សហរដ្ឋអាមេរិកបានប្រកាសពីការដកខ្លួនចេញជាផ្លូវការពីក្រុមប្រឹក្សាសិទ្ធិមនុស្សអង្គការសហប្រជាជាតិ ដោយបានបញ្ជាក់ថា ឈ្មោះរបស់ក្រុមប្រឹក្សានេះគ្មានតម្លៃអ្វីទៀតទេ។
នៅក្នុងសន្និសីទព័ត៌មានរួមគ្នាមួយជាមួយនឹងរដ្ឋមន្ត្រីការបរទេសសហរដ្ឋអាមេរិកលោក Mike Pompeo នៅឯក្រសួងការបរទេសកាលពីថ្ងៃចន្ទកន្លងទៅនេះ ឯកអគ្គរដ្ឋទូតសហរដ្ឋអាមេរិកប្រចាំអង្គការសហប្រជាជាតិលោកស្រី Nikki Haley បានប្រាប់អ្នកសារព័ត៌មានថា៖ «អស់រយៈពេលជាយូរមកហើយ ក្រុមប្រឹក្សាសិទ្ធិមនុស្សអង្គការសហប្រជាជាតិគឺជាអ្នកការពារអ្នករំលោភសិទ្ធិមនុស្ស និងជារណ្ដៅនៃភាពលំអៀងផ្នែកនយោបាយ»
លោកស្រីបានចោទប្រកាន់ក្រុមប្រឹក្សានេះថា «មានការលម្អៀងរ៉ាំរ៉ៃជាយូរមកហើយ» ប្រឆាំងនឹងប្រទេសអ៊ីស្រាអែល។
លោកស្រីបាននិយាយថា សហរដ្ឋអាមេរិកបានព្យាយាមកាលពីមួយឆ្នាំកន្លងទៅនេះដើម្បីកែទម្រង់ក្រុមប្រឹក្សានេះ ប៉ុន្តែមិនទទួលបានជោគជ័យអ្វីនោះទេ។
ដោយយោងទៅលើការរំលោភសិទ្ធិមនុស្សរបស់ប្រទេសវេណេស៊ុយអេឡា ចិន គុយបា និងសាធារណរដ្ឋប្រជាធិបតេយ្យកុងហ្គោ លោកស្រីបានបញ្ជាក់ថា៖ «បើក្រឡេកមើលទៅលើសមាជិកភាពរបស់ក្រុមប្រឹក្សាសិទ្ធិមនុស្សអង្គការសហប្រជាជាតិ អ្នកនឹងឃើញថាមានការមិនគោរពដ៏អាក្រក់បំផុតចំពោះសិទ្ធិជាមូលដ្ឋាននានា»។
លោករដ្ឋមន្ត្រី Mike Pompeo ឯកភាពចំពោះការលើកឡើងនេះដោយលោកបានហៅក្រុមប្រឹក្សានេះថាជា «ការអនុវត្តនូវភាពមិនស្មោះត្រង់ដ៏គួរឲ្យអៀនខ្មាសមួយ»។
លោក Stephane Dujarric អ្នកនាំពាក្យរបស់អគ្គលេខាធិការអង្គការសហប្រជាជាតិបានចេញសេចក្ដីប្រកាសតបមួយ ដោយបញ្ជាក់យ៉ាងដូច្នេះថា៖ «អគ្គលេខាធិការអង្គការសហប្រជាជាតិចង់ឲ្យសហរដ្ឋអាមេរិកនៅតែស្ថិតនៅក្នុងក្រុមប្រឹក្សាសិទ្ធិមនុស្សអង្គការសហប្រជាជាតិដដែល។
រចនាសម្ព័ន្ធផ្នែកសិទ្ធិមនុស្សរបស់អង្គការសហប្រជាជាតិដើរតួយ៉ាងសំខាន់មួយនៅក្នុងការលើកកម្ពស់ និងការពារសិទ្ធិមនុស្សនៅទូទាំងពិភពលោក»៕
