រដ្ឋមន្រ្តីការបរទេសអាមេរិក លោក Mike Pompeo បានប្រាប់វីអូអេថា គំនិតផ្តួចផ្តើមថ្មីមួយរបស់សហរដ្ឋអាមេរិក នៅក្នុងតំបន់ឥណ្ឌូប៉ាស៊ីហ្វិក របស់រដ្ឋបាលលោក ដូណាល់ ត្រាំ មានបំណងធ្វើឲ្យមានតុល្យភាព ជាមួយនឹងគំនិតផ្តួចផ្តើម «ខ្សែក្រវ៉ាត់ និងផ្លូវ» របស់ប្រទេសចិន។
លោក Pompeo នឹងធ្វើទស្សនៈកិច្ចនៅប្រទេសម៉ាឡេស៊ី សិង្ហបុរី និងឥណ្ឌូនេស៊ីដែលស្ថិតតំបន់អាស៊ីអាគ្នេយ៍នាសប្តាហ៍នេះ។
នៅក្នុងកិច្ចសម្ភាសន៍តាមទូរស័ព្ទជាមួយនឹង វីអូអេ កាលពីថ្ងៃ អង្គារ៍ ទី៣១ ខែកក្កដា ឆ្នាំ២០១៨ លោក Pompeo បាននិយាយ ថា សហរដ្ឋអាមេរិកកំពុងតែវិនិយោគ ១១៣ លានដុល្លាសហរដ្ឋអាមេរិក លើវិស័យបច្ចេកវិទ្យា ថាមពល និងហេដ្ឋារចនាសម័្ពន្ធនៅក្នុងតំបន់ឥណ្ឌូប៉ាស៊ីហ្វិក។
លោក Pompeo ធ្លាប់ជានាយកនៃទីភ្នាក់ងា CIA ។ លោកក៏ធ្លាប់ជាតំណាងរាស្រ្តមកពីរដ្ឋKansas ផងដែរ។
លោក Pompeo បានប្រាប់វីអូអេតាមទូរស័ព្ទថា៖ «បើមិនមានគំនិតផ្តួចផ្តើម ខ្សែក្រវ៉ាត់ និងផ្លូវ របស់ប្រទេសចិនទេ យើងនឹងមិនបានឃើញសហរដ្ឋអាមេរិកអនុវត្តគំនិតផ្តួចផ្តើមមួយនេះឡើយ។ ដូចច្នេះខ្ញុំគិតថា វាពិតជាមានជាប់ពាក់ព័ន្ធ និងដើម្បីជាការឆ្លើយតបចំពោះអ្វីដែលប្រទេសចិនកំពុងតែធ្វើនៅក្នុងទ្វីបអាស៊ីបច្ចុប្បន្ននេះ»។
លោក Pompeo បានរិៈគន់គំនិតផ្តួចផ្តើម ខ្សែក្រវ៉ាត់ និងផ្លូវ របស់ប្រទេសចិនថា មានផលមិនល្អ និងមិនមានទស្សនៈវែងឆ្ងាយ។ គំនិតផ្តួចផ្តើមរបស់សហរដ្ឋអាមេរិកដែលមានទឹកប្រាក់១១៣លានដុល្លា មានបំណងបង្ហាញពីគំរូល្អនៃអភិបាលកិច្ច និងប្រតិបត្តិការពាណិជ្ជកម្ម និងធ្វើឲ្យមានតុល្យភាពលើការពង្រីកអំណាចរបស់ប្រទេសចិននៅក្នុងតំបន់។
លោកបានបន្តថា៖ «គំនិតផ្តួចផ្តើមនេះ គឺចង់សំដៅទៅលើប្រទេសចិន។ គំនិតផ្តួចផ្តើមនេះបង្ហាញឲ្យពីអន្ទាក់បំណុលរបស់ចិននៅជុំវិញតំបន់អាស៊ីប៉ាស៊ីហ្វិក។ ឧទាហរណ៍ដ៏សំខាន់មួយប្រហែលជាកំពង់ផែ ហាំបានតូតា នៅក្នុងប្រទេសស្រីសង្កា ដែលប្រទេសចិនបានដាក់អន្ទាក់ប្រទេសស្រីលង្កាដោយមានប្រសិទ្ធភាព នៅក្នុងកិច្ចពិភាក្សាជាបន្តបន្ទាប់ ដែលបង្ហាញថាមានមធ្យោបាយតែមួយគត់ដែលអាចដោះបំណុលបាន គឺបម្លែងបំណុល ទៅជាភាគហ៊ុនសម្រាប់ប្រទេសចិន ដែលអនុញ្ញាតឲ្យចិនក្លាយជាម្ចាស់ដោយមានប្រសិទ្ធិភាព»។
