អាមេរិកបានធានាដល់សម្ព័ន្ធមិត្តរបស់ខ្លួនកាលពីថ្ងៃពុធថា កងនាវាចម្បាំង USS Carl Vinson របស់ខ្លួនកំពុងឆ្ពោះទៅកាន់តំបន់ប៉ាស៊ីហ្វិកខាងជើង ដើម្បីបង្អាក់កម្មវិធីអាវុធនុយក្លេអ៊ែររបស់កូរ៉េខាងជើង។ ប៉ុន្តែការណ៍នេះ ធ្វើឡើងប៉ុន្មានថ្ងៃក្រោយពេលដែលមានសេចក្តីថ្លែងការណ៍មិនត្រឹមត្រូវដែលថា នាវាដឹកយន្តហោះចម្បាំងនិងនាវាផ្សេងៗទៀតបានឆ្ពោះទៅកាន់តំបន់ប៉ាស៊ីហ្វិកខាងជើងរួចទៅហើយ។
លោកប្រធានាធិបតី Donald Trump បានប្រកាសកាលពីថ្ងៃទី១១ ខែមេសាកន្លងទៅ បីថ្ងៃបន្ទាប់ពីនាវាចម្បាំងនោះបានចាកចេញពីប្រទេសសិង្ហបុរីថា៖ «យើងកំពុងបញ្ចូនកងនាវាចម្បាំងដ៏មានអំណាច»។
លោកឧត្តមនាវីឯក Harry Harris មេបញ្ជាការរបស់អាមេរិកប្រចាំនៅតំបន់ប៉ាស៊ីហ្វិកបានប្រកាសកាលពីថ្ងៃទី៩ ខែមេសាថា លោកកំពុងបញ្ជាឲ្យនាវាចម្បាំងធ្វើដំណើរឆ្ពោះទៅកាន់ភាគខាងជើងក្រោយចាកចេញពីប្រទេសសិង្ហបុរី ហើយថា ខ្លួននឹងមិនទៅចុះចតនៅកំពង់ផែអូស្ត្រាលីតាមផែនការមុននោះទេ។
ទោះជាយ៉ាងនេះក្តីកងនាវាចម្បាំងបានចតនៅតំបន់ប៉ាស៊ីហ្វិកខាងលិច ហើយបានធ្វើសមយុទ្ធជាមួយនឹងកងកម្លាំងរបស់អូស្ត្រាលី៕
