ប្រធានាធិបតីសហរដ្ឋអាមេរិកលោក Donald Trump បានចាប់ផ្ដើមធ្វើការពិភាក្សាការទូតបន្ទាន់មួយជាមួយនឹងប្រទេសជប៉ុន និងកូរ៉េខាងត្បូង អំពីការបាញ់សាកល្បងគ្រាប់ផ្លោងមីស៊ីលឆ្លងទ្វីបរបស់ប្រទេសកូរ៉េខាងជើង។
លោក Trump បាននិយាយតាមទូរស័ព្ទជាមួយនឹងនាយករដ្ឋមន្ត្រីជប៉ុនលោក Shinzo Abe អស់រយៈពេលជិត ១ ម៉ោង នៅព្រឹកថ្ងៃចន្ទនេះ ម៉ោងនៅក្នុងទីក្រុងតូក្យូ។
សេចក្ដីប្រកាសរបស់សេតវិមានបានបញ្ជាក់ថា លោក Trump និងលោក Abe បានឯកភាពគ្នាថា កូរ៉េខាងជើងបង្កការគំរាមកំហែងដ៏ធំ និងដោយផ្ទាល់ កាន់តែកើនឡើងបន្ថែមទៀតចំពោះសហរដ្ឋអាមេរិក ជប៉ុន កូរ៉េខាងត្បូង និងបណ្ដាប្រទេសផ្សេងៗទៀត។ សេចក្ដីប្រកាសនោះក៏បានបន្ថែមទៀតថា លោក Trump និងលោក Abe ប្ដេជ្ញានឹងដាក់បង្កើនការដាក់សម្ពាធការទូត និងសេដ្ឋកិច្ចបន្ថែមទៀតលើប្រទេសកូរ៉េខាងជើង។
លោក Abe បានប្រាប់អ្នកសារព័ត៌មានថា លោក និងលោក Trump បានឯកភាពគ្នាទាំងស្រុងថាត្រូវតែចាត់វិធានការបន្ថែមទៀតប្រឆាំងនឹងកូរ៉េខាងជើង។
លោក Abe បាននិយាយថា ប្រទេសជប៉ុន និងសហរដ្ឋអាមេរិក នឹងជំរុញឲ្យចាត់វិធានការម៉ឺងម៉ាត់ ដើម្បីពង្រឹងប្រព័ន្ធការពារ និងធានាសុវត្ថិភាពចំពោះប្រជាពលរដ្ឋពីការគំរាមកំហែងរបស់កូរ៉េខាងជើង។
លោកប្រធានាធិបតី Trump ក៏បានព្យាយាមទាក់ទងប្រធានាធិបតីកូរ៉េខាងត្បូងលោក Moon Jae In ដែលកំពុងឈប់សម្រាកលំហែកាយ ផងដែរ។ នេះបើតាមការបញ្ជាក់របស់មន្ត្រីរដ្ឋាភិបាលអាមេរិក៕
