ភ្ជាប់​ទៅ​គេហទំព័រ​ទាក់ទង

ព័ត៌មាន​​ថ្មី

តុលាការ​កំពូល​សហ​រដ្ឋ​អាមេរិក សម្រេច​តម្រូវ​ឲ្យ​ចាក់​វ៉ាក់សាំង​ចំពោះ​បុគ្គលិក​ថែទាំ​សុខភាព មិន​មែន​អាជីវកម្ម​ទេ


រូបឯកសារ៖ តុលាការកំពូលស.រ.អ. នៅ​ថ្ងៃទី ១៣ ខែមករា ឆ្នាំ ២០២២ បាន​បញ្ឈប់​រដ្ឋបាលលោក Biden ពីការអនុវត្តការតម្រូវ​ឲ្យ​ចាក់​វ៉ាក់សាំង ឬ​ការធ្វើតេស្ត​កូវីដ ទៅលើ​អាជីវកម្មធំៗ។ ក្រុមហ៊ុន Target និង​ក្រុមហ៊ុន​ផ្សេង​ទៀត​ថា ពួកគេ​នឹង​គោរព​តាម​តម្រូវការ ប៉ុន្តែ​មិនបាន​អនុវត្ត​ដោយ​ខ្លួនឯង​ទេ។

តុលាការ​កំពូល​សហ​រដ្ឋ​អាមេរិក​ បាន​ធ្វើ​ឲ្យ​លោក​ប្រធានាធិបតី​ Joe Biden ​ខក​ចិត្ត​កាលពី​ថ្ងៃ​ព្រហស្បតិ៍ ​ដោយ​បាន​រារាំង​បទ​បញ្ជា​របស់​លោក​ដែល​តម្រូវ​ឲ្យ​បុគ្គលិក​ក្រុមហ៊ុន​ធំៗ ​ត្រូវ​ចាក់​វ៉ាក់សាំង​បង្ការ​ជំងឺ​កូវីដ១៩ ​ បើ​ពុំ​ដូច្នេះ​ទេ​ ត្រូវ​ធ្វើ​តេស្ត​ជា​រៀង​រាល់​សប្តាហ៍។ ​នេះ​ បើ​តាម​សេចក្តី​រាយ​ការណ៍​របស់​ទីភ្នាក់ងារ​ព័ត៌មាន ​AFP។​

នៅ​ពេល​ជាមួយ​គ្នា​នោះ​ដែរ​ តុលាការ​កំពូល​ បាន​អនុញ្ញាត​ឲ្យ​តម្រូវ​ចាក់​វ៉ាក់សាំង​សម្រាប់​បុគ្គលិក​ថែទាំ​សុខភាព​នៅ​មន្ទីរពេទ្យ​ មណ្ឌល​សុខភាព ដែល​បាន​ទទួល​ថវិកា​របស់​សហ​ព័ន្ធ។​

លោក Biden ​បាន​បញ្ជាក់​នៅ​ក្នុង​សេចក្តី​ថ្លែង​ការណ៍​ថា៖ ​«ខ្ញុំ​មាន​ការ​ខកចិត្ត​ដែល​តុលាការ​កំពូល​បាន​សម្រេច​រារាំង​តម្រូវការ​ជួយ​សង្គ្រោះ​ជីវិត​សម្រាប់​បុគ្គលិក​នៅ​ឯ​ក្រុមហ៊ុន​ធំៗ ​ដែល​ផ្អែក​លើ​វិទ្យាសាស្ត្រ ​និង​ច្បាប់»។​

លោក​ប្រធានាធិបតី​បាន​ទទួល​ស្វាគមន៍​តម្រូវការ​ឲ្យ​ពួក​បុគ្គលិក​សុខាភិបាល​ចាក់​វ៉ាក់សាំង​ ដោយ​និយាយ​ថា ​វា​ពាក់ព័ន្ធ​មនុស្ស​ប្រមាណ​១០​លាន​នាក់​ ដែល​ធ្វើការ​នៅ​មន្ទីរពេទ្យ​ មណ្ឌល​សុខភាពដែល​ទទួល​បាន​ថវិកា​សហព័ន្ធ​ ហើយ​វា​នឹង​ជួយ​សង្គ្រោះ​ជីវិត​មនុស្ស។​

ក៏ប៉ុន្តែ ​សមាជិក​ព្រឹទ្ធ​សភា​ខាង​គណបក្ស​សាធារណរដ្ឋ​ លោក ​Rick Scott ​មកពី​រដ្ឋ​ Florida​ បាន​និយាយ​ថា ​ការ​សម្រេច​របស់​តុលាការ ​បាន​បញ្ជូន​«សារ​ដ៏​ច្បាស់»​ថា ​ លោក ​Biden ​មិន​មែន​ជា​ស្តេច​ទេ ហើយ​ការ​ប្រើ​អំណាច​សហព័ន្ធ​លើស​លប់​របស់​លោក​ នឹង​មិន​ត្រូវ​បាន​អនុគ្រោះ​ទេ។​

បន្ទាប់ពី​ការ​អំពាវនាវ​អស់​រយៈពេល​ជាច្រើន​ខែ​ឱ្យ​ពលរដ្ឋ​អាមេរិកាំង​ចាក់​វ៉ាក់សាំង​បង្ការ​ជំងឺ​កូវីដ១៩ ​ដែល​បាន​សម្លាប់​មនុស្ស​ជាង​៨៤៥.០០០​នាក់​នៅ​ក្នុង​សហ​រដ្ឋ​អាមេរិក​នោះ​ ​លោក Biden ​បាន​ប្រកាស​កាលពី​ខែ​កញ្ញា​ថា ​លោក​សម្រេច​ឲ្យ​ក្រុមហ៊ុន​ឯកជន​ធំៗ​តម្រូវ​ឱ្យ​បុគ្គលិក​ចាក់​វ៉ាក់សាំង។​

តាម​បទបញ្ជា​នេះ​ ​ និយោជិត​ដែល​មិន​បាន​ចាក់​វ៉ាក់សាំង​ នឹង​ត្រូវ​បង្ហាញ​ការ​ធ្វើ​តេស្ត​អវិជ្ជមាន​ប្រចាំ​សប្តាហ៍ ​និង​ពាក់ម៉ាស់​នៅ​កន្លែង​ធ្វើការ៕

XS
SM
MD
LG