ភ្ជាប់​ទៅ​គេហទំព័រ​ទាក់ទង

ព័ត៌មាន​​ថ្មី

ចៅក្រម​សហព័ន្ធ​អាមេរិក​រារាំង​គោល​នយោបាយ​ដែល​បង្ខំ​អ្នក​សុំ​សិទ្ធិ​ជ្រកកោន​ឲ្យ​ស្នាក់​នៅ​ប្រទេស​ម៉ិកស៊ិក


រថយន្ត​នានា​តម្រង់​ជួរ​គ្នា​ដើម្បី​ឲ្យ​មន្ត្រី​ត្បាត​ព្រំដែន​របស់​អាមេរិក​ពិនិត្យ​ដើម្បី​ចូល​ទៅ​ក្នុង​ដែនដី​អាមេរិក កាលពី​ថ្ងៃទី៣ ខែមេសា ឆ្នា២០១៩។
រថយន្ត​នានា​តម្រង់​ជួរ​គ្នា​ដើម្បី​ឲ្យ​មន្ត្រី​ត្បាត​ព្រំដែន​របស់​អាមេរិក​ពិនិត្យ​ដើម្បី​ចូល​ទៅ​ក្នុង​ដែនដី​អាមេរិក កាលពី​ថ្ងៃទី៣ ខែមេសា ឆ្នា២០១៩។

ចៅក្រម​សហព័ន្ធ​សហរដ្ឋ​អាមេរិក​មួយ​រូប​បាន​រារាំង​គោល​នយោបាយ​របស់​រដ្ឋបាល​លោក​ប្រធានាធិបតី Donald Trump ដែល​តម្រូវ​ឲ្យ​អ្នក​សុំ​សិទ្ធិ​ជ្រក​កោន​នៅ​បន្ត​នៅ​ប្រទេស​ម៉ិកស៊ិក ឬ​ក៏​ត្រូវ​ត្រឡប់​ទៅ​ប្រទេស​ម៉ិកស៊ិក​វិញ នៅ​ពេល​ដែល​ពាក្យ​សុំ​សិទ្ធិ​ជ្រក​កោន​របស់​ពួកគេ​កំពុង​ដំណើរការ។

លោក Richard Seeborg ចៅក្រម​តុលាការ​ស្រុក​មួយ​នៅ​ក្នុង​រដ្ឋ California បាន​សម្រេច​ដូច្នេះ​មួយ​ថ្ងៃ​ក្រោយ​មក បន្ទាប់ពី​រដ្ឋមន្ត្រី​ក្រសួង​សន្តិសុខ​មាតុភូមិ​អ្នកស្រី Kirstjen Nielsen សម្រេច​លាលែង​ពី​តំណែង។

ការ​សម្រេច​នេះ​នឹង​ចូល​ជា​ធរមាន ​នៅ​ថ្ងៃ​សុក្រ​ខាង​មុខ​នេះ ដោយ​ទុក​ពេល​ឲ្យ​រដ្ឋបាល​របស់​លោក Trump អាច​ប្ដឹង​ឧទ្ធរណ៍​បាន។

កម្មវិធី​ពិធីការ​ការពារ​ជន​ចំណាក​ស្រុក ដែល​គេ​ស្គាល់​មិន​ផ្លូវការ​ថា​ជា​កម្មវិធី​ឲ្យ​ជន​ចំណាក​ស្រុក «នៅ​បន្ត​នៅ​ប្រទេស​ម៉ិកស៊ិក» នេះ ត្រូវ​បាន​ដាក់​ឲ្យ​អនុវត្ត​ កាល​ពី​ខែ​មករា​ នៅ​ឯ​កំពង់ផែ San Ysidro ក្នុង​រដ្ឋ California និង​បាន​ពង្រីក​ទៅ​ដល់​ច្រក​ព្រំដែន​ទីក្រុង Calexico រដ្ឋ California និង​ទីក្រុង El Paso រដ្ឋ Texas។ កាល​ពី​ពេល​ថ្មីៗ​នេះ អ្នកស្រី Nielsen បាន​បញ្ជា​ឲ្យ​ប្រើ​កម្មវិធី​នេះ​នៅ​តាម​ច្រក​ព្រំដែន​ផ្សេងៗ​ទៀត។

សេចក្ដី​សម្រេច​របស់​តុលាការ​បាន​បញ្ជាក់​ថា គោល​នយោបាយ​នេះ​ខ្វះ​ការ​ការពារ​គ្រប់គ្រាន់​ដើម្បី​ធានា​ថា ជន​ចំណាក​ស្រុក​មិន​ប្រឈម​នឹង «ហានិភ័យ​ធ្ងន់ធ្ងរ​ចំពោះ​ជីវិត​របស់​ពួកគេ ឬ​ក៏​សេរីភាព​របស់​ពួកគេ»។

រដ្ឋបាល​របស់​លោក Trump បាន​ការពារ​គោល​នយោបាយ​នេះ ដោយ​បាន​បញ្ជាក់​ថា វា​ជា​ការ​ឆ្លើយតប​ចំពោះ​វិបត្តិ​នៅ​ព្រំដែន​ភាគ​ខាង​ត្បូង​សហរដ្ឋ​អាមេរិក ដែល​វា​ធំ​ហួស​ពី​សមត្ថភាព​របស់​មន្ត្រី​អន្តោប្រវេសន៍​នៅ​ក្នុង​ការ​រារាំង​ជន​ចំណាក​ស្រុក៕

XS
SM
MD
LG