សហរដ្ឋអាមេរិកអាចដាក់ទណ្ឌកម្មបន្ថែមទៀតដល់ប្រទេសចំនួន ៤ ដែលមិនសហប្រតិបត្តិការជាមួយនឹងសហរដ្ឋអាមេរិកក្នុងការទទួលយកពលរដ្ឋរបស់ខ្លួនដែលសហរដ្ឋអាមេរិកគ្រោងនឹងបញ្ជូនចេញ។ នេះបើយោងតាមការបញ្ជាក់របស់អ្នកនាំពាក្យក្រសួងសន្តិសុខមាតុភូមិសហរដ្ឋអាមេរិក កាលពីថ្ងៃពុធម្សិលមិញ។
រដ្ឋមន្ត្រីស្ដីទីក្រសួងសន្តិសុខមាតុភូមិលោកស្រី Elaine Duke បានផ្ញើលិខិតមួយច្បាប់ទៅកាន់ក្រសួងការបរទេសកាលពីសប្ដាហ៍មុន ដោយកំណត់នូវប្រទេសចំនួន ៤ ដែលអាចប្រឈមនឹងការដាក់ទណ្ឌកម្មថ្មីនេះ។
អ្នកនាំពាក្យក្រសួងសន្តិសុខមាតុភូមិលោក David Lapan បានបដិសេធមិនពិភាក្សាអំពីការដាក់ទណ្ឌកម្មទាំងនេះ ឬក៏កំណត់ឈ្មោះប្រទេសទាំង ៤ ដែលអាចប្រឈមនឹងការដាក់ទណ្ឌកម្មបន្ថែមទៀតទាំងនេះ ដែលក្នុងនោះមានទាំងការមិនផ្ដល់ទិដ្ឋាការធ្វើដំណើរដល់ពលរដ្ឋដែលមកពីប្រទេសទាំងនោះផងដែរ។
ប៉ុន្តែ បណ្ដាញព័ត៌មាន CNN បានដកស្រង់សម្ដីរបស់មន្ត្រីក្រសួងសន្តិសុខមាតុភូមិម្នាក់ ដែលបាននិយាយកាលពីថ្ងៃពុធម្សិលមិញថា ប្រទេសទាំង ៤ ដែលកំពុងស្ថិតក្នុងការពិចារណានោះ គឺប្រទេសកម្ពុជា អេរីត្រេ ហ្គីណេ និងសៀរ៉ាឡែអូន។
តាំងពីឆ្នាំ ២០០០ មក រដ្ឋាភិបាលសហរដ្ឋអាមេរិកបានដាក់ទណ្ឌកម្មលើប្រទេសចំនួន ២ គឺ ប្រទេសហ្គីណេ និងប្រទេសហ្គំប៊ី ដោយឈប់ផ្ដល់ទិដ្ឋាការដល់មន្ត្រីរដ្ឋាភិបាល និងក្រុមគ្រួសាររបស់ពួកគេមួយចំនួន៕
