កាលពីយប់ថ្ងៃពុធម្សិលមិញ រដ្ឋសភាសហរដ្ឋអាមេរិកបានអនុម័តជាផ្លូវការលើការចោទប្រកាន់ដើម្បីទម្លាក់លោកប្រធានាធិបតី Donald Trump ចេញពីតំណែង ក្រោមបទចោទប្រកាន់ថាលោកបានរំលោភអំណាចជាប្រធានាធិបតីដើម្បីប្រយោជន៍ផ្ទាល់ខ្លួនផ្នែកនយោបាយរបស់លោក និងបានរារាំងកិច្ចប្រឹងប្រែងរបស់សភានៅក្នុងការស៊ើបអង្កេតទង្វើរបស់លោក។
គេនៅមិនទាន់ច្បាស់ទេថាតើដំណើរការនេះនឹងត្រូវបញ្ជូនលឿនប៉ុណ្ណាទៅកាន់ព្រឹទ្ធសភាដែលដឹកនាំដោយគណបក្សសាធារណរដ្ឋរបស់លោក Trump សម្រាប់សវនាការមួយដែលទំនងជានឹងកាត់ក្ដីថាលោក Trump គ្មានទោស។
លោក Mitch McConnell មេដឹកនាំគណបក្សសាធារណរដ្ឋនៃព្រឹទ្ធសភាបាននិយាយថា សវនាការកាត់ក្ដីលោក Trump គឺជាអាទិភាពចម្បងនៅខែមករាខាងមុខនេះ។ លោក McConnell បានបន្ថែមថា លោកគ្រោងនឹងថ្លែងអំពីការចោទប្រកាន់ដើម្បីដកតំណែងរបស់លោក Trump នេះនៅឯអង្គប្រជុំព្រឹទ្ធសភានៅព្រឹកថ្ងៃព្រហស្បតិ៍នេះ។
មុនពេលព្រឹទ្ធសភាអាចចាត់វិធានការលើបញ្ហានេះបាន ប្រធានរដ្ឋសភាអ្នកស្រី Nancy Pelosi ត្រូវតែបញ្ជូនបទចោទប្រកាន់លោក Trump ទាំងពីរករណីទៅកាន់ព្រឹទ្ធសភា ប៉ុន្តែបន្ទាប់ពីការបោះឆ្នោតរបស់រដ្ឋសភាពេញអង្គសម្រេចជាផ្លូវការលើការចោទប្រកាន់លោក Trump នេះ បានបញ្ចប់ភ្លាមៗកាលពីយប់ថ្ងៃពុធម្សិលមិញមក អ្នកស្រីមិនបានបញ្ជាក់ឲ្យបានច្បាស់អំពីពេលវេលានៃការបញ្ជូនបទចោទទាំងនេះទៅកាន់ព្រឹទ្ធសភានោះទេ។
អ្នកស្រី Pelosi បានលើកឡើងថា អ្នកស្រីចង់ដឹងបន្ថែមទៀតពីថ្នាក់ដឹកនាំព្រឹទ្ធសភាអំពីថាតើពួកគេគ្រោងនឹងបើកសវនាការលើរឿងនេះតាមវិធីណា មុនពេលដែលរដ្ឋសភាជ្រើសរើសអ្នកដែលនឹងត្រូវធ្វើជារដ្ឋអាជ្ញានោះ។
សេតវិមានបានចេញសេចក្ដីប្រកាសមួយភ្លាមៗបន្ទាប់ពីការបោះឆ្នោតរបស់រដ្ឋសភានេះបានបញ្ចប់ទៅ ដោយហៅវាថាជា «ការចោទប្រកាន់ក្លែងក្លាយ» និងជាចំណុចខ្ពស់បំផុតនៃ «ព្រឹត្តិការណ៍នយោបាយដ៏គួរឲ្យអាម៉ាស់ខ្លាំងបំផុតមួយនៅក្នុងប្រវត្តិសាស្ត្ររបស់សហរដ្ឋអាមេរិក»។
សេចក្ដីប្រកាសនេះបានបន្ថែមថា៖ «លោកប្រធានាធិបតីជឿជាក់ថា ព្រឹទ្ធសភានឹងស្ដារឡើងវិញនូវរបៀបរបបត្រឹមត្រូវតាមច្បាប់ ភាពយុត្តិធម៌ និងនីតិវិធីត្រឹមត្រូវ ដែលចំណុចទាំងអស់នេះមិនត្រូវបានរដ្ឋសភាពិចារណានៅក្នុងដំណើរការរបស់ខ្លួនលើបញ្ហានេះទេ។ លោកប្រធានាធិបតីកំពុងត្រៀមខ្លួនសម្រាប់ជំហានបន្ទាប់ និងមានជំនឿជឿជាក់ថា លោកនឹងត្រូវគេប្រកាសថាគ្មានទោស»៕
