បណ្តាញសារព័ត៌មានរដ្ឋនៃប្រទេសចិនបានរាយការណ៍នៅថ្ងៃសុក្រនេះថា សហស្ថាបនិកក្រុមហ៊ុន Microsoft និងជាអ្នកធ្វើវិភាគទានមនុស្សធម៌លោក Bill Gates បានជួបជាមួយប្រធានាធិបតីចិនលោក Xi Jinping។
លោក Xi បាននិយាយនៅក្នុងវីដេអូមួយផ្សាយតាមទូរទស្សន៍រដ្ឋ CCTV ថា៖ «ខ្ញុំបាន និយាយជាញឹកញយថា ទំនាក់ទំនងរវាងសហរដ្ឋអាមេរិកនិងប្រទេសចិនផ្អែកលើប្រជារាស្ត្រនៃប្រទេសទាំងពីរ»។ លោក Xi បានថ្លែងថា លោក Gates ជាជនជាតិអាមេរិកាំងទី ១ ដែលលោកបានជួបនៅឆ្នាំនេះ ដោយលោកបានបន្ថែមថា លោកដាក់«សេចក្តីសង្ឃឹមរបស់លោកលើប្រជារាស្ត្រអាមេរិកាំង»។
ជំនួបរបស់ឥស្សរជនពីរនាក់នេះមានឡើងក្រោយមូលនិធិ Bill and Melinda Gates Foundation ប្រកាសកាលពីថ្ងៃព្រហស្បតិ៍ថា ខ្លួនផ្តល់ប្រាក់ ៥០ លានដុល្លារដល់វិទ្យាស្ថានស្រាវជ្រាវឱសថសម្រាប់សុខភាពសាកល Global Health Drug Discovery Institute នៃប្រទេសចិន ដើម្បីជួយពង្រឹងសមត្ថភាពស្រាវជ្រាវបង្កើតឱសថ។
លោក Gates ដែលជាអ្នកមានជាងគេម្នាក់ក្នុងពិភពលោក បានស្ថិតក្នុងប្រទេសចិនកាលពីថ្ងៃព្រហស្បតិ៍ ដើម្បីអ្វីដែលលោកបានមានប្រសាសន៍ថា ជាជំនួបជាមួយក្រុមដៃគូខាងសុខាភិបាលនិងការអភិវឌ្ឍសាកល ដែលបានធ្វើការជាមួយមូលនិធិសប្បុរសធម៌របស់លោក។
លោក Gates បានសរសេរតាមបណ្តាញ Twitter ថា៖ «ការដោះស្រាយបញ្ហានានាដូចជាការប្រែប្រួលធាតុអាកាស អសមភាពខាងការថែទាំសុខភាព និងអសន្តិសុខស្បៀងតម្រូវឱ្យមានការបញ្ចូលរបៀបដោះស្រាយថ្មីៗ។ ចាប់តាំងពីការអភិវឌ្ឍថ្នាំគ្រុនចាញ់រហូតដល់ការវិនិយោគក្នុងការសម្របសម្រួលតាមអាកាសធាតុ គឺប្រទេសចិនមានពិសោធន៍ច្រើនក្នុងវិស័យនេះ។ យើងត្រូវការធ្វើឱ្យមានការជឿនលឿនបែបនេះសម្រាប់មនុស្សច្រើននាក់ថែមទៀតក្នុងពិភពលោក»។
លោក Gates បានមានប្រសាសន៍ថា វិបត្តិសាកលបានរារាំងការជឿនលឿនក្នុងការបន្ថយការស្លាប់និងភាពក្រីក្ររបស់កុមារ ហើយថា លោកនឹងធ្វើដំណើរទៅផ្នែកខាងលិចនៃទ្វីបអាហ្វ្រិក ពីព្រោះបណ្តាប្រទេសនៅតំបន់អាហ្វ្រិករងគ្រោះដោយងាយ «ដោយសារតម្លៃស្បៀងអាហារខ្ពស់ បំណុលច្រើននិងកំណើនអត្រាជំងឺរបេងនិងគ្រុនចាញ់»។
លោក Gates ជាឥស្សរជនធុរកិច្ចដែលទៅបំពេញទស្សនកិច្ចក្នុងពេលថ្មីៗបំផុត បន្ទាប់ពីលោក Tim Cook នៃក្រុមហ៊ុន Apple និងលោក Elon Musk នៃក្រុមហ៊ុន Tesla៕
ព័ត៌មានខ្លះសម្រាប់សេចក្តីរាយការណ៍នេះដកស្រង់ចេញពីទីភ្នាក់ងារសារព័ត៌មាន AP, AFP និង Reuters
