មន្ត្រីការទូតកំពូលរបស់សហរដ្ឋអាមេរិកប្រចាំទីក្រុងហុងកុង បាននិយាយថា វាជា «សោកនាដកម្ម» នៅក្នុងការប្រើច្បាប់សន្តិសុខជាតិថ្មីរបស់ចិនសម្រាប់ទីក្រុងហុងកុង ដើម្បីកាត់ផ្ដាច់ «សេរីភាពជាមូលដ្ឋាន» នៃទីក្រុងនេះ និងបង្កើតឲ្យមាន «បរិយាកាសនៃការបង្ខិតបង្ខំ និងការបិទសេរីភាពខ្លួនឯង»។
លោក Hanscom Smith អគ្គកុងស៊ុលសហរដ្ឋអាមេរិកប្រចាំទីក្រុងហុងកុង និងទីក្រុងម៉ាកាវ បាននិយាយថា ជោគជ័យរបស់ទីក្រុងហុងកុងកន្លងមក គឺដោយសារតែការបើកចំហរបស់ទីក្រុងនេះ ហើយសហរដ្ឋអាមេរិកនឹងធ្វើអ្វីដែលខ្លួនអាចធ្វើបានដើម្បីរក្សាភាពបើកចំហនេះឲ្យនៅដដែល។
រដ្ឋាភិបាលក្រុងប៉េកាំងបានអនុម័ត និងអនុវត្តច្បាប់សន្តិសុខជាតិថ្មីសម្រាប់ទីក្រុងហុងកុងកាលពីសប្ដាហ៍មុន។ ច្បាប់នេះចាត់ទុកជាបទឧក្រិដ្ឋសម្រាប់សកម្មភាពផ្ដាច់ខ្លួន ផ្ដួលរំលំរដ្ឋអំណាច និងភេរវកម្ម។
ក្រុមអ្នករិះគន់យល់ឃើញថា ច្បាប់នេះគឺជាជំហានដ៏ខ្លាំងក្លារបស់រដ្ឋាភិបាលចិននៅក្នុងការលុបបំបាត់នូវរនាំងផ្លូវច្បាប់រវាងទីក្រុងហុងកុង និងប្រព័ន្ធគណបក្សកុម្មុយនិស្តចិន៕
