លោក ដូណាល់ ត្រាំ ប្រធានាធិបតីស.រ.អា.បានថ្លែងថ្ងៃបុណ្យជាតិអបអរទិវាយុទ្ធជនកាលពីថ្ងៃសៅរ៍ ដោយនិយាយក្នុងសារតាមវីដេអូថាអតីតយុទ្ធជនគឺជារតនសម្បត្តិជាតិអស្ចារ្យបំផុត។
លោកបានមានប្រសាសន៍ក្នុងវីដេអូបង្ហោះតាម Twitter ថា៖ «នៅទិវាអតីតយុទ្ធជនដ៏អស្ចារ្យនេះ ខ្ញុំសូមបង្ហាញគុណូបការៈដ៏ជ្រាលជ្រៅចំពោះប្រទេសជាតិអាមេរិកាំងទាំងមូល ចំពោះអតីតយុទ្ធជនច្រើនលាននាក់ ដែលបានការពារប្រទេសជាតិរបស់យើងយ៉ាងក្លាហានក្នុងនាមជាយុទ្ធជន ហើយនិងគ្រួសារដែលស្រឡាញ់ និងគាំទ្រមិនងាររេដែលអនុញ្ញាតឲ្យប្តី ប្រពន្ធ កូន ឪពុក ម្តាយដែលជាយុទ្ធជនចេញទៅបម្រើកងទ័ព»។
លោកបន្តថា យើងសូមកោតសរសើរកិច្ចការរបស់លោកអ្នកបម្រើកងទ័ព៖ «យើងសូមគោរពការលះបង់របស់អ្នក និងសូមគោរពទឹកចិត្តស្នេហាជាតិដ៏ជ្រាលជ្រៅរបស់លោកអ្នក និងទឹកចិត្តស្នេហាជាតិ»។ នេះបើតាមការបង្ហោះតាម Twitter ដោយសេតវិមាន។
ប្រសាសន៍របស់លោកប្រធានាធិបតីត្រូវបានផ្សព្វផ្សាយនៅពេលលោកធ្វើដំណើររយៈពេល១២ថ្ងៃនៅប្រទេសអាស៊ីចំនួន៥ ។
លោកអនុប្រធានាធិបតី Mike Pence បានចូលរួមក្នុងពិធីដាក់កម្រងផ្កានៅកន្លែងបញ្ចុះសពទាហាននៅ Arlington Nation Cemetery នៅខាងជើងរដ្ឋធានីវ៉ាស៊ីនតោនដើម្បីគោរពអតីតយុទ្ធជនរបស់អាមេរិក២០លាននាក់៕
