ភ្ជាប់​ទៅ​គេហទំព័រ​ទាក់ទង

ព័ត៌មាន​​ថ្មី

ភរិយា​ប្រធានាធិបតី​អាមេរិក​ថ្លែង​អំពី​វិបត្តិ​ជំងឺ​កូវីដ១៩ នៅ​សន្និបាត​ជាតិ​គណបក្ស​សាធារណរដ្ឋ


លោកស្រី Melania Trump មកដល់ដើម្បីថ្លែងសុន្ទរកថា នៅក្នុងសន្និបាតគណបក្សសាធារណរដ្ឋនៅសេតវិមាន​ក្នុងរដ្ឋធានីវ៉ាស៊ីនតោន កាលពីថ្ងៃទី២៥ ខែសីហា ឆ្នាំ២០២០។

លោកស្រី Melania Trump ភរិយា​របស់​ប្រធានាធិបតី​សហរដ្ឋ​អាមេរិក​លោក Donald Trump បាន​សម្តែង​នូវ​ការ​អាណិតអាសូរ​កាល​ពី​យប់​ថ្ងៃ​អង្គារ​ដល់​ពលរដ្ឋ​អាមេរិកាំង​រាប់​សែន​នាក់​ដែល​បាន​រងគ្រោះ​ដោយសារ​ជំងឺ​កូវីដ១៩។ ករណី​នេះ​មាន​លក្ខណៈ​ផ្ទុយ​ស្រឡះ​ពី​ស្វាមី​របស់​លោកស្រី​គឺ​លោក​ប្រធានាធិបតី Donald Trump ដែល​ជារឿយៗ បាន​និយាយ​បន្ថយ​អំពី​ផល​ប៉ះពាល់​នៃ​ជំងឺ​ឆ្លង​នេះ និង​បាន​និយាយ​ថា ជំងឺ​នេះ​នឹង​បាត់​រូបរាង។

លោកស្រី Melania បាន​និយាយ​នៅ​ក្នុង​សុន្ទរកថា​កាលពី​យប់​ថ្ងៃ​អង្គារ​នៅ​សេតវិមាន​ថា «ចាប់តាំង​ពី​ខែ​មីនា​មក ជីវិត​របស់​យើង​បាន​ផ្លាស់ប្តូរ​យ៉ាង​ខ្លាំង។ ខ្ញុំ​សូម​ចូលរួម​រំលែកទុក្ខ​ដល់​អ្នក​ដែល​បាន​បាត់បង់​មនុស្ស​ជាទីស្រឡាញ់។ ខ្ញុំ​សូម​បន់ស្រន់​ដល់​អ្នក​ដែល​មាន​ជំងឺ ឬ​កំពុង​មាន​ការឈឺចាប់​ឲ្យ​ឆាប់​ជា​សះស្បើយ»។

លោកស្រី​បាន​មាន​ប្រសាសន៍​ទៀត​ថា៖ «ខ្ញុំ​ដឹង​ថា មនុស្ស​ជាច្រើន​មាន​ការ​រសាប់​រសល់​ហើយ​ខ្លះ ទៀត​មាន​អារម្មណ៍​តែលតោល។ ខ្ញុំ​ចង់​ឲ្យ​អ្នក​ដឹង​ថា អ្នក​មិនមែន​នៅ​ម្នាក់ឯងនោះ​ទេ»។

ការ​លើកឡើង​ដូច​នេះ​មាន​ភាព​ខុសគ្នា​យ៉ាងខ្លាំង​ពី​វោហាសាស្ត្រ​ចោទ​ប្រកាន់​ខាង​នយោបាយ​កាល​ពី ២ យប់​ដំបូង​នៃ​សន្និបាត​ជាតិ​គណបក្ស​សាធារណរដ្ឋ​ដែល​មាន​រយៈពេល ៤ ថ្ងៃ​នេះ។ កាល​ពី ២ យប់​ដំបូង​នោះ ពួក​អ្នក​គាំទ្រ​លោក​ប្រធានាធិបតី Trump បាន​វាយ​ប្រហារ​ដោយ​ពាក្យ​សម្ដី​ខ្លាំងៗ​លើ​លោក Joe Biden បេក្ខជនប្រធានាធិបតី​ខាង​គណបក្ស​ប្រជាធិបតេយ្យ និង​បាន​សរសើរ​លោក Trump អំពី​ចំណាត់ការ​ចំពោះ​វិបត្តិ​ជំងឺ​កូវីដ១៩ និង​ចំពោះ​ផល​ប៉ះពាល់​លើ​សេដ្ឋកិច្ច​ដែល​បណ្ដាល​មក​ពី​ជំងឺ​នេះ។

ជាង​នេះ​ទៀត លោកស្រី Melania បាន​សម្តែង​អំណរគុណ​ដល់​បុគ្គលិក​សុខាភិបាល​ដែលបាន​ព្យាបាល​មនុស្ស​រាប់​លាន​នាក់​ដែល​ឆ្លង​ជំងឺ​កូវីដ១៩ នេះ។

លោកស្រី​បាន​មាន​ប្រសាសន៍​ថា៖ «អ្នក​បាន​គិត​ប្រយោជន៍​ប្រទេស​ជាមុន។ ខ្ញុំនិង​ស្វាមីរបស់​ខ្ញុំ សូម​ថ្លែង​អំណរគុណ​យ៉ាង​ជ្រាលជ្រៅ»៕

ផែនទីលទ្ធផលការបោះឆ្នោតប្រធានាធិបតីអាមេរិកពីឆ្នាំ ១៩៩២-បច្ចុប្បន្ន

XS
SM
MD
LG