ភាពប្រកួតប្រជែងរបស់ប្រទេសចិនធ្លាប់ត្រូវបានសហរដ្ឋអាមេរិកនិងសម្ព័ន្ធមិត្តរបស់ខ្លួនមើលឃើញថាជាឱកាសសេដ្ឋកិច្ចមួយ។ ប៉ុន្តែប្រទេសចិនក្រោមការដឹកនាំរបស់លោក Xi Jinping ដែលមានគោលបំណងប្រកួតប្រជែងដើម្បីកែប្រែប្រព័ន្ធអន្តរជាតិ ដោយប្រើសក្ដានុពលសេដ្ឋកិច្ច សមត្ថភាពយោធា និងវិស័យការទូតស៊ីជម្រៅ បានបណ្តាលឱ្យសហរដ្ឋអាមេរិកនិងក្រុមសម្ព័ន្ធមិត្ត មើលឃើញប្រទេសសេដ្ឋកិច្ចធំបំផុតទីពីរនៅលើពិភពលោកនេះ ថាជាការគំរាមកំហែងសន្តិសុខ។
សម្រាប់ក្រុមមន្ត្រីដែលកំពុងដឹកនាំយុទ្ធសាស្ត្រចូលរួមនៅក្នុងតំបន់ឥណ្ឌូប៉ាស៊ីហ្វិករបស់សហរដ្ឋអាមេរិកនិងសហភាពអឺរ៉ុប ការទប់ទល់ជាមួយនឹងការប្រកួតប្រជែងដ៏គំរាមកំហែងរបស់ប្រទេសចិនទាមទារឱ្យមានប្រើប្រាស់វិធីសាស្ត្ រ«បន្ថយហានិភ័យ» និង «ធ្វើពិពិធកម្ម»។
លោក Kurt Campbell ជំនួយការរងរបស់ប្រធានាធិបតីសហរដ្ឋអាមេរិកលោក Joe Biden និងជាអ្នកសម្របសម្រួលកិច្ចការឥណ្ឌូប៉ាស៊ីហ្វិកនៅក្រុមប្រឹក្សាសន្តិសុខជាតិ បាននិយាយថា វាជារឿងសំខាន់ដែលសហរដ្ឋអាមេរិកបន្តបើកចំហទ្វារសម្រាប់កិច្ចសន្ទនាជាមួយប្រទេសចិន ហើយបន្តត្រៀមខ្លួន «ធ្វើការប្រកបដោយការស្ថាបនាជាមួយដៃគូសន្ទនាចិន»។
លោក Campbell ដែលជាអ្នកឯកទេសកំពូលម្នាក់ខាងគោលនយោបាយអាស៊ីរបស់សហរដ្ឋអាមេរិកក្នុងរយៈពេល ១៥ ឆ្នាំកន្លងមកនេះ បាននិយាយនៅក្នុងកិច្ចពិភាក្សាមួយក្នុងរដ្ឋធានីវ៉ាស៊ីនតោន កាលពីដើមខែមិថុនាថា៖ «យើងជឿថា រូបភាពលេចធ្លោបំផុតនៃទំនាក់ទំនងរវាងសហរដ្ឋអាមេរិកនិងចិន គឺពិតជាការប្រកួតប្រជែងមួយ ហើយវានឹងនៅបន្តបែបនេះទៅមុខទៀត។ ប៉ុន្តែក្នុងពេលជាមួយគ្នានេះដែរ យើងចង់ឱ្យការប្រកួតប្រជែងនោះនៅតែស្ថិតក្នុងដែនកំណត់ទទួលខុសត្រូវ ហើយយើងចង់បញ្ចៀសការធ្លាក់ចូលទៅជាការប្រឈមដាក់គ្នា»។
លោក Campbell បានថ្លែងបន្តថា៖ «ស្ទើរតែគ្រប់ប្រទេសទាំងអស់នៅតំបន់ប៉ាស៊ីហ្វិកមានការព្រួយបារម្ភចំពោះសកម្មភាពដែលយើងបានឃើញចិនកំពុងធ្វើនាពេលថ្មីៗនេះ មិនថាជាសមយុទ្ធយោធានៅជុំវិញព្រំដែនប្រទេសអ៊ីរ៉ង់ សកម្មភាពនៅសមុទ្រខាងកើតនិងសមុទ្រចិនខាងត្បូង និងនៅច្រកសមុទ្រតៃវ៉ាន់ គឺសុទ្ធតែជារឿងដែលគួរឲ្យព្រួយបារម្ភ។ ហើយខ្ញុំគិតថា ការឆ្លើយតបដ៏សមរម្យ គឺជាការពិគ្រោះយោបល់គ្នា ដើម្បីព្យាយាមតម្រឹមសកម្មភាពរបស់យើងនិងចិនឲ្យស៊ីសង្វាក់គ្នា»។
លោក Campbell ក្រុមមន្ត្រីសភាពអ៊ឺរុប និងអ្នកជំនាញផ្សេងទៀតផ្នែកតំបន់ឥណ្ឌូប៉ាស៊ីហ្វិក បានជួបជុំគ្នាកាលពីដើមខែមិថុនា ដើម្បីពិភាក្សាគ្នាអំពីរបៀបដែលសហរដ្ឋអាមេរិក រួមជាមួយនឹងសម្ព័ន្ធមិត្តនិងដៃគូរបស់ខ្លួន ដោះស្រាយបញ្ហាប្រឈមទាក់ទិននឹងប្រទេសចិន។
លោក Gunnar Wiegand នាយកគ្រប់គ្រងផ្នែកអាស៊ីនិងប៉ាស៊ីហ្វិកនៃសេវាកម្មការទូតរបស់សភាពអឺរ៉ុប (European External Action Service) ដែលបានបង្ហាញខ្លួនក្នុងកិច្ចពិភាក្សាជាមួយលោក Campbell ដែរនោះ បាននិយាយថា តួនាទីការទូតរបស់ចិនក្នុងការឈ្លានពានរបស់រុស្ស៊ីទៅលើអ៊ុយក្រែន បានធ្វើឱ្យអឺរ៉ុបដឹងថា ខ្លួនមិនអាចដាក់អ្វីដែលកើតឡើងនៅក្នុងតំបន់អឺរ៉ុបឱ្យដាច់ពី «អ្វីដែលកើតឡើងនៅក្នុងតំបន់ឥណ្ឌូប៉ាស៊ីហ្វិក» នោះទេ។
លោក Wiegand មានប្រសាសន៍ថា៖ «ខ្ញុំចង់គូសបញ្ជាក់ថា អឺរ៉ុបគឺនៅ [តំបន់ឥណ្ឌូប៉ាស៊ីហ្វិក] ក្នុងនាមជាដៃគូ គឺក្នុងនាមជាដៃគូសម្រាប់ដៃគូដែលមានគំនិតដូចគ្នា និងជាដៃគូដែលមានគោលនយោបាយឥណ្ឌូប៉ាស៊ីហ្វិកផងដែរ ហើយក៏ជាដៃគូសម្រាប់ដៃគូផ្សេងទៀតដែលត្រូវការ «បន្ថយហានិភ័យ» និង «ធ្វើពិពិធកម្ម» ក្នុងទំនាក់ទំនងសេដ្ឋកិច្ចជាមួយប្រទេសចិនផងដែរ។
លោក Wiegand បានថ្លែងបន្ថែមថា ខណៈពេលដែល «វាមានសារៈសំខាន់ខ្លាំងណាស់ដែលសហរដ្ឋអាមេរិកនិងចិនបង្កើតចរន្តប្រាស្រ័យទាក់ទងគ្នាទៅវិញទៅមក» ដើម្បីជៀសវាង «ការយល់ច្រលំ» ក៏ដូចជា «ឧប្បត្តិហេតុ និងហេតុការណ៍និងគ្រោះថ្នាក់ដ៏អាក្រក់» ការធ្វើសេរីភាវូបនីយកម្មពាណិជ្ជកម្មនៅទូទាំងតំបន់ឥណ្ឌូប៉ាស៊ីហ្វិក គឺជាតម្រូវការចាំបាច់សម្រាប់ «ការកាត់បន្ថយការពឹងផ្អែកសំខាន់ៗ [លើចិន] ឬការលុបបំបាត់ភាពងាយរងគ្រោះធ្ងន់ធ្ងរនានា»។
លោក Wiegand បានមានប្រសាសន៍ទៀតថា គោលនយោបាយឥណ្ឌូប៉ាស៊ីហ្វិករបស់សហភាពអឺរ៉ុប បង្ហាញការផ្លាស់ប្តូរបន្តិចម្តងៗពីសំណាក់បណ្តាប្រទេសអឺរ៉ុប ដោយប្ដូរពីការផ្តោតទាំងស្រុងលើប្រទេសចិន ទៅជាការកសាងទំនាក់ទំនងកាន់តែស៊ីជម្រៅជាមួយដៃគូលេចធ្លោដូចជា ជប៉ុន កូរ៉េខាងត្បូង អូស្ត្រាលី និងឥណ្ឌា ដែលជាមហាអំណាចរីកចម្រើនក្នុងតំបន់ ក៏ដូចជាបណ្តាប្រទេសប្រទេសនៅតំបន់អាស៊ីអាគ្នេយ៍ដែលមានសេដ្ឋកិច្ចសំខាន់ៗ ដូចជាប្រទេសវៀតណាម ថៃ និងហ្វីលីពីនជាដើម ដើម្បីធ្វើពិពិធកម្មពាណិជ្ជកម្ម សង្វាក់ផ្គត់ផ្គង់ ក៏ដូចជាបច្ចេកវិទ្យាទ្រទ្រង់ការការពារបរិស្ថាន និងបច្ចេកវិទ្យាឌីជីថលនៅទូទាំងតំបន់ឥណ្ឌូប៉ាស៊ីហ្វិកផងដែរ។
ចាប់តាំងពីសង្រ្គាមពាណិជ្ជកម្មកំពុងបន្តរវាងសហរដ្ឋអាមេរិកនិងចិនចាប់ផ្តើមក្នុងឆ្នាំ ២០១៨ មក សហរដ្ឋអាមេរិកបាននិងកំពុងបង្កើតសម្ព័ន្ធភាពពាណិជ្ជកម្មនិងបច្ចេកវិទ្យាថ្មីៗ ជាមួយសម្ព័ន្ធមិត្តអឺរ៉ុបរបស់ខ្លួន និងដៃគូផ្សេងទៀតដូចជាប្រទេសជប៉ុន ដើម្បីកាត់បន្ថយការពឹងផ្អែកផ្នែកសង្វាក់ផលិតកម្មទៅលើប្រទេសចិន និងដើម្បីសម្រេចគោលនយោបាយដែលខ្លួនហៅថា «ជាការបន្ថយហានិភ័យ និងការធ្វើពិពិធកម្ម» ក្នុងទំនាក់ទំនងសេដ្ឋកិច្ចជាមួយចិន។
អ្នកស្រី Emily Benson នាយិកានៃគម្រោងពាណិជ្ជកម្មនិងបច្ចេកវិទ្យានៅមជ្ឈមណ្ឌលសម្រាប់ការសិក្សាយុទ្ធសាស្ត្រនិងអន្តរជាតិ (CSIS) ដែលបានចូលរួមក្នុងកិច្ចពិភាក្សានោះដែរ បាននិយាយថា សម្ព័ន្ធភាពពាណិជ្ជកម្ម និងបច្ចេកវិទ្យាថ្មីទាំងនោះរបស់សហរដ្ឋអាមេរិកមានគោលបំណង «លើកទឹកចិត្តបណ្ដាក្រុមហ៊ុននិងប្រទេសឱ្យផ្លាស់ទីសង្វាក់ផលិតកម្ម» ជាពិសេសការផលិតបន្ទះឈីបកុំព្យូទ័រទំនើប (semiconductors) «ចេញពីប្រទេសដែលអាចបង្កការគំរាមកំហែងដល់សន្តិសុខជាតិ»។
អ្នកស្រី Benson បានថ្លែងទៀតថា៖ «គោលនយោបាយនេះសួរសំណួរជាច្រើន ជាពិសេស ថាតើនរណាជាមិត្ត? តាមគំនិតរបស់ខ្ញុំ គឺទាក់ទិននឹងការគ្រប់គ្រងការនាំចេញនានា។ យើងពិតជាមិនចង់បន្តការវិនិយោគបច្ចេកវិទ្យាជំនាន់ក្រោយដែលកំពុងរីកចម្រើននៅក្នុងបណ្តាប្រទេសដែលអ្នកគិតថាអាចធ្វើឱ្យមានការហូរចេញបច្ចេកវិទ្យាទាំងនោះទៅកាន់ប្រទេសគូប្រជែងនោះទេ»។
សហរដ្ឋអាមេរិកបានដាក់ប្រទេសចិនជាគួប្រជែងយុទ្ធសាស្ត្រ និងភូមិសាស្ត្រនយោបាយចម្បង នៅក្នុងយុទ្ធសាស្ត្រសន្តិសុខជាតិឆ្នាំ ២០២២ របស់ខ្លួន។ ការបង្ហោះបាឡុងយក្សមកលើសហរដ្ឋអាមេរិកថ្មីនេះរបស់ចិន បានធ្វើឱ្យរដ្ឋាភិបាលក្រុងវ៉ាស៊ីនតោន និងរដ្ឋាភិបាលក្រុងប៉េកាំងកាន់តែមានជម្លោះតានតឹង រហូតធ្វើឲ្យប្រធានាធិបតីសហរដ្ឋអាមេរិកលោក Joe Biden ហៅទង្វើនេះថា «ឆ្កួតលីលា» និងបានព្យាករណ៍ថា នឹងមានការ «បែកបាក់» ទំនាក់ទំនងរវាងសហរដ្ឋអាមេរិក និងប្រទេសចិន នៅឯកិច្ចប្រជុំកំពូលបណ្តាប្រទេសសេដ្ឋកិច្ចធំទាំង៧ (G7) កាលពីខែឧសភា ក្នុងទីក្រុង Hiroshima ប្រទេសជប៉ុន។
ទីភ្នាក់ងារព័ត៌មាន Reuters រាយការណ៍ថា លោកប្រធានាធិបតី Biden ក៏បានថ្លែងនៅក្នុងសន្និសីទសារព័ត៌មានមួយបន្ទាប់ពីកិច្ចប្រជុំរយៈពេលបីថ្ងៃជាមួយមេដឹកនាំ G7 បានបញ្ចប់ទៅថា បណ្តាប្រទេសដែលមានសេដ្ឋកិច្ចធំបំផុត G7 រួមមានកាណាដា បារាំង អាល្លឺម៉ង់ អ៊ីតាលី ជប៉ុន ចក្រភពអង់គ្លេស សហរដ្ឋអាមេរិក និងសហភាពអឺរ៉ុប មានការរួបរួមគ្នានៅក្នុងយុទ្ធសាស្ត្រ «បន្ថយហានិភ័យ និងធ្វើពិពិធកម្ម» ទំនាក់ទំនងសេដ្ឋកិច្ចជាមួយនឹងប្រទេសចិន។
VOA បានទាក់ទងទៅស្ថានទូតចិននៅរដ្ឋធានីវ៉ាស៊ីនតោនដើម្បីសុំការអត្ថាធិប្បាយ ប៉ុន្តែមិនបានទទួលការឆ្លើយតបនោះទេ។ ប៉ុន្តែទីភ្នាក់ងារព័ត៌មានផ្លូវការ Xinhua របស់ប្រទេសចិន បានឱ្យដឹងថា «យុទ្ធសាស្ត្រកាត់បន្ថយហានិភ័យនេះគឺគ្រាន់តែជាពាក្យការទូតលាក់បាំងការផ្តាច់ទំនាក់ទំនងប៉ុណ្ណោះ» ហើយសហរដ្ឋអាមេរិកកំពុងប្រមូលផ្តុំសម្ព័ន្ធមិត្ត និងដៃគូរបស់ខ្លួន ដើម្បីទប់ស្កាត់ឥទ្ធិពល និងអំណាចដែលកំពុងកើនឡើងរបស់ប្រទេសចិន។
លោក Campbell បានលើកឡើងថា សហរដ្ឋអាមេរិករួមជាមួយនឹងសម្ព័ន្ធមិត្ត និងដៃគូរបស់ខ្លួនបានប្តេជ្ញាចិត្ត «រក្សាសន្តិភាព និងស្ថិរភាព» ហើយរុញច្រានទង្វើបង្កហេតុរបស់ប្រទេសចិនក្នុងការតទល់នឹងប្រព័ន្ធអន្តរជាតិ។ ប៉ុន្តែលោកបានបន្ថែមថា សហរដ្ឋអាមេរិកបានត្រៀមខ្លួនរួចជាស្រេចដើម្បីធ្វើការប្រកបដោយការទទួលខុសត្រូវជាមួយនឹងប្រទេសចិន «ដើម្បីដោះស្រាយបញ្ហាដែលប៉ះពាល់ដល់ផលប្រយោជន៍ទៅវិញទៅមក» ដូចជាការប្រែប្រួលអាកាសធាតុ និងបញ្ហាកូរ៉េខាងជើងជាដើម។
លោក Campbell បានមានប្រសាសន៍ថា៖ «យុទ្ធសាស្រ្ត និងការចូលរួមជាមួយក្រុមសម្ព័ន្ធមិត្ត និងដៃគូរបស់យើងទាំងនេះ មិនមែនមានន័យថាជាសូចនាករនៃការទប់ស្កាត់ចិននោះទេ ប៉ុន្តែវាជាជំហានដើម្បីព្យាយាមរក្សានិងធ្វើឱ្យមានស្ថិរភាពនូវប្រព័ន្ធប្រតិបត្តិការអន្តរជាតិរបស់យើង ដែលមានភាពវិជ្ជមាន និងផ្តល់ភាពរឹងមាំ និងសុវត្ថិភាពអស់រយៈពេលជាច្រើនទសវត្សរ៍មកហើយ»៕
