សហរដ្ឋអាមេរិកបានដាក់ទណ្ឌកម្មលើអង្គភាព២របស់កូរ៉េខាងជើងចំពោះការនាំចេញកម្លាំងពលរដ្ឋដែលជាការរំលោភការដាក់ទណ្ឌកម្មរបស់អង្គការសហប្រជាជាតិ។
សេចក្តីថ្លែងការណ៍របស់ក្រសួងរតនាគារសហរដ្ឋអាមេរិកបានចេញផ្សាយកាលពីថ្ងៃអង្គារកំណត់អត្តសញ្ញាណអង្គភាពទាំងនោះគឺ ក្រុមហ៊ុន Korea Namgang Trading Corp និង Beijing Sukbakso។
សេចក្តីថ្លែងការណ៍នោះបានប្រាប់ឲ្យដឹងថា «រដ្ឋាភិបាលកូរ៉េខាងជើង បន្តប្រើការនាំចេញកម្លាំងពលកម្មកូរ៉េខាងជើងខុសច្បាប់ដើម្បីរកប្រាក់ចំណូលនៅបរទេសដែលជាការផ្ទុយទៅនឹងការដាក់ទណ្ឌកម្មរបស់អង្គការសហប្រជាជាតិ។ចំណាត់ការនៅថ្ងៃនេះ ដៅលើក្រុមហ៊ុនពាណិជ្ជកម្មកូរ៉េខាងជើងនិងក្រុមហ៊ុនកូរ៉េខាងជើងដែលមានទីតាំងក្នុងប្រទេសចិន ដែលសម្របសម្រួលការបញ្ជូនកម្មកររបស់កូរ៉េខាងជើងទៅបរទេស»។
ក្រោមសេចក្តីសម្រេចរបស់អង្គការសហប្រជាជាតិ ដែលបានអនុម័តនៅឆ្នាំ២០១៧ ប្រទេសទាំងអស់ មានពេលរហូតដល់ថ្ងៃទី២២ ខែធ្នូ ឆ្នាំ២០១៩ ដើម្បីបញ្ជូនកម្មករទាំងអស់មកពីប្រទេសកូរ៉េខាងជើងចេញពីប្រទេសរបស់ខ្លួន។
ក្រុមអង្គការសិទ្ធិមនុស្សជារឿយៗបានចោទប្រកាន់កូរ៉េខាងជើងពីការបញ្ជូនពលរដ្ឋរបស់ខ្លួនទៅបរទេសដើម្បីធ្វើការដោយបង្ខំដើម្បីទ្រទ្រង់សេដ្ឋកិច្ចរបស់ខ្លួន ដោយប្រាក់ខែភាគច្រើនរបស់ពួកកម្មករធ្លាក់ចូលក្នុងកណ្តាប់ដៃរដ្ឋាភិបាល។ កូរ៉េខាងជើង ត្រូវបានគេដឹងឮថា បានរំលោភច្បាប់ពលកម្មអន្តរជាតិ នៅពេលដែលបញ្ជូនកម្មករទៅបរទេស ដោយបានដាក់ពួកគេឲ្យធ្វើការនៅក្នុងស្ថានភាពដ៏យ៉ាប់យ៉ឺន។
លោក Steve Mnuchin រដ្ឋមន្រ្តីរតនាគារអាមេរិកនិយាយថា «ការនាំចេញកម្មកររបស់កូរ៉េខាងជើង រកប្រាក់ចំណូលខុសច្បាប់សម្រាប់រដ្ឋាភិបាលកូរ៉េខាងជើងដែលជាការរំលោភការដាក់ទណ្ឌកម្មរបស់អង្គការសហប្រជាជាតិ»៕
