ភ្ជាប់​ទៅ​គេហទំព័រ​ទាក់ទង

ព័ត៌មាន​​ថ្មី

អាមេរិក​ដាក់​ទណ្ឌកម្ម​ចិន​ទាក់ទិន​នឹង​បញ្ហា​ហុងកុង និង​លក់​អាវុធ​ឲ្យ​តៃវ៉ាន់


រូប​ឯកសារ៖ ក្នុង​រូបថត​​ថ្ងៃ​ទី​៤ ខែ​ឧសភា ឆ្នាំ​២០១៩ នេះ ទាហាន​ជើង​ទឹក​តៃវ៉ាន់ សម្តែង​គារវកិច្ច​​ចំពោះ​ប្រធានាធិបតី Tsai Ing-wen ក្នុង​អំឡុង​​សមយុទ្ធ​ប្រឆាំង​ភេរវកម្ម​មួយ។

កាល​ពី​ថ្ងៃ​ចន្ទ​ម្សិលមិញ រដ្ឋបាល​របស់​ប្រធានាធិបតី​សហរដ្ឋ​អាមេរិក​លោក Donald Trump បាន​អនុម័ត​លើ​កិច្ច​ព្រមព្រៀង​ថ្មី​មួយ​ដើម្បី​លក់​អាវុធ​ទៅ​ឲ្យ​កោះ​តៃវ៉ាន់ និង​ដាក់​ទណ្ឌកម្ម​លើ​មន្ត្រី​រដ្ឋាភិបាល​ចិន​ចំពោះ​ការ​បង្រ្កាប​លើ​សកម្មជន​គាំទ្រ​លទ្ធិ​ប្រជាធិបតេយ្យ​ក្នុង​ទីក្រុង​ហុងកុង។

ក្រសួង​ការ​បរទេស​សហរដ្ឋ​អាមេរិក​បាន​ឲ្យ​ដឹង​ថា ខ្លួន​បាន​អនុម័ត​លើ​កិច្ច​ព្រមព្រៀង​លក់​ឧបករណ៍​ទំនាក់ទំនង​យោធា​ទំនើប​ក្នុង​តម្លៃ ២៨០ លាន​ដុល្លារ​អាមេរិក​ទៅ​ឲ្យ​កោះ​តៃវ៉ាន់។

កាល​ពី​ថ្ងៃ​ចន្ទ​ម្សិលមិញ​ផងដែរ ក្រសួង​ការបរទេស និង​ក្រសួង​ហិរញ្ញវត្ថុ​សហរដ្ឋ​អាមេរិក បាន​បញ្ជាក់​ថា ពួកគេ​ដាក់​ទណ្ឌកម្ម​សមាជិក ១៤ នាក់​នៃ​គណៈកម្មាធិកា​អចិន្ត្រៃយ៍​នៃ​រដ្ឋសភា​ចិន ដោយ​បង្កក​ទ្រព្យ​សម្បត្តិ​ណា​មួយ​ដែល​ពួកគេ​អាច​មាន​នៅ​ក្នុង​សហរដ្ឋ​អាមេរិក និង​រារាំង​ពួកគេ​និង​ក្រុម​គ្រួសារ​របស់​ពួកគេ​មិន​ឲ្យ​ធ្វើ​ដំណើរ​មក​សហរដ្ឋ​អាមេរិក​បាន។

នៅ​ថ្ងៃ​អង្គារ​នេះ រដ្ឋាភិបាល​ចិន​បាន​ប្រឆាំង​នឹង​វិធានការ​ទាំង​នេះ​របស់​សហរដ្ឋ​អាមេរិក។

អ្នក​នាំ​ពាក្យ​ក្រសួង​ការបរទេស​ចិន​អ្នកស្រី Hua Chunying បាន​បញ្ជាក់​នៅ​ក្នុង​សន្និសីទ​កាសែត​ថា រដ្ឋាភិបាល​ក្រុង​ប៉េកាំង​នឹង​ចាត់ «វិធានការ​ម៉ឺងម៉ាត់​តបត​វិញ​ប្រឆាំង​នឹង​ទង្វើ​បែប​ព្យាបាទ​របស់​សហរដ្ឋ​អាមេរិក​ទាំង​នេះ ដើម្បី​ការពារ​សិទ្ធិ​អធិបតេយ្យ សន្តិសុខ និង​អភិវឌ្ឍន៍​របស់​ប្រទេស​ចិន»។

អ្នកស្រី​ក៏​បាន​ជំរុញ​ផង​ដែរ​ឲ្យ​សហរដ្ឋ​អាមេរិក​ដក​វិធានការ​ទាំង​នេះ​ចេញ។

មន្ត្រី​ចិន​ទាំង ១៤ នាក់​នោះ​មាន​ឈ្មោះ Wang Chen, Cao Jianming, Zhang Chunxian, Shen Yueyue, Ji Bingxuan, Arken Imirbaki, Wan Exiang, Chen Du, Wang Dongming, Padma Choling, Ding Zhongli, Hao Mingjin, Cai Dafeng និង Wu Weihua៕

ផែនទីលទ្ធផលការបោះឆ្នោតប្រធានាធិបតីអាមេរិកពីឆ្នាំ ១៩៩២-២០២០

XS
SM
MD
LG