ក្រោយពីមានប្រតិកម្មអមិត្តអន្តរជាតិជាច្រើនមក លោកប្រធានាធិបតី Donald Trump បានចុះហត្ថលេខាលើបទបញ្ជានីតិប្រតិបត្តិមួយកាលពីថ្ងៃពុធដើម្បីបញ្ឈប់គោលនយោបាយចម្រូងចម្រាស់មួយដែលបំបែកពួកកុមារចំណាកស្រុកពីឪពុកម្តាយពួកគេដែលបានឆ្លងកាត់ព្រំដែនដោយខុសច្បាប់ពីប្រទេសម៉ិកស៊ិក ចូលមកក្នុងស.រ.អា.។
បទបញ្ជានីតិប្រតិបត្តិនេះដែលលោក Trump បានចុះហត្ថលេខាបានអំពាវនាវដល់លោករដ្ឋមន្ត្រីការពារប្រទេសស.រ.អា. James Mattis ឱ្យ «ចាត់វិធានការត្រឹមត្រូវតាមច្បាប់ទាំងអស់ដែលមាន» ដើម្បីផ្តល់ទីស្នាក់អាស្រ័យដល់ជនអន្តោប្រវេសន៍នៅកន្លែងដែលមានស្រាប់ឬកសាងកន្លែងស្នាក់អាស្រ័យថ្មីប្រសិនបើជាការចាំបាច់។
ប្រតិកម្មដល់បទបញ្ជារបស់លោក Trump មានច្រើនហើយមានភាពចម្រុះផងដែរ ដោយពួកមន្ត្រីខ្លះនិយាយថាបទបញ្ជានីតិប្រតិបត្តិនេះនៅតែមិនអាចដោះស្រាយបញ្ហានេះបានទេ។
លោកស្រី Nancy Pelosi ប្រធានក្រុមភាគតិចនៅក្នុងសភាតំណាងរាស្ត្រអាមេរិកាំងបានមានប្រសាសន៍ថា៖
«បទបញ្ជានីតិប្រតិបត្តិរបស់លោកប្រធានាធិបតីស្វះស្វែងជំនួសទម្រង់មួយនៃការរំលោភលើកុមារជាមួយនឹងទម្រង់មួយទៀតនៃការរំលោភនេះ។ ជាជាងការពារក្រុមកុមារដែលមានការតក់ស្លុត លោកប្រធានាធិបតីបានបញ្ជារដ្ឋមន្ត្រីយុត្តិធ៌មលោកឱ្យបើកផ្លូវឱ្យមានការឃុំឃាំងយូរនូវគ្រួសារពួកជនចំណាកស្រុកក្នុងស្ថានភាពដូចជាគុក»៕
