ក្រសួងការពារជាតិសហរដ្ឋអាមេរិក នឹងដកកងទ័ពអាមេរិកជាច្រើនអ្នកមកកាន់មាតុប្រទេសវិញ ក្នុងរយ:ពេលប៉ុន្មានសប្ដាហ៍ខាងមុខ បន្ទាប់ពីលោកប្រធានាធិបតី Donald Trump បានបញ្ជាឲ្យដកទ័ពប្រមាណ ២.០០០ នាក់ ចេញពីប្រទេសអាហ្វហ្គានីស្ថាន និង ៥០០ នាក់ ចេញពីប្រទេសអ៊ីរ៉ាក់ មុនពេលការស្បថចូលកាន់តំណែងរបស់ប្រធានាធិបតីអាមេរិកអាណត្តិបន្ទាប់ នៅថ្ងៃទី ២០ ខែមករា ឆ្នាំក្រោយ។
រដ្ឋមន្ត្រីស្ដីទីនៃក្រសួងការពារជាតិអាមេរិក លោក Chris Miller បានប្រាប់អ្នកសារព័ត៌មាននៅក្រសួងការពារជាតិកាលពីថ្ងៃអង្គារម្សិលមិញថា៖ «ត្រឹមថ្ងៃទី ១៥ ខែមករាខាងមុខ ចំនួនកងទ័ពនៅក្នុងប្រទេសអាហ្វហ្គានីស្ថាន នឹងមានតែ ២.៥០០ នាក់ ហើយចំនួនកងទ័ពរបស់យើងនៅក្នុងប្រទេសអ៊ីរ៉ាក់ក៏នឹងមានតែ ២.៥០០ នាក់ដែរ»។
លោក Miller បាននិយាយថា ការកាត់បន្ថយចំនួនកងទ័ពនេះ មិន «ជះឥទ្ធិពលដល់គោលនយោបាយ និងគោលបំណងរបស់សហរដ្ឋអាមេរិក» នៅក្នុងសង្គ្រាមលើសាកលលោកប្រឆាំងនឹងភេរវកម្មនោះទេ ហើយនឹងត្រូវធ្វើឡើងនៅក្នុងវិធីមួយ ដែលការពារកងទ័ពអាមេរិក មន្ត្រីការទូត មន្ត្រីស៊ើបការណ៍សម្ងាត់ និងសម្ព័ន្ធមិត្តរបស់សហរដ្ឋអាមេរិក។
លោក Miller មិនបានឆ្លើយសំណួរអ្នកសារព័ត៌មានទេ បន្ទាប់ពីការលើកឡើងដូច្នេះ៕
