សមាជិករដ្ឋសភាសហរដ្ឋអាមេរិកនឹងជួបគ្នាម្ដងទៀតនៅថ្ងៃពុធនេះដើម្បីជ្រើសរើសប្រធានរដ្ឋសភាថ្មី។ ការជួបគ្នានេះនឹងធ្វើឡើងក្នុងពេលមួយថ្ងៃក្រោយមកបន្ទាប់ពីកិច្ចប្រឹងប្រែងរបស់សមាជិករដ្ឋសភាខាងគណបក្សសាធារណរដ្ឋលោក Kevin McCarthy នៅក្នុងការកាន់តំណែងជាប្រធានរដ្ឋសភានេះបានរងការប្រឆាំងដ៏កម្រនៅក្នុងការបោះឆ្នោតជាបន្តបន្ទាប់កន្លងមកពីសមាជិករដ្ឋសភាអភិរក្សនិយមបំផុតក្នុងជួរគណបក្សរបស់លោក។
សម័យប្រជុំរបស់រដ្ឋសភាអាមេរិកកាលពីថ្ងៃអង្គារគឺជាសម័យប្រជុំលើកដំបូងបង្អស់ក្នុងរយៈពេល ១០០ ឆ្នាំចុងក្រោយនេះ ដែលគ្មានសមាជិកគណបក្សណាមួយទាំងគណបក្សសាធារណរដ្ឋនិងគណបក្សប្រជាធិបតេយ្យឈ្នះបានតំណែងជាប្រធានរដ្ឋសភាដែលមានសមាជិកចំនួន ៤៣៥ នាក់នេះនៅក្នុងការបោះឆ្នោតលើកទីមួយ។
លោក McCarthy បានបរាជ័យនៅក្នុងការឈ្នះបានតំណែងជាប្រធានរដ្ឋសភានៅក្នុងការបោះឆ្នោត ៣ លើកកន្លងមក ដោយនៅក្នុងការបោះឆ្នោតលើកចុងក្រោយ សមាជិករដ្ឋសភាខាងគណបក្សសាធារណរដ្ឋចំនួន ២០ នាក់បានបោះឆ្នោតប្រឆាំងនឹងលោក។
ដោយការបោះឆ្នោតលើកទី ៤ ជិតធ្វើឡើង គេនៅមិនច្បាស់ទេថាតើអ្នកដែលប្រឆាំងនឹងលោក McCarthy នៅក្នុងការបោះឆ្នោតកន្លងមកអាចងាកមកគាំទ្រលោកវិញ ឬក៏ថាតើមានបេក្ខជនថ្មីណាមួយដែលលេចឡើងសម្រាប់តំណែងជាប្រធានរដ្ឋសភានេះ។
គណបក្សសាធារណរដ្ឋនឹងកាន់កាប់អាសនៈចំនួន ២២២ ទល់នឹង ២១២ នៅក្នុងរដ្ឋសភា ដោយមានតំណែងមួយនៅទំនេរដែលតម្រូវឱ្យលោក McCarthy ដែលជាសមាជិករដ្ឋសភាតំណាងរដ្ឋ California អស់រយៈពេល ១៦ ឆ្នាំកន្លងមក ឈ្នះយ៉ាងតិចចំនួន ២១៨ សំឡេងដើម្បីបានធ្វើជាប្រធានរដ្ឋសភា។ នៅក្រោមលក្ខខណ្ឌដែលចែងក្នុងរដ្ឋធម្មនុញ្ញសហរដ្ឋអាមេរិក លោក McCarthy នឹងក្លាយជាបុគ្គលនៅលំដាប់ទីពីរដែលអាចស្នងតំណែងប្រធានាធិបតីសហរដ្ឋអាមេរិកបាន ប្រសិនបើលោកបានកាន់តំណែងជាប្រធានរដ្ឋសភា។
ប៉ុន្តែ សមាជិករដ្ឋសភាខាងគណបក្សសាធារណរដ្ឋចំនួន ១៩ រូប ដែលភាគច្រើនបានបង្ហាញទស្សនៈក្នុងពេលប៉ុន្មានសប្ដាហ៍ថ្មីៗនេះថាលោក McCarthy មិនប្រកាន់ទស្សនៈអភិរក្សនិយមគ្រប់គ្រាន់ដើម្បីដឹកនាំគណបក្សសាធារណរដ្ឋនៅរដ្ឋសភា បានបោះឆ្នោតនៅក្នុងការបោះឆ្នោតលើកទីមួយឱ្យសមាជិកគណបក្សសាធារណរដ្ឋផ្សេងទៀតដូចជាលោក Andy Biggs តំណាងរដ្ឋ Arizona និងលោក Jim Jordan តំណាងរដ្ឋ Ohio ជាដើម ដែលលោកទាំងពីរជាអ្នកប្រឆាំងមិនសំចៃមាត់ចំពោះលោកប្រធានាធិបតី Joe Biden ខាងគណបក្សប្រជាធិបតេយ្យ។
នៅក្នុងការបោះឆ្នោតលើកទី ៣ សមាជិកគណបក្សសាធារណរដ្ឋ ២០ នាក់បានបោះឆ្នោតឱ្យលោក Jordan បើទោះបីជាលោកខ្លួនឯងផ្ទាល់ជាអ្នកជ្រើសរើសលោក McCarthy ឱ្យធ្វើជាប្រធានក្រុមគណបក្សសាធារណរដ្ឋនៅនីតិកាលរដ្ឋសភាថ្មីរយៈពេល ២ ឆ្នាំខាងមុខនេះក៏ដោយ។
សមាជិកសភាខាងគណបក្សប្រជាធិបតេយ្យតំណាងរដ្ឋ New York លោក Hakeem Jeffries បានឈ្នះសំឡេងគាំទ្រទាំង ២១២ ខាងគណបក្សប្រជាធិបតេយ្យនៅក្នុងការបោះឆ្នោត ដោយធ្វើឱ្យលោកនាំមុខនៅក្នុងការកាន់តំណែងជាប្រធានរដ្ឋសភានេះ បើទោះបីជាលោកគ្មានឱកាសថានឹងឈ្នះក៏ដោយ ដោយសារតែគ្មានសមាជិកគណបក្សសាធារណរដ្ឋណាម្នាក់មានគម្រោងបោះឆ្នោតគាំទ្រលោក។
នៅក្នុងការបោះឆ្នោតលើកចុងក្រោយ សមាជិកគណបក្សសាធារណរដ្ឋចំនួន ២០២ នាក់បានបោះឆ្នោតឱ្យលោក McCarthy ដោយធ្វើឱ្យលោកខ្វះសំឡេងគាំទ្រចំនួន ១៦ សំឡេងដើម្បីឱ្យបានសំឡេងគាំទ្រចំនួន ២១៨ ដែលលោកត្រូវការដើម្បីឈ្នះតំណែងជាប្រធានរដ្ឋសភា។
នៅទីបំផុត មិនថាបេក្ខជនរូបណាដែលគណបក្សសាធារណរដ្ឋនឹងជ្រើសរើសឱ្យធ្វើជាប្រធានរដ្ឋសភានោះទេ បេក្ខជនរូបនោះនឹងជំនួសតំណែងរបស់ប្រធានរដ្ឋសភាបច្ចុប្បន្នដែលអស់អាណត្តិគឺអ្នកស្រី Nancy Pelosi ខាងគណបក្សប្រជាធិបតេយ្យ៕
