នៅក្នុងសេចក្តីប្រកាសព័ត៌មានមួយដែលបង្ហាញអំពីជំនួបរវាងរដ្ឋមន្រ្តីការបរទេសកម្ពុជា និងឯកអគ្គរដ្ឋទូតអាមេរិក ក្រសួងការបរទេសកម្ពុជាបានបញ្ជាក់ថាភាគីទាំងពីរ«ខ្វែងគំនិតគ្នា»លើបញ្ហាមួយចំនួន។
លោក ប្រាក់ សុខុន រដ្ឋមន្ត្រីការបរទេសកម្ពុជា និងលោក W. Patrick Murphy ឯកអគ្គរដ្ឋទូតអាមេរិកប្រចាំកម្ពុជា បានជួបពិភាក្សាគ្នាលើបញ្ហាមួយចំនួន កាលពីថ្ងៃទី១៧ ខែឧសភា ឆ្នាំ២០២១ នៅទីស្ដីការក្រសួងការបរទេសកម្ពុជា។
ភាគីទាំងពីរបានចេញសេចក្តីប្រកាសព័ត៌មានរៀងៗខ្លួន។ នៅក្នុងសេចក្តីប្រកាសព័ត៌មានមួយចេញផ្សាយនៅថ្ងៃពុធនេះ ក្រសួងការបរទេសកម្ពុជាបានលើកឡើងប្រធានបទនៃការពិភាក្សាដូចជាជំនួយរបស់អាមេរិកក្នុងទឹកប្រាក់១១លានដុល្លារអាមេរិកសម្រាប់ការប្រយុទ្ធប្រឆាំងនឹងជំងឺកូវីដ១៩ក្នុងប្រទេសកម្ពុជា កិច្ចសហប្រតិបត្តិការរបស់ប្រទេសទាំងពីរ ដូចជាវិស័យពាណិជ្ជកម្មនិងការវិនិយោគ និងបញ្ហាស្ថានភាពនយោបាយនៅក្នុងប្រទេសមីយ៉ាន់ម៉ាដែលជំហរកម្ពុជាចង់ឲ្យត្រឡប់ទៅប្រក្រតីភាពវិញ។
ក្រសួងការបរទេសបានឲ្យដឹងទៀតថាភាគីទាំងពីរនៅមានការខ្វែងគំនិតគ្នាមួយចំនួន ប៉ុន្តែប្តេជ្ញាចិត្តក្នុងការដោះស្រាយរួមគ្នា។ កម្ពុជាមិនបានបញ្ជាក់ថាជាបញ្ហាអ្វីនោះទេ។
ក្រសួងការបរទេសកម្ពុជាបញ្ជាក់ក្នុងសេចក្តីប្រកាសព័ត៌មានរបស់ខ្លួនថា៖ «ក្រៅពីនេះ ទោះបីជាមានការខ្វែងគំនិតគ្នាលើបញ្ហាមួយចំនួនក្ដី ភាគីទាំងពីរនៅតែបញ្ជាក់ពីការប្ដេជ្ញាចិត្តខិតខំដោះស្រាយរួមគ្នា និងមិនធ្វើឲ្យបញ្ហាទាំងនោះក្លាយជាឧបសគ្គនៃកិច្ចសហប្រតិបត្តិការដ៏ល្អប្រសើររវាងប្រទេសទាំងពីរនោះទេ»។
លោក កុយ គួង អ្នកនាំពាក្យក្រសួងការបរទេសកម្ពុជាបានបដិសេធមិនអត្ថាធិប្បាយបន្ថែមលើសេចក្តីប្រកាសព័ត៌មានដែលចេញផ្សាយ។
លោកប្រាប់VOAថា៖ «ការបញ្ជាក់នៅក្នុងPress Release [សេចក្តីប្រកាសព័ត៌មាន] គឺជាអ្វីដែលក្រសួងជូនដល់សារព័ត៌មានហើយ»។
ចំណែកលោក Chad Roedemeier អ្នកនំាពាក្យស្ថានទូតអាមេរិកប្រចាំកម្ពុជាក៏បានបដិសេធមិនអត្ថាធិប្បាយអំពីប្រធានបទដែលភាគីទាំងពីរមានការខ្វែងគំនិតគ្នាដែរ។ លោកបានស្នើឲ្យពិនិត្យមើលសេចក្តីប្រកាសរបស់ស្ថានទូតអាមេរិកដែលត្រូវបានផ្សព្វផ្សាយកាលពីថ្ងៃអង្គារ ប៉ុន្តែមិនបាននិយាយអំពីបញ្ហានៃការខ្វែងគំនិតនេះទេ។
លោក ឯម សុវណ្ណារ៉ា សាស្ត្រាចារ្យវិទ្យាសាស្ត្រនយោបាយនិងជាអ្នកតាមដានសង្គមមួយរូប មានប្រសាសន៍ថាមានចំណុចពីរដែលនៅតែជាចម្ងល់របស់សហរដ្ឋអាមេរិក។ ទីមួយគឺជំហរអព្យាក្រឹតរបស់កម្ពុជា ដែលលោកថាឥរិយាបថរបស់កម្ពុជា មិនដូចអ្វីដែលបានកំណត់នោះទេ គឺលម្អៀងទៅកាន់ប្រទេសចិន។ ចំណែកទីពីរ គឺជំហរប្រជាធិបតេយ្យ ដែលកម្ពុជាថាខ្លួនមានជំហរប្រជាធិបតេយ្យ ដែលមាន«ស្តង់ដារកម្ពុជា» ប៉ុន្តែអាមេរិកនិងសហភាពអឺរ៉ុបមិនដែលគិតថាប្រជាធិបតេយ្យមានស្តង់ដារកម្ពុជា ឬស្តង់ដារប្រទេសណានោះទេ។ លោកយល់ថាកម្ពុជាគួរផ្លាស់ប្តូរ ដើម្បីចំណេញពីទំនាក់ទំនងជាមួយប្រទេសមហាអំណាចទាំងអស់។
លោកបញ្ជាក់ថា៖ «អញ្ចឹងទេ ទស្សនៈនយោបាយ កម្ពុជាគួរតែឈរលក្ខណៈយ៉ាងម៉េចទាញយកអត្ថប្រយោជន៍ពីមហាអំណាចទាំងអស់នៅក្នុងតំបន់និងក្នុងសាកលលោក ទើបកម្ពុជាអាចឈរជំហរមួយល្អក្នុងទំនាក់ទំនងអន្តរជាតិ»។
គួរបញ្ជាក់ថាកាលពីឆ្នាំ២០១៩ អាមេរិកបានលើកឡើងថាខ្លួនមានព័ត៌មានច្បាស់ការថាកម្ពុជាបានចុះកិច្ចព្រមព្រៀងសម្ងាត់ជាមួយប្រទេសចិនក្នុងការបើកឲ្យមានមូលដ្ឋានកងទ័ពចិននៅកម្ពុជា។ ប៉ុន្តែកម្ពុជាបានបដិសេធហើយបដិសេធទៀតថាមិនពិតនោះទេ។
កន្លងទៅអាមេរិកបានរិះគន់ការចោទប្រកាន់មេដឹកនាំគណបក្សសង្រ្គោះជាតិ គឺលោក កឹម សុខា ថា«ក្បត់ជាតិ» ដោយមានការគាំទ្រពីសហរដ្ឋអាមេរិកនៅពីក្រោយ។ សំណុំរឿងដែលអូសបន្លាយនេះ កំពុងស្ថិតក្នុងដៃតុលាការ ដែលនាំឲ្យមានចំណោទអំពីលទ្ធភាពរបស់លោក កឹម សុខា ក្នុងការចូលរួមប្រជែងការបោះឆ្នោតនៅឆ្នាំក្រោយ។ សហរដ្ឋអាមេរិកក៏បានរិះគន់ការចាប់ខ្លួននិងការកាត់ទោសសកម្មជនបរិស្ថានផងដែរ។
បន្ថែមពីនេះទៀត កាលពីចុងខែមីនា ឆ្នាំ២០២១ ក្រសួងការបរទេសអាមេរិកបានបង្ហាញរបាយការណ៍មួយ ដោយរកឃើញការរំលោភសិទ្ធិមនុស្សជាច្រើនទម្រង់នៅកម្ពុជា ដែលរួមមានការចាប់ឃុំខ្លួនតាមតែអំពើចិត្ត ការរឹតត្បិតសំឡេងគណបក្សជំទាស់ និងរិះគន់ប្រព័ន្ធតុលាការកម្ពុជាថាស្ថិតក្រោមឥទ្ធិពលនយោបាយ៕
