ប្រធានាធិបតីសហរដ្ឋអាមេរិកលោក Donald Trump បាននិយាយកាលពីថ្ងៃអង្គារម្សិលមិញថា មេដឹកនាំកូរ៉េខាងជើងលោក Kim Jong Un ប្រហែលជាត្រៀមរៀបចំ «កាដូដ៏ល្អមួយ» សម្រាប់លោក ដូចជា «ថូដ៏ស្រស់ស្អាត» ជាដើម សម្រាប់ថ្ងៃបុណ្យ Christmas ជាជាងការបាញ់សាកល្បងមីស៊ីល។ នេះបើយោងតាមសេចក្ដីរាយការណ៍របស់សារព័ត៌មាន AP។
លោក Trump ឆ្លើយដូច្នេះ នៅពេលដែលគេសួរលោកថាតើលោកនឹងធ្វើអ្វី ប្រសិនបើប្រទេសកូរ៉េខាងជើងធ្វើការសាកល្បងមីស៊ីលដែលហោះបានចម្ងាយឆ្ងាយ។
កូរ៉េខាងជើងបានគំរាមចាត់វិធានការ ប្រសិនបើទណ្ឌកម្មមិនត្រូវបានបន្ធូរបន្ថយនៅត្រឹមចុងឆ្នាំនេះ។ បន្ទាប់ពីនេះមក គេមានការសង្ស័យថាកូរ៉េខាងជើងអាចធ្វើការសាកល្បងមីស៊ីលថ្មី ដែលអាចជាគ្រាប់ផ្លោងមីស៊ីលឆ្លងទ្វីបដែលអាចមានសមត្ថភាពបំពាក់ក្បាលគ្រាប់នុយក្លេអ៊ែរបាន។
កន្លងមក កូរ៉េខាងជើងបានបញ្ជាក់ថា «កាដូថ្ងៃ Christmas» របស់ខ្លួនសម្រាប់សហរដ្ឋអាមេរិកគឺនឹងអាស្រ័យលើសកម្មភាពរបស់រដ្ឋាភិបាលក្រុងវ៉ាស៊ីនតោន។
លោក Trump ដែលកំពុងស្ថិតនៅក្នុងរដ្ឋ Florida សម្រាប់ថ្ងៃឈប់សម្រាក បានឆ្លើយនឹងសំណួរដែលគេសួរអំពីកូរ៉េខាងជើងថា លោកនឹងប្រើវិធីសាស្ត្ររង់ចាំមើល។
លោកនិយាយដូច្នេះថា៖ «លោក [Kim Jong Un] ប្រហែលជាផ្ញើថូដ៏ស្រស់ស្អាតមួយជាកាដូសម្រាប់ខ្ញុំ ជាជាងសាកល្បងមីស៊ីល។ ខ្ញុំប្រហែលជាទទួលបានកាដូដ៏ល្អពីលោក។ យើងមិនអាចដឹងនោះទេ»។
ការចរចានុយក្លេអ៊ែររវាងសហរដ្ឋអាមេរិក និងកូរ៉េខាងជើងបានជាប់គាំងតាំងពីកិច្ចប្រជុំរវាងលោក Trump និងលោក Kim Jong Un នៅក្នុងទីក្រុងហាណូយ ប្រទេសវៀតណាម កាលពីខែកុម្ភៈបានបរាជ័យមក៕
