យោធាសហរដ្ឋអាមេរិកបានបញ្ជាក់ថា ខ្លួនបានវាយប្រហារពីដ្រូនលើរថយន្តមួយគ្រឿងនៅក្នុងទីក្រុងបាដាដនៃប្រទេសអ៊ីរ៉ាក់ដោយសម្លាប់មេដឹកនាំម្នាក់នៃក្រុមសកម្មប្រយុទ្ធមួយដែលគាំទ្រដោយអ៊ីរ៉ង់។
បញ្ជាការដ្ឋានសហរដ្ឋអាមេរិកទទួលបន្ទុកកិច្ចការតំបន់មជ្ឈិមបូព៌ានិងអាស៊ីកណ្ដាលបានលើកឡើងថា ការវាយប្រហារនេះដែលបានធ្វើឡើងកាលពីថ្ងៃអង្គារបានសម្លាប់មេបញ្ជាការមួយរូបនៃក្រុមសកម្មប្រយុទ្ធ Kataib Hezbollah ដែលជាអ្នក «ទទួលខុសត្រូវលើការរៀបចំផែនការនិងការចូលរួមដោយផ្ទាល់ក្នុងការវាយប្រហារលើកងទ័ពសហរដ្ឋអាមេរិកនៅក្នុងតំបន់»។
មន្ត្រីសហរដ្ឋអាមេរិកពីររូបបានបញ្ជាក់អះអាងប្រាប់ VOA ថា មេបញ្ជាការរូបនោះគឺជាមន្ត្រីប្រតិបត្តិការឈ្មោះ Wisam Mohammad al-Saedi។ រូបភាពនៅលើបណ្ដាញសង្គមអនឡាញបានបង្ហាញថា អត្តសញ្ញាណប័ណ្ណអ៊ីរ៉ាក់របស់មេបញ្ជាការរូបនេះត្រូវបានគេដកចេញពីសាកសពរបស់ជននេះ។
វីដេអូដែលចែកចាយនៅលើបណ្ដាញសង្គមអនឡាញបានបង្ហាញឱ្យឃើញរថយន្តមួយគ្រឿងដែលឆាបឆេះនៅក្នុងអណ្តាតភ្លើងនៅលើផ្លូវជាតិល្បឿនលឿនក្នុងទីក្រុងបាដាដ។
ការវាយប្រហាររបស់សហរដ្ឋអាមេរិកនេះគឺដើម្បីឆ្លើយតបទៅនឹងការវាយប្រហារដោយដ្រូន រ៉ុក្កែត និងមីស៊ីលជិត ១៧០ គ្រាប់លើកងទ័ពសហរដ្ឋអាមេរិកនៅក្នុងតំបន់មជ្ឈិមបូព៌ាតាំងពីពាក់កណ្ដាលខែតុលាឆ្នាំមុនមក ដែលក្នុងនោះដ្រូនមួយគ្រឿងបានសម្លាប់ទាហានសហរដ្ឋអាមេរិក ៣ នាក់និងធ្វើឱ្យទាហានរាប់សិបនាក់ទៀតរងរបួសនៅភាគខាងជើងប្រទេសហ្ស៊កដានីកាលពីសប្ដាហ៍មុន។
នៅថ្ងៃព្រហស្បតិ៍នេះ អ៊ីរ៉ាក់បានរិះគន់ខ្លាំងក្លាលើការវាយប្រហារដោយដ្រូនរបស់សហរដ្ឋអាមេរិកនេះ ដោយអ្នកនាំពាក្យរដ្ឋាភិបាលអ៊ីរ៉ាក់បានហៅការវាយប្រហារនេះថាជា «ការលួចធ្វើឃាតដោយបើកចំហ» ដែលបានបង្ហាញឱ្យឃើញថា «មិនខ្វល់អំពីជីវិតជនស៊ីវិលឬក៏ច្បាប់អន្តរជាតិ»។
លោក Yehia Rasool អ្នកនាំពាក្យរបស់នាយករដ្ឋមន្ត្រីអ៊ីរ៉ាក់ បាននិយាយថា សម្ព័ន្ធភាពដែលដឹកនាំដោយសហរដ្ឋអាមេរិកដែលបានធ្វើប្រតិបត្តិការនៅក្នុងប្រទេសអ៊ីរ៉ាក់ដើម្បីតតាំងនឹងក្រុមជ្រុលនិយមរដ្ឋអ៊ិស្លាម (Islamic State) «មិនបានប្រកាន់ខ្ជាប់តាមហេតុផលនិងគោលបំណងនៃវត្តមានរបស់ខ្លួននៅលើទឹកដីរបស់យើង» នោះទេ៕
វេទិកាបញ្ចេញមតិ