ភ្ជាប់​ទៅ​គេហទំព័រ​ទាក់ទង

ព័ត៌មាន​​ថ្មី

សមាជិក​សភា​អាមេរិកាំង​រិះគន់​វិសោធនកម្ម​រដ្ឋធម្មនុញ្ញ​កម្ពុជា


រូបឯកសារ៖ លោក​ Alan Lowenthal​ កំពុង​ថ្លែង​សុន្ទរកថា​នៅ​ក្នុង​កិច្ចពិភាក្សា​អំពី​ស្ថាន​ភាព​នយោបាយ​ប្រទេស​កម្ពុជា​ និង​ តួនាទី​របស់​សហរដ្ឋ​អាមេរិក​ នៅ​ទីក្រុង​ Annandale​ រដ្ឋ​វឺជីនៀ នៅ​ថ្ងៃ​ទី​ ៣​ ខែ​ធ្នូ​ ឆ្នាំ​ ២០១៧​។ (លឹម​ ហ្គេច​ហៀង/VOA)
រូបឯកសារ៖ លោក​ Alan Lowenthal​ កំពុង​ថ្លែង​សុន្ទរកថា​នៅ​ក្នុង​កិច្ចពិភាក្សា​អំពី​ស្ថាន​ភាព​នយោបាយ​ប្រទេស​កម្ពុជា​ និង​ តួនាទី​របស់​សហរដ្ឋ​អាមេរិក​ នៅ​ទីក្រុង​ Annandale​ រដ្ឋ​វឺជីនៀ នៅ​ថ្ងៃ​ទី​ ៣​ ខែ​ធ្នូ​ ឆ្នាំ​ ២០១៧​។ (លឹម​ ហ្គេច​ហៀង/VOA)

សមាជិក​សភាអាមេរិកាំង​មួយ​រូប​ដែល​តំណាង​ឱ្យ​សហគមន៍ខ្មែរ​នៅរដ្ឋ​កាលីហ្វញ៉ា​ បាន​រិះគន់​ការធ្វើ​វិសោធនកម្ម​រដ្ឋ​ធម្មនុញ្ញ​ និង​ក្រម​ព្រហ្មទណ្ឌ​ថា​ជាយុទ្ធនាការ​ជ្រុលហួស​របស់​លោក​ ហ៊ុន សែន​ ដើម្បី​ការពារ​អំណាច​ និង​បំបាត់​សំឡេង​ប្រឆាំង។

លោក​អាឡាំង ឡូវឹនសល (Alan Lowenthal) ​អ្នក​តំណាងរាស្រ្ត​នៃ​គណបក្ស​ប្រជាធិបតេយ្យ​ប្រចាំ​រដ្ឋ​កាលីហ្វញ៉ា​ បាន​សរសេរ​នៅ​លើ​ទំព័រហ្វេសប៊ុក​របស់​លោក​ថា៖

«ការ​បង្រ្កាប​លើ​សេរីភាព​នយោបាយ​ក្នុង​ប្រទេស​កម្ពុជា​នៅ​បន្ត​។ សភាជាតិ​កម្ពុជា​ដែល​ជា​សភា​ប្រថាប់ត្រា​របស់​របបលោក​នាយក​រដ្ឋមន្ត្រី​ ហ៊ុន សែន ​ជាច្រើន​ទសវត្សរ៍​បាន​បោះឆ្នោត​ដើម្បី​ដាក់​ទោស​ព្រហ្មទណ្ឌ​ដល់​អ្នក​ដែល​ហ៊ាន​រិះគន់​ព្រះមហាក្សត្រ​ និង​សមាជិក​នៃ​រដ្ឋាភិបាល​លោក​ហ៊ុន សែន ​ដោយ​ចាប់​ដាក់​ពន្ធនាគារ និង​ពិន័យជាប្រាក់‍»។

កាលពី​ថ្ងៃពុធ ​ក្រុម​សមាជិក​រដ្ឋ​សភា​កម្ពុជាបាន​បោះ​ឆ្នោត​អនុម័ត​ជា​ឯក​ច្ឆន្ទ​លើសេចក្តី​ស្នើ​វិសោធន​កម្ម​មាត្រា​ចំនួន​ប្រាំ​នៃ​រដ្ឋ​ធម្មនុញ្ញ​ ​និង​វិសោធន​កម្ម​ក្រម​ព្រហ្មទណ្ឌ ​ដោយ​បន្ថែម​ទោស​ទណ្ឌ​ដល់​ជន​ណា​ដែល​ប្រមាថ​ព្រះ​មហា​ក្សត្រ​ខ្មែរ ​ប៉ុន្តែ​ក្រុម​អ្នក​សង្កេត​ការណ៍​នានា​បាន​ចាត់​ទុក​ថា​ វា​ជា​«គ្រោះថ្នាក់‍»​មួយ​ដល់​សេរីភាព​ពលរដ្ឋ​នៅក្នុង​ប្រទេស។

លោក​ អាឡាំង ឡូវឹនសល​ បាន​បន្ថែម​ថា​ វាគ្រាន់តែ​ជា​លេស​មួយ​របស់​លោក​ហ៊ុន សែន ​ដើម្បី​បង្ក្រាប​ក្រុម​ប្រឆាំង​ទេ៖

«នេះ​គ្រាន់តែជា​ការបន្ត​កិច្ចខិតខំ​ប្រឹងប្រែង​របស់​របប​លោក​ហ៊ុន សែន ​ក្នុងការ​លុបបំបាត់​ និង​ធ្វើ​ឱ្យ​ក្រុមបក្ស​ប្រឆាំង​ខុសច្បាប់​ នៅមុនពេល​ការបោះឆ្នោត​ជាតិ​នៅឆ្នាំ​នេះ។ ខ្ញុំ​ចូលរួម​ជាមួយ​នឹង​សហគមន៍​អន្តរជាតិ​សម្តែង​ការ​ខឹង​សម្បារ​ចំពោះ​ការពង្រីក​ការ​គ្រប់គ្រង​ផ្តាច់ការ​ ដោយ​លោក​ហ៊ុន សែន ​ដែល​កំពុងតែ​រឹតត្បិត​សេរីភាព​របស់​ពលរដ្ឋ​កម្ពុជា‍»។​

បន្ទាប់ពី​វិសោធនកម្ម​នេះ​ចូល​ជា​ធរមាន​អ្នក​ដែល​ហ៊ាន​ប្រមាថ​អង្គ​ព្រះ​មហា​ក្សត្រ នឹងត្រូវ​ផ្តន្ទាទោស​ដាក់​ពន្ធនាគារ​ពី​១​ឆ្នាំ​ទៅ​៥​ឆ្នាំ​ និង​ពិន័យ​ជា​ប្រាក់​ពី​២​លាន​រៀល​ទៅ​១០​លាន​រៀល។​ ចំពោះ​នីតិបុគ្គល​ក៏អាច​ត្រូវ​បាន​ផ្តន្ទា​ទោស​ពិន័យ​ជា​ប្រាក់​ពី​១០​លាន​រៀលទៅ​៥០​លាន​រៀល​ ផងដែរ។

លោក​ ឡេង ប៉េងឡុង​ អ្នក​នាំពាក្យ​រដ្ឋ​សភា​ជាតិ​ បាន​បញ្ជាក់​ប្រាប់​វីអូអេថា ​ទម្ងន់​ទោស​ដែល​កំណត់​ក្នុង​មាត្រា​ថ្មី​នេះ​ គឺ​នៅមាន​កម្រិត​ទាប​នៅ​ឡើយ​ បើធៀប​នឹង​បណ្តា​ប្រទេស​ផ្សេង​ទៀត​ រួមមាន​ប្រទេស​ម៉ាឡេស៊ី​ អារ៉ាប់ប៊ីសាអូឌីត​ និង​ប្រទេស​ថៃ​ដែល​ដាក់ពន្ធនាគារ​អ្នក​ហ៊ាន​ប្រមាថ​មហាក្សត្រ​រហូត​ដល់​១៥ឆ្នាំ​ឯណោះ។

លោក​បាន​បន្ថែម​ថា៖

«អីចឹង​ ការណ៍ដែល​យើង​គោរព​បូជា​ព្រះ​មហា​ក្សត្រ​ តាម​រយៈ​ការ​ប្រឆាំងការ​ប្រមាថ​ព្រះ​មហាក្សត្រ​ហ្នឹង​ វា​ជា​ការ​ត្រឹម​ត្រូវ​ហើយ‍»៕

XS
SM
MD
LG