ការវាយប្រហាររបស់ក្រុមសម្ព័ន្ធមិត្តដែលដឹកនាំដោយសហរដ្ឋអាមេរិកប្រឆាំងនឹងក្រុមរដ្ឋឥស្លាមបានសម្លាប់ជនស៊ីវិលក្នុងប្រទេសអ៊ីរ៉ាក់និងស៊ីរីអស់ចំនួនជាង១០០០នាក់ចាប់តាំងពីឆ្នាំ២០១៤មក។
របាយការណ៍ប្រចាំខែមួយស្តីពីជនរងគ្រោះស៊ីវិលបានឲ្យដឹងថា ក្រុមសម្ព័ន្ធមិត្តបានបញ្ជាក់ពីតួលេខជនស៊ីវិលដែលបានស្លាប់នៅក្នុងការវាយប្រហារផ្លូវអាកាសចំនួន១១៣៩នាក់ ចាប់តាំងពីចាប់ផ្តើមប្រតិបត្តិការរវាងខែ សីហា ឆ្នាំ ២០១៤ ដល់ខែ វិច្ឆិកា ឆ្នាំ ២០១៨ មក។
របាយការណ៍នោះបានឲ្យដឹងថា «ក្រុមសម្ព័ន្ធមិត្តបានធ្វើការវាយប្រហារទាំងអស់ចំនួន៣១៤០៦ ក្នុងចន្លោះខែ សីហា ឆ្នាំ ២០១៤ និងខែ វិច្ឆិកា ឆ្នាំ ២០១៨។ យោងតាមទិន្នន័យដែលមាន ក្នុងអំឡុងពេលនោះ របាយការណ៍ CJTF-OIR បានវាយតម្លៃថា ជនស៊ីវិលយ៉ាងហោចណាស់ចំនួន១១៣៩នាក់ ត្រូវបានសម្លាប់ដោយអចេតនា ដោយការវាយប្រហាររបស់ក្រុមសម្ព័ន្ធមិត្ត ចាប់តាំងពីចាប់ផ្តើមអនុវត្តប្រតិបត្តិការ Operation Inherent Resolve មក»។ ប្រតិបត្តិការនោះបានឲ្យដឹងទៀតថា ជនជាតិអ៊ីរ៉ាក់និងស៊ីរីជិត៨លាននាក់ត្រូវបានរំដោះពីការដឹកនាំរបស់ក្រុមរដ្ឋឥស្លាម ក្នុងអំឡុងពេលនោះ។
សេចក្តីរាយការណ៍នានាបានឲ្យដឹងថា មានជនស៊ីវិលចំនួន១៨៤នាក់ផ្សេងទៀតត្រូវបានសម្លាប់ដោយអចេតនា កំពុងត្រូវបានវាយតម្លៃ។
កាលពីខែ កក្កដា ក្រុមសម្ព័ន្ធមិត្តបានសារភាពថា ជនស៊ីវិលចំនួន១០៥៩នាក់ត្រូវបានសម្លាប់នៅក្នុងការវាយប្រហារផ្លូវអាកាសចាប់ពីឆ្នាំ២០១៤មក ខណៈដែលមានការអំពាវនាវពីអង្គការសិទ្ធិមនុស្សឲ្យធ្វើបច្ចុប្បន្នភាពទៅលើតួលេខអ្នកស្លាប់ ដែលបានចោទប្រកាន់ក្រុមសម្ព័ន្ធមិត្តថាមិនបានរាប់ចំនួនតួលេខជនស៊ីវិលដែលត្រូវបានសម្លាប់ឲ្យអស់ក្នុងអំឡុងពេលនៃការវាយប្រហារទៅលើក្រុមរដ្ឋឥស្លាម៕
