៗ ដើម្បីធានាថា មានការកត់ត្រានៅលើសន្លឹកឆ្នោតនីមួយៗ ដែលបានបោះរួចហើយ ដែលនេះវាធ្វើឲ្យការងារត្រួតពិនិត្យលទ្ធផលបោះឆ្នោតមានលក្ខណៈងាយស្រួល នឹងធានាថា គ្មាននរណាម្នាក់អាចបន្លំការរាប់សន្លឹកឆ្នោតនោះទេ។ ចំនួនភាគរយនេះអាចកើនឡើងថែមទៀត នៅពេលដែលចំនួនរដ្ឋរបស់អាមេរិកកាន់តែច្រើនឡើងត្រូវគេរំពឹងថា នឹងប្រើប្រាស់ការបោះឆ្នោតតាមរយៈប្រអប់សំបុត្រប្រៃសណីយ៍ ជាជាងការទៅបោះឆ្នោតនៅតាមស្ថានីយបោះឆ្នោតដោយផ្ទាល់ ដោយសារតែការបារម្ភពីវីរុសកូរ៉ូណាដែលកំពុងតែបន្តកើតមាន។
ទោះបីជាការបោះឆ្នោតតាមរបៀបនេះអាចធ្វើឲ្យមានការយឺតយ៉ាវដល់ការប្រកាសលទ្ធផលបោះឆ្នោតចុងក្រោយ ហើយតម្រូវឲ្យមានការអត់ធ្មត់ពីពលរដ្ឋម្ចាស់ឆ្នោតក្តី លទ្ធផលនៃការបោះឆ្នោតនឹងមានសន្តិសុខនិងសុវត្ថិភាព។
ការវាយតម្លៃដោយសុទិដ្ឋិនិយមនេះផ្ទុយគ្នាពីការលើកឡើងរបស់លោកប្រធានាធិបតីអាមេរិក Donald Trump ដែលកាលពីខែមុនបានព្រមាននៅលើបណ្តាញ Twitter ថា ការបោះឆ្នោតតាមរយៈប្រអប់សំបុត្រអាចក្លាយជាអ្វីដែលលោកហៅថា «ជាការបោះឆ្នោតដែលមានការបន្លំខ្លាំងបំផុត» ក្នុងប្រវត្តិសាស្រ្តរបស់អាមេរិក។
ស្រដៀងគ្នានេះផងដែរ រដ្ឋមន្ត្រីក្រសួងយុត្តិធម៌អាមេរិកលោក William Barr បានលើកឡើងថា ការប្រើប្រាស់ការបោះឆ្នោតតាមរយៈសំបុត្រ «ជាការបើកទ្វារដ៏ធំមួយទៅរកការបោះឆ្នោតដែលមានការក្លែងបន្លំ»។
ប៉ុន្តែអង្គការនិងមន្រ្តីបោះឆ្នោតនៅតាមរដ្ឋដូចជា សមាគមជាតិនៃរដ្ឋមន្ត្រីការបរទេសរបស់រដ្ឋ និងសមាគមជាតិនៃនាយកការបោះឆ្នោតរបស់រដ្ឋ បានបដិសេធការអះអាងទាំងនោះ ដោយលើកឡើងថា ពុំមានភស្តុតាងណាមួយដែលអាចគាំទ្រការព្រួយបារម្ភទាំងនេះទេ។
មន្ត្រីនៃទីភ្នាក់ងារសន្តិសុខហេដ្ឋារចនាសម្ព័ន្ធ និងបច្ចេកវិទ្យាដូចជា លោក Krebs ជាដើមបាននិយាយថា ទោះបីជាគេមានជំនឿលើការខិតខំប្រឹងប្រែងរបស់គេក្នុងការធ្វើឲ្យការបោះឆ្នោតនាពេលខាងមុខមានសនិ្តសុខនិងសុវត្ថិភាពក៏ដោយ ក៏គ្មាននរណាប្រាកដ១០០ភាគរយនោះទេ។
លោក Krebs បាននិយាយកាលពីថ្ងៃសុក្រថា៖ «យើងមិនមែនមិនដឹងនោះទេ។ មានមនុស្សអាក្រក់ ដែលចង់ធ្វើអំពើអាក្រក់។ ប្រទេសរុស្សីចង់ធ្វើឲ្យមានអស្ថិរភាពក្នុងការបោះឆ្នោតអាមេរិក។ ប្រទេសចិនចង់បានប្រទេសមួយដែលសម្របសម្រួលជាមួយចិន ហើយប្រទេសអ៊ីរ៉ង់ប្រហែលជាចង់ធ្វើនូវអ្វីដែលរុស្សីនិងចិនចង់បានដែរ»។
លោក Krebs បន្តថា យើងមានប្រព័ន្ធការពារមួយ ហើយយើងត្រៀមខ្លួនរួចរាល់អស់ហើយ»។
ទោះបីជាមានភស្តុតាងថា ប្រទេសរុស្សីតាមដានប្រព័ន្ធបោះឆ្នោតតាមរដ្ឋរបស់អាមេរិក នៅមុនការបោះឆ្នោតប្រធានាធិបតីកាលពីឆ្នាំ២០១៦ក្តី ប៉ុន្តែមន្ត្រីអាមេរិកនិយាយថា ពុំមានភស្តុតាងណាមួយដែលថា សន្លឹកឆ្នោតត្រូវបានគេផ្លាស់ប្តូរនោះទេ។
មន្ត្រីសន្តិសុខអាមេរិក បានធ្វើការសន្និដ្ឋានបែបនេះដែរ ក្រោយការបោះឆ្នោតឆ្នាំ២០១៨។
លោក Krebs និយាយថា យ៉ាងហោចណាស់រហូតមកដល់ពេលនេះពុំមានសញ្ញាណាមួយដែលថា រុស្សីឬប្រទេសណាមួយបានព្យាយាមជ្រៀតចូលក្នុងប្រព័ន្ធបោះឆ្នោតសំខាន់ៗនោះទេ។
លោក Krebs បន្តក្នុងសម្តីដើមថា៖ «ប្រាកដណាស់គឺយើងអាចមើលឃើញប្រសើរជាងមុនទៅលើបណ្តាញប្រព័ន្ធបោះឆ្នោតទាំងមូល ហើយយើងមិនបានឃើញសកម្មភាពច្រើនដូចក្នុងការបោះឆ្នោតឆ្នាំ២០១៦នោះទេ។ យើងមិនបានឃើញនូវកម្រិតសកម្មភាពបច្ចេកវិទ្យាដែលមានការកំណត់និងសម្របសម្រួលណាមួយនោះទេ។
ផ្ទុយទៅវិញ មន្ត្រីសន្តិសុខនិងមន្រ្តីបោះឆ្នោតអាមេរិកបានលើកឡើងថា ពួកគេមានការបារម្ភច្រើនពីប្រតិបត្តិការ ដែលមានសក្តានុពលនិងឥទ្ធិពលរបស់គូសត្រូវ ដូចជាប្រទេសរុស្សីជាដើម ដែលភាគច្រើនមានបំណងធ្វើឲ្យពលរដ្ឋអាមេរិកបាត់បង់ជំនឿលើការបោះឆ្នោត។
អ្នកស្រី Suzanne Spaulding នៃគណៈកម្មការ Cyberspace Solarium របស់អាមេរិកនិងជាទីប្រឹក្សាជាន់ខ្ពស់ស្តីពីសន្តិសុខមាតុភូមិនៃមជ្ឈមណ្ឌលសម្រាប់ការសិក្សាអន្តរជាតិនិងយុទ្ធសាស្រ្តបានប្រាប់សមាជិកសភាកាលពីពេលថ្មីៗថា៖ «ពួកគេចង់ឲ្យពលរដ្ឋអាមេរិកកាំងអស់ក្តីសង្ឃឹម ក្នុងការនាំមកនូវការផ្លាស់ប្តូរមួយ និងអស់ក្តីសង្ឃឹមពីលទ្ធភាពដែលអាចបែងចែករឿងពិតនិងរឿងក្លែងក្លាយ»៕
ប្រែសម្រួលដោយលោក ជ្រា វណ្ណារិទ្ធ
