ភ្ជាប់​ទៅ​គេហទំព័រ​ទាក់ទង

សហរដ្ឋ​អាមេរិក​ស្វែក​រក​លុយ​រាប់​លាន​ដុល្លារ​អាមេរិក​ដែល​ត្រូវ​គេ​លួច​ពី​ថវិកា​ជាតិ​ម៉ាឡេស៊ី


នាយក​រដ្ឋ​មន្ត្រី Najib Razak (រូប​ឆ្វេង) និង​លោក​ប្រធានាធិបតី​ បារ៉ាក់ អូបាម៉ា ថ្លែង​ទៅ​កាន់​អ្នក​កាសែត​បន្ទាប់​ពី​កិច្ចប្រជុំ​មុន​ពេល​ចាប់ផ្តើម​កិច្ចប្រជុំ​អាស៊ាន​នៅ​ក្នុង​ក្រុង​កូឡាឡាំពួ ប្រទេស​ម៉ាឡេស៊ី កាលពី​ថ្ងៃទី២០ ខែវិច្ឆិកា ឆ្នាំ២០១៥។

ពាក្យ​បណ្តឹង​រដ្ឋប្បវេណី​របស់​រដ្ឋាភិបាល​សហព័ន្ធ​សហរដ្ឋអាមេរិក ដែល​ចោទ​ប្រកាន់​ចំពោះ​ការ​លួច​ថវិកា​វិនិយោគ​ដែល​គ្រប់គ្រង​ដោយ​រដ្ឋាភិបាល​ប្រទេស​ម៉ាឡេស៊ី គឺ​អាច​ជា​កត្តា​ជាក់លាក់​មួយ​សម្រាប់​ឲ្យ​គណបក្ស​ប្រឆាំង​របស់​ម៉ាឡេស៊ី​ធ្វើ​ការ​អំពាវនាវ​ភ្លាមៗ​ឲ្យ​លោក​នាយរដ្ឋមន្ត្រី Najib Razak លា​ឈប់​ពី​មុខតំណែង​របស់​លោក។ ទោះបីជា​ករណី​បណ្តឹង​ផ្លូវ​ច្បាប់​នេះ​ទំនង​ជា​អាច​ជួយ​ក្រុម​គណបក្ស​ប្រឆាំង​ដ៏​ទន់ខ្សោយ​នៅក្នុង​ក្រុង Kaula Lumpur ក៏ដោយ ក៏​វា​មិន​ត្រូវ​បាន​គេ​រំពឹង​ថា អាច​ធ្វើឲ្យ​មេដឹកនាំ​ម៉ាឡេស៊ី​ចាក់​ឫស​ចាក់​គល់​រូប​នេះ​ចាកចេញ​ពី​តំណែង​បាន​ដែរ។

គណបក្ស​កាន់​អំណាច​របស់​ម៉ាឡេស៊ី​នឹង​ធ្វើ​ការ​តវ៉ា​គាំទ្រ​លោក Najib ហើយ​និង​រិះគន់ «ឥទ្ធិពល​មហា​អំណាច​បរទេស រួមទាំង​ជនជាតិ​ជ្វីប​ផងដែរ‍» ថា​បាន​ព្យាយាម​ផ្តួល​រំលំ​រដ្ឋាភិបាល​ដែល​ជ្រើសរើស​តាម​លទ្ធិ​ប្រជាធិបតេយ្យ។ នេះ​បើតាម​ការ​រំពឹងទុក​របស់​អ្នក​នយោបាយ​គណបក្ស​ប្រឆាំង លោក Charles Santiago កាលពី​ថ្ងៃ​ពុធ​ម្សិលមិញ​នេះ។

លោក Santiago ដែល​ជា​សមាជិក​រដ្ឋសភា​មកពី​គណបក្ស​សកម្មភាព​ប្រជាធិបតេយ្យ (Democratic Action Party) បាន​ប្រាប់ VOA ថា៖ «គណបក្ស​ប្រឆាំង និង​អង្គការ​ក្រៅ​រដ្ឋាភិបាល​នឹង​ស្នើ​ដល់​អគ្គមេធាវី​ឲ្យ​ស៊ើបអង្កេត​ការ​ចោទប្រកាន់​ដែល​ធ្វើ​ឡើង​នៅ​សហរដ្ឋអាមេរិក​នេះ‍។ ករណី​នេះ​នឹង​មិន​បន្លាយ​ពេល​យូរ​ទេ ដោយសារតែ​ការិយាល័យ​អគ្គមេធាវី​បាន​បិទ​សំណុំរឿង​របស់​ខ្លួន​ច្រើន​ខែ​កន្លង​មក​ហើយ‍»។

នៅ​ក្នុង​ការ​ផ្តួចផ្តើម​ដ៏​ធំ​បំផុត​មិន​ដែល​មាន​ពី​មុន​មក​របស់​គម្រោង​ផ្តូចផ្តើម​ដក​យក​មក​វិញ​នូវ​ទ្រព្យ​សម្បត្តិ​របស់​រដ្ឋាភិបាល​ពុករលួយ​របស់​ក្រសួង​យុត្តិធម៌​សហរដ្ឋ​អាមេរិក (US Justice Department's Kleptocracy Asset Recovery Initiative) អាជ្ញាធរ​មាន​គោលបំណង​ដកហូត​នូវ​អចលន​ទ្រព្យ សិល្បៈកម្ម គ្រឿង​អលង្ការ​ផ្សេងៗ និង​សិទ្ធិ​នៅ​ក្នុង​ភាពយន្ត​ហូលីវូដ ដែល​សរុប​មាន​តម្លៃ​ជាង ១ ពាន់​លាន​ដុល្លារ​អាមេរិក។

អាជ្ញាធរ​បាន​ចោទប្រកាន់​ថា ទ្រព្យ​សម្បត្តិ​ទាំងអស់​នេះ​ត្រូវ​បាន​លួច​ចេញ​ពី​គម្រោង​ថវិកា​ដែល​ហៅ​ថា 1Malaysia Development Berhad ឬ 1MDB ដែល​ជា​គម្រោង​ដែល​លោក Najib បាន​ផ្តួចផ្តើម​បង្កើត​ឡើង​នៅ​ក្នុង​ឆ្នាំ ២០០៩។ ទ្រព្យ​សម្បត្តិ​ទាំងអស់​នេះ សព្វថ្ងៃ​គ្រប់គ្រង​ដោយ​ក្រសួង​ហិរញ្ញវត្ថុ ដែល​លោក​នាយករដ្ឋមន្ត្រី Najib គ្រប់គ្រង​ពី​លើ៕

XS
SM
MD
LG