រាល់ទិន្នន័យដែលត្រូវបានបញ្ចូលចន្លោះពីថ្ងៃទី៣ ដល់ថ្ងៃទី១០ ខែតុលា ទៅក្នុងកម្មវិធីឆ្នោត Diversity Visa (DV) ឬ Green Card Lottery ដើម្បីផ្សងសំណាងទៅរស់នៅសហរដ្ឋអាមេរិក ត្រូវបាត់បង់អស់ដោយសារតែបញ្ហាបច្ចេកទេស។
រាល់បុគ្គលដែលបានបំពេញពាក្យសុំក្នុងអំឡុងពេលដែលបានលើកឡើងខាងលើនេះ ត្រូវតែបំពេញពាក្យជាថ្មីម្តងទៀត។
សារមួយនៅលើគេហទំព័ររបស់ក្រសួងការបរទេសអាមេរិកបានសរសេរថា «រាល់ទិន្នន័យទាំងអស់ដែលត្រូវបានបញ្ចូលចាប់ពីថ្ងៃទី៣ដល់ថ្ងៃទី១០ ខែតុលា មិនមានសុពលភាពទេ ហើយត្រូវបានដកចេញពីប្រព័ន្ធគ្រប់គ្រងទិន្នន័យ»។
ជាធម្មតា ទិន្នន័យជាន់គ្នាដែលដាក់ទៅក្នុងកម្មវិធីឆ្នោតDV ត្រូវចាត់ទុកមិនយកជាបានការនោះទេ។ ប៉ុន្តែសម្រាប់លើកនេះ ដោយសារតែបញ្ហាបច្ចេកទេស «រាល់ទិន្នន័យដែលបញ្ចូលសារជាថ្មីឡើងវិញ នឹងមិនត្រូវចាត់ទុកថា ជាទិន្នន័យជាន់គ្នានោះទេ»។
សារនោះបានបន្ថែមទៀតថា «បញ្ហាបច្ចេកទេសនោះត្រូវបានដោះស្រាយរួចរាល់ហើយ។ ការបំពេញទិន្នន័យសារជាថ្មីឡើងវិញនឹងត្រូវចាប់ផ្តើមនៅវេលាម៉ោង១១យប់ ថ្ងៃពុធ ទី១៨ ខែតុលា ឆ្នាំ២០១៧ ហើយនឹងត្រូវបញ្ចប់នៅវេលាម៉ោង១២យប់ ថ្ងៃពុធ ទី២២ ខែវិច្ឆិកា ឆ្នាំ២០១៧»។ បេក្ខជនដែលបានដាក់ពាក្យរួចហើយទាំងអស់ត្រូវទុកលេខបញ្ជាក់ឬឯកសារទាំងឡាយដែលបានដាក់បញ្ចូលទៅក្នុងប្រព័ន្ធចុះឈ្មោះពីថ្ងៃទី៣ដល់ថ្ងៃទី១០ខែតុលា ថាមិនបានការ។
អ្នកស្រី Pooja Jhunjhunwala បានប្រាប់ VOA តាមរយៈអ៊ីមែលថា ក្រសួងការបរទេសអាមេរិកនឹងផ្ញើអ៊ីមែលស្វ័យប្រវត្តិដើម្បីជូនដំណឹងដល់បេក្ខជនទាំងឡាយដែលបានដាក់ពាក្យចូលរួមផ្សងសំណាងក្នុងកម្មវិធីឆ្នោត DV កាលពីដើមខែតុលា ឲ្យចូលទៅគេហទំព័រ dvlottery.state.gov ដើម្បីអានសេចក្តីប្រកាសដ៏សំខាន់មួយ៕
