អ្នកជំនាញខាងសុខភាពបានសម្តែងការបារម្ភខ្លាំងចំពោះការបន្ធូរបន្ថយនាពេលថ្មីៗនេះនូវវិធានការតម្រូវឲ្យធ្វើតេស្តរកជំងឺកូវីដ១៩ របស់មជ្ឈមណ្ឌលសម្រាប់ការត្រួតពិនិត្យនិងការពារជំងឺរបស់សហរដ្ឋអាមេរិក ហៅកាត់ថា CDC។
មជ្ឈមណ្ឌល CDC បានប្រកាសកាលពីថ្ងៃចន្ទថា មនុស្សដែលទៅជិតអ្នកកើតជំងឺកូវីដ១៩ មិនចាំបាច់ធ្វើតេស្តរកវីរុសកូរ៉ូណាទេ ប្រសិនបើគេមិនមានចេញរោគសញ្ញាណាមួយនោះ។ ក្នុងពេលកន្លងមកស្ថាប័នមួយនេះ បានណែនាំឲ្យមនុស្សគ្រប់គ្នាដែលបានទៅជិតអ្នកឆ្លងជំងឺកូវីដ១៩ ក្នុងចម្ងាយជិតជាង៦ហ្វីត ឬតិចជាង២ម៉ែត្រ ក្នុងរយៈពេល១៥នាទី ត្រូវធ្វើតេស្តដើម្បីរកមើលវីរុសកូរ៉ូណា។
ទោះបីជាយ៉ាងនេះក្តី CDC ពុំបានធ្វើការពន្យល់ណាមួយជុំវិញការផ្លាស់ប្តូរសេចក្តីណែនាំរបស់ខ្លួននោះទេ ដែលប្រការនេះ បានធ្វើឲ្យអ្នកជំនាញខាងវិស័យសុខាភិបាលបារម្ភថា សេចក្តីប្រកាសថ្មីនេះរបស់ CDC នេះ អាចធ្វើឲ្យមានការថយចុះនៃចំនួនអ្នកធ្វើតេស្តរកជំងឺឆ្លងកូវីដ១៩។
វេជ្ជបណ្ឌិត Leena Wen គ្រូពេទ្យសង្គ្រោះបន្ទាន់និងជាសាស្ត្រាចារ្យផ្នែកសុខភាពសាធារណៈនៃសាកលវិទ្យាល័យ George Washington បាននិយាយថា ការតាមរកអ្នកដែលបានស្ថិតនៅជិតអ្នកកើតជំងឺកូវីដ១៩ គឺមានសារៈសំខាន់ ព្រោះ៥០%នៃការកើតជំងឺកូវីដ១៩ កើតឡើងទៅលើមនុស្សដែលមិនមានចេញរោគសញ្ញាណាមួយនោះទេ។
មជ្ឈមណ្ឌល CDC នៅតែបន្តណែនាំឲ្យមនុស្សដែលងាយទទួលរងគ្រោះ ត្រូវធ្វើតេស្តរកជំងឺឆ្លងកូវីដ១៩ ប្រសិនបើពួកគេបានស្ថិតនៅជិតអ្នកដែលឆ្លងវីរុសនោះ។ អ្នកនាំពាក្យក្រសួងសុខាភិបាលនិងសុខុមាលភាពពលរដ្ឋ បាននិយាយនៅថ្ងៃអង្គារថា គេត្រូវពិគ្រោះជាមួយវេជ្ជបណ្ឌិតឬមន្ត្រីសុខភាពសាធារណៈ ដើម្បីកំណត់ថាតើពួកគេត្រូវការធ្វើតេស្តដែរឬទេ៕
