សហរដ្ឋអាមេរិកបាននិយាយកាលពីថ្ងៃព្រហស្បតិ៍ថា ការស្ថាបនាកម្លាំងនុយក្លេអ៊ែររបស់ចិនយ៉ាងលឿន គឺជាការព្រួយកង្វល់មួយ ហើយបានអំពាវនាវឲ្យរដ្ឋាភិបាលក្រុងប៉េកាំងចូលរួមជាមួយស.រ.អ.«ស្តីពីវិធានការអនុវត្តដើម្បីកាត់បន្ថយគ្រោះថ្នាក់នៃការប្រកួតប្រជែងអាវុធនេះ»។ នេះបើតាមសេចក្តីរាយការណ៍របស់ទីភ្នាក់ងារព័ត៌មាន Reuters។
លោក Ned Price អ្នកនាំពាក្យក្រសួងការបរទេសសហរដ្ឋអាមេរិក បានប្រាប់សន្និសីទកាសែតថា ការស្ថាបនាអាវុធនេះ បានបង្ហាញកាន់តែច្បាស់ ហើយចិនហាក់ដូចជាបានងាកចេញពីយុទ្ធសាស្ត្រនុយក្លែអ៊ែររាប់ទសវត្សរ៍ ដែលពឹងផ្អែកលើការកំញើញបន្តិចបន្តួច»។
លោក Price បានឆ្លើយទៅនឹងសំណួរអំពីសេចក្តីរាយការណ៍នៅក្នុងកាសែត Washington Post ដែលថា ចិនបានចាប់ផ្តើមស្ថាបនាកាំជ្រួចមីស៊ីលថ្មីជាង១រយនៅក្នុងតំបន់វាលខ្សាច់នៅផ្នែកខាងលិចប្រទេស។
លោក Price បាននិយាយទៀតថា «របាយការណ៍ទាំងនេះ ហើយនឹងសភាពការណ៍ផ្សេងៗបានបង្ហាញថា អាវុធរបស់ចិននឹងកើនឡើងកាន់តែច្រើនយ៉ាងឆាប់រហ័ស ប្រហែលលើសកម្រិតដែលគេប៉ាន់ស្មានកាលពីពេលមុន»។
លោកបាននិយាយទៀតថា «ការស្ថាបនានេះ ជាការព្រួយកង្វល់មួយ។ វាបង្កើតជាសំណួរអំពីគោលបំណងរបស់ចិន។ ហើយសម្រាប់យើង វាបញ្ជាក់ពីសារៈសំខាន់នៃការអនុវត្តវិធានការកាត់បន្ថយគ្រោះថ្នាក់នៃអាវុធនុយក្លេអ៊ែរ»។
លោក Price ក៏បាននិយាយដែរថា រដ្ឋាភិបាលក្រុងវ៉ាស៊ីនតោន បានតាមដានសុន្ទរកថារបស់មេដឹកនាំចិនលោក Xi Jinping នៅឯពិធីខួប១០០ឆ្នាំនៃការបង្កើតបក្សកុម្មុយនិស្តចិនកាលពីថ្ងៃព្រហស្បតិ៍ ក៏ប៉ុន្តែលោក «មិនបានអត្ថាធិប្បាយឲ្យជាក់លាក់ទេ»។
ក្នុងសុន្ទរកថារបស់លោក លោក Xi បានព្រមានថា កងទ័ពបរទេសដែលប៉ុនប៉ងសម្លុតចិន នឹងទទួលការឆ្លើយតបវិញ ហើយលោកបានប្តេជ្ញាពង្រឹងយោធារបស់ចិន។ លោកក៏បានសន្យាការបង្រួបបង្រួមជាមួយកោះតៃវ៉ាន់ ហើយថា ស្ថិរភាពសង្គមនឹងកើតមាននៅក្នុងក្រុងហុងកុង ខណៈចិនការពារសន្តិសុខ និងអធិបតេយ្យភាពរបស់ខ្លួន៕
