ក្រុមរដ្ឋអាជ្ញាសហរដ្ឋអាមេរិកកាលពីថ្ងៃព្រហស្បតិ៍បានប្រកាសចោទប្រកាន់ប្រឆាំងនឹងអ្នកបង្កើតកម្មវិធីកុំព្យូទ័រជនជាតិកូរ៉េខាងជើងម្នាក់ថាមានជាប់ពាក់ព័ន្ធជាមួយនឹងការចូលវាយប្រហារតាមប្រព័ន្ធកុំព្យូទ័រដែលបានកើតឡើងជាបន្តបន្ទាប់នៅអំឡុងប៉ុន្មានឆ្នាំថ្មីៗនេះ រួមទាំងការចូលលួចទិន្នន័យក្នុងប្រព័ន្ធកុំព្យូទ័ររបស់ក្រុមហ៊ុនផលិតភាពយន្ត Sony Pictures Entertainment កាលពីឆ្នាំ២០១៤ និងការវាយប្រហារទៅលើធនាគារជាតិរបស់ប្រទេសបង់ក្លាដែសកាលពីឆ្នាំ២០១៦។
រដ្ឋអាជ្ញាបានរកឃើញអត្តសញ្ញាណជនដែលបានវាយប្រហារលើប្រព័ន្ធកុំព្យូទ័រនោះ មានឈ្មោះថា Park Jin Hyok ដែលជាអ្នកបង្កើតកម្មវិធីកុំព្យូទ័រឲ្យក្រុមហ៊ុន
Chosun Expo ដែលជាក្រុមហ៊ុនរងការចោទប្រកាន់ថាជារបស់រដ្ឋាភិបាលកូរ៉េខាងជើង។ ជនឈ្មោះ Park និងអ្នកវាយប្រហារតាមកុំព្យូទ័រមិនស្គាល់អត្តសញ្ញាណមួយក្រុមទៀតត្រូវបានចោទថាមានជាប់ពាក់ព័ន្ធនឹងការចូលលួចបន្លំតាមប្រព័ន្ធកុំព្យូទ័រអស់រយៈពេលជាច្រើនឆ្នាំ និងការលួចបន្លំតាមប្រតិបត្តិការក្នុងប្រព័ន្ធអ៊ិនធឺណិតនៅជុំវិញពិភពលោក ខណៈធ្វើប្រតិបត្តិការចេញពីកូរ៉េខាងជើង ប្រទេសចិន និងពីប្រទេសផ្សេងៗទៀត។
ជនឈ្មោះ Park ដែលរងការចោទប្រកាន់ពីការលួចឃុបឃិតនៅក្នុងការលួចបន្លំតាមប្រព័ន្ធកុំព្យូទ័រនៅមិនទាន់បានចាប់ខ្លួននៅឡើយ។ កងកម្លាំង FBI បានបិទប្រកាសតាមចាប់ខ្លួនជននេះ។ ក្រសួងហរិញ្ញវត្ថុសហរដ្ឋអាមេរិកបានប្រកាសដាក់ទណ្ឌកម្មប្រឆាំងនឹងជនឈ្មោះ Park និងក្រុមហ៊ុន Chosun Expo ពីបទជាប់ពាក់ព័ន្ធជាមួយនឹងសកម្មភាពវាយប្រហារទាំងនេះ៕
