ភ្ជាប់​ទៅ​គេហទំព័រ​ទាក់ទង

ព័ត៌មាន​​ថ្មី

កិច្ច​ខិតខំ​ប្រឹង​ប្រែង​ស្តារ​ដំណើរ​ការ​នយោបាយ​អសកម្ម​ក្នុង​ប្រទេស​ស៊ីរី​កំពុង​ចាប់ផ្តើម


ក្មេងៗ​ភៀស​ខ្លួន​ស៊ីរី​លេង​នៅ​ជំរំ​ជន​ភៀស​ខ្លួន ដែល​ស្ថិត​នៅ​ចន្លោះ​ផ្ទះ និង​អគារ​នានា​នៅ​ក្នុង​ក្រុង Arsal ភាគ​ខាង​កើត​នៃ​ប្រទេស​លីបង់ ជាប់​នឹង​ព្រំដែន​ស៊ីរី​ កាលពី​ថ្ងៃទី១៣ ខែមិថុនា ឆ្នាំ២០១៨។

ប្រេសិត​ពិសេស​អង្គការ​សហ​ប្រជាជាតិ​​ប្រចាំ​ប្រទេស​ស៊ីរី​និយាយ​ថា​ គេ​បាន​ចាប់ផ្តើម​ធ្វើ​កិច្ចការ​​​ដើម្បី​បង្កើត​គណៈ​កម្មការមួយ​ដែល​មាន​គោល​បំណង​បង្កើត​រដ្ឋធម្មនុញ្ញ​ថ្មី​​សម្រាប់​ប្រទេស​ស៊ីរី​នៅ​ពេល​​ប្រទេស​មួយ​នេះ​ងើប​ផុត​ពី​សង្គ្រាម។

ករណី​រដ្ឋធម្មនុញ្ញ​របស់​ប្រទេស​ស៊ីរីគឺ​ជា​ដើមហេតុ​ចម្បង​នៃ​ទំនាស់​រវាង​ភាគី​ពាក់ព័ន្ធ​ទាំង​អស់​ក្នុង​ប្រទេស​ដែល​ហែក​ហួរ​ដោយ​សង្គ្រាម​មួយ​នេះ។ អង្គការ​សហ​ប្រជា​ជាតិ​ចង់​ឃើញ​រដ្ឋាភិបាល​ក្រុម​ប្រឆាំង​និង​សមាជិក​នៃ​អង្គការ​សង្គម​ស៊ីវិល​ទាំង​អស់ ​ធ្វើ​សេចក្តី​ព្រាង​ច្បាប់​ធម្មនុញ្ញ​ថ្មី​មួយ។

ក្រុម​ប្រឆាំង​បាន​ឯកភាព​យល់​ព្រម​លើ​ជំហរ​បង្កើត​រដ្ឋធម្មនុញ្ញ​ថ្មី​នេះ ​ប៉ុន្តែ​រដ្ឋាភិបាល​របស់​លោក​ប្រធានាធិបតី ​Bashar Assad ​យល់​ព្រម​ឲ្យ​មាន​ត្រឹម​តែ​ការ​ធ្វើ​វិសោធន​កម្ម​លើ​រដ្ឋធម្មនុញ្ញ​ដែល​មាន​ស្រាប់​តែ​ប៉ុណ្ណោះ។

លោក​ Staffan de Mistura ដែល​ប្រេសិត​អ.ស.ប.​ប្រចាំ​ប្រទេស​ស៊ីរី​បាន​រាយការណ៍​ថា​ មាន​វឌ្ឍន​ភាព​តិច​តួច​ប៉ុណ្ណោះ​ ចំពោះ​ការ​បង្កើត​រដ្ឋធម្មនុញ្ញ​ថ្មី​នេះ។លោក​បាន​និយាយ​ថា​ រដ្ឋាភិបាល​ប្រទេស​ស៊ីរី​បាន​ផ្ញើ​បញ្ជី​ឈ្មោះ​បុគ្គល​៥០​រូប​ ដែល​រដ្ឋាភិបាល​បាន​ជ្រើស​រើស​ឲ្យ​ធ្វើ​ជា​គណៈ​កម្មការ​រដ្ឋធម្មនុញ្ញ​នេះហើយក្រុម​ប្រឆាំង​ក៏​កំពុង​រៀប​ចំ​បញ្ជី​ឈ្មោះរបស់​ពួក​គេ​ផង​ដែរ។

លោក ​Staffan de Mistura បាន​បញ្ជាក់​ថា៖

«ខណៈ​ពេល​ដែល​យើង​បន្ត​ធ្វើការ​តាម​ក្បួន​ខ្នាត​និង​ដោយ​ប្រុង​ប្រយ័ត្ន​ ដើម្បី​សម្រប​សម្រួល​ដល់​ការ​បង្កើត​គណៈ​កម្មការ​រដ្ឋធម្មនុញ្ញ​ដែល​ដឹក​នាំ​និង​បង្កើត​ដោយជន​ជាតិ​ស៊ីរី​នោះ​យើង​ក៏​ចាំ​ថា​ការ​បង្កើត​រដ្ឋធម្មនុញ្ញ​ថ្មី​នេះ​គឺ​ជា​ជំហានដ៏​សំខាន់​មួយ​ក្នុង​ការ​ធ្វើ​ឲ្យ​ដំណើរ​ការនយោបាយ​ប្រសើរ​ឡើង​វិញ។ ប៉ុន្តែ​និយាយ​ឱ្យ​ត្រង់​ទៅ​ចុះ​ខ្ញុំ​មិន​រំពឹង​ថា​នឹង​មាន​ភាព​រីក​ចម្រើន​អស្ចារ្យ​ពេក​នោះ​ទេ។ យ៉ាង​ណា​ក៏​ដោយ​ខ្ញុំ​មាន​ជំនឿ​ជាក់​ថា ភាព​រីក​ចម្រើន​ខ្លះអាច​កើត​មាន​ឡើង»។

លោក Staffan​ De Mistura បាន​អញ្ជើញ​មន្ត្រី​ជាន់​ខ្ពស់​អ៊ីរ៉ង់​រុស្ស៊ី​និង​តួកគី​មក​កាន់​ទី​ក្រុង​ហ្សឺណែវ​ដើម្បី​ពិគ្រោះ​ប្រឹក្សា​អំពី​យុទ្ធសាស្ត្រ​ជំរុញ​ឲ្យ​ដំណើរ​ការ​បង្កើត​គណៈ​កម្មការ​រដ្ឋធម្មនុញ្ញនេះ​ឆ្ពោះ​ទៅ​មុខ។

លោក​ក៏​បាន​បញ្ជាក់​ដែរថា​លោក​បាន​អញ្ជើញ​ប្រទេស​មួយ​ក្រុម​តូច​ដូចជា ​បារាំង​ អាល្លឺម៉ង់​ ហ្ស៊កដានី​ អារ៉ាប៊ីសាអូឌីត ចក្រភព​អង់គ្លេស​និង​សហរដ្ឋ​អាមេរិក​ មក​ទីក្រុង​ហ្សឺណែវនៅ​សប្ដាហ៍​បន្ទាប់ ក្រោយពី​ជំនួប​នេះដើម្បី​បញ្ចេញមតិ​យោបល់​លើ​បញ្ហា​រដ្ឋ​ធម្មនុញ្ញ​ប្រទេស​ស៊ីរី​នេះ។ លោក​បាន​ថ្លែង​ថា​សហរដ្ឋ​អាមេរិក​បាន​បញ្ជាក់​ថា​ខ្លួន​នឹង​មាន​វត្តមានសម្រាប់​ថ្ងៃ​២៥ខែ​មិថុនា ហើយ​សង្ឃឹម​ថា​នឹង​រៀប​ចំ​កិច្ច​ប្រជុំ​នៅ​ថ្ងៃ​ដដែល​នេះ​តែ​ម្តង។

សង្គ្រាម​ស៊ីវិល​នៅ​ប្រទេស​ស៊ីរី​ ដែល​គិត​មក​ដល់​ពេល​នេះ​មាន​រយៈ​កាល​៨​ឆ្នាំ​ហើយ​នោះ​ ​បាន​ធ្វើ​ឲ្យ​ប្រជាជន​ជាង​១១​លាន​នាក់ ផ្លាស់​ទី​ជម្រក៕

ប្រែ​សម្រួល​ដោយ កោះ សុគន្ធី

សេចក្តីរាយការណ៍ពិសេស

  • VOA Khmer Special Report Section

    សេចក្តីរាយការណ៍ពិសេស

XS
SM
MD
LG