ប្រធានាធិបតីសហរដ្ឋអាមេរិក លោក Joe Biden នឹងថ្លែងនៅថ្ងៃចន្ទនេះ អំពីប្រព័ន្ធធនាគារ ក្រោយពីរដ្ឋាភិបាលបានចាត់វិធានការ ដើម្បីព្យាយាមទប់ស្កាត់វិបត្តិដែលអាចកើតឡើងពីបរាជ័យនៃធនាគារធំៗពីរ។
លោក Biden បាននិយាយក្នុងសេចក្តីថ្លែងការណ៍មួយកាលពីយប់ថ្ងៃអាទិត្យម្សិលមិញថា«ពលរដ្ឋអាមេរិកាំងនិងក្រុមហ៊ុនអាមេរិក អាចជឿជាក់ថាប្រាក់បញ្ញើក្នុងធនាគាររបស់ពួកគេនឹងមានពេលណាពួកគេត្រូវការវា»។ លោកថ្លែងបន្តថា «ខ្ញុំប្តេជ្ញាយ៉ាងមុតមាំថានឹងឲ្យអ្នកទាំងឡាយណាដែលបង្កឲ្យមានបញ្ហានេះ ទទួលខុសត្រូវទាំងស្រុង ហើយនឹងបន្តការខិតខំរបស់យើង ដើម្បីពង្រឹងការត្រួតពិនិត្យនិងបទប្បញ្ញត្តិលើធនាគារធំៗជាងនេះ ដើម្បីកុំឲ្យយើងជួបបញ្ហានេះទៀត»។
ក្រសួងហិរញ្ញវត្ថុអាមេរិក បាននិយាយក្នុងសេចក្តីថ្លែងការណ៍មួយកាលពីថ្ងៃអាទិត្យម្សិលមិញថាអ្នកដាក់ប្រាក់បញ្ញើក្នុងធនាគារ Silicon Valley Bank ដែលមានមូលដ្ឋាននៅរដ្ឋ California និងក្នុងធនាគារ Signature Bank ដែលមានមូលដ្ឋាននៅរដ្ឋ New York នឹងអាចចូលដកប្រាក់ទាំងអស់របស់ពួកគេបាននៅថ្ងៃចន្ទនេះ។
ក្រុមនិយ័តករ ក៏បាននិយាយដែរថាអ្នកបង់ពន្ធ នឹងមិនមែនជាអ្នកទទួលបន្ទុកលើការខាតបង់ដែលពាក់ព័ន្ធនឹងសេចក្តីសម្រេចចិត្តរបស់ធនាគារ Silicon Valley Bank និង Signature Bank ទេ។
ដោយមានទ្រព្យប្រមាណ២០០ពាន់លានដុល្លារ បរាជ័យរបស់ធនាគារ Silicon Valley Bank គឺជាបរាជ័យធំជាងគេបង្អស់ទី២ក្នុងប្រវត្តិសាស្ត្រសហរដ្ឋអាមេរិក។ ធនាគារនេះ ពាក់ព័ន្ធយ៉ាងខ្លាំងនឹងការផ្តល់ហិរញ្ញប្បទានដល់ក្រុមហ៊ុនមូលធនរួមគ្នា ជាពិសេសខាងវិស័យបច្ចេកវិទ្យា។
ធនាគារ Signature Bank ក៏មានអតិថិជនមួយភាគធំក្នុងវិស័យបច្ចេកវិទ្យាដែររួមទាំងផ្នែក cryptocurrencyផង។ បរាជ័យនៃធនាគារនេះ ដែលមានទ្រព្យជាង១០០ពាន់លានដុល្លារ គឺជាបរាជ័យធំជាងគេបង្អស់ទី៣ក្នុងប្រវត្តិសាស្ត្រអាមេរិក។
ធនាគារទាំងពីរនេះ រងផលប៉ះពាល់ពីការកើនឡើងនូវអត្រាការប្រាក់ ដែលប៉ះពាល់ជាអវិជ្ជមានលើតម្លៃទីផ្សារនៃទ្រព្យមួយភាគធំរបស់ធនាគារទាំងនេះដូចជាមូលបត្របំណុលនិងមូលបត្រទ្រព្យបញ្ចាំ៕
(ព័ត៌មានមួយចំនួនសម្រាប់រឿងនេះបានមកពីទីភ្នាក់ងារសារព័ត៌មានAP, Agence France-Presse និង Reuters)
