សហរដ្ឋអាមេរិកបានប្រារព្ធពិធីបុណ្យសពថ្នាក់រដ្ឋលាគ្នាជាលើកចុងក្រោយសម្រាប់អតីតប្រធានាធិបតី លោក George H.W. Bush នៅក្នុងរដ្ឋធានីវ៉ាស៊ីនតោន ដោយមានការចូលរួមពីអ្នកនយោបាយអាមេរិកាំងថ្នាក់កំពូលៗ ក៏ដូចជា វត្តមានរបស់អតីតមេដឹកនាំនានានៅជុំវិញពិភពលោក។
អតីតប្រធានាធិបតីសហរដ្ឋអាមេរិកនានាមានដូចជា លោក Jimmy Carter លោកBill Clinton និងលោក Barack Obama រួមទាំងប្រធានាធិបតីនាពេលបច្ចុប្បន្នលោក Donald Trump ក៏បានចូលរួមពិធីបុណ្យសពលោក Bushដែលត្រូវបានរៀបចំឡើងនៅឯព្រះវិហារជាតិកាតូលិក National Cathedral ក្នុងរដ្ឋធានីវ៉ាស៊ីនតោនផងដែរ។
អតីតប្រធានាធិបតី លោកGeorge W. Bush ដែលជាកូនប្រុសរបស់លោកGeorge H.W. Bush បានថ្លែងទៅកាន់ភ្ញៀវដែលបានអញ្ជើញចូលរួមក្នុងពិធីបុណ្យសពរបស់ឪពុកលោកនៅឯវិហារជាតិកាតូលិកថា«ឳពុករបស់ខ្ញុំបានបង្រៀនពួកយើងឲ្យដឹងថា សេវាសាធារណៈមានសារៈសំខាន់និងចាំបាច់បំផុត។ លោកបានលះបង់ទាំងកាយនិងចិត្តដើម្បីបម្រើប្រទេសជាតិ»។
លោក Trump មិនបានថ្លែងអ្វីនៅក្នុងពិធីបុណ្យសពនេះទេ ប៉ុន្តែលោកបានបង្ហោះសារនៅលើ Twitter កាលពីប៉ុន្មានថ្ងៃមុនពិធីបុណ្យសពថា លោកនឹងចូលរួមពិធីបុណ្យសពជាមួយនឹងក្រុមគ្រួសាររបស់លោក Bush។ នេះមិនមែនជាបុណ្យសពទេ ប៉ុន្តែជាថ្ងៃប្រារព្ធពិធីអបអរដល់បុរសដ៏អស្ចារ្យ និងប្រកបដោយកិតិ្តយសម្នាក់។ «យើងនឹងចងចាំរូបលោកជានិច្ច»។
លោកស្រីអធិការបតីអាល្លឺម៉ង់ Angela Merkel ព្រះអង្គម្ចាស់ចក្រភពអង់គ្លេសPrince Charles សេ្តចប្រទេសហ្ស៊កដានី King Abdullah និងប្រធានាធិបតីប្រទេសប៉ូឡូញ លោក Andrzej Duda ក៏ស្ថិតក្នុងចំណោមមេដឹកនាំប្រទេសផ្សេងៗទៀតចូលរួមពិធីបុណ្យសពលោកអតីតប្រធានាធិបតីអាមេរិកទី៤១រូបនេះ ដែលបានទទួលមរណភាពកាលពីសប្តាហ៍មុនក្នុងជន្មាយុ៩៤ឆ្នាំ។
អតីតនាយករដ្ឋមន្រ្តីប្រទេសកាណាដាលោក Brian Mulroney អតីតសមាជិកព្រឹទ្ធសភា លោកAlan Simpson និងអ្នកប្រវត្តិវិទូលោក Jon Meacham ដែលជាអ្នកសរសេរអំពីប្រវត្តិរូបរបស់លោក Bush បានឡើងថ្លែងវិយោគកថា សរសើរចំពោះស្នាដៃរបស់លោក Bushផងដែរ។ លោកMulroney ដែលជាអតីតមេដឹកនាំប្រទេសកាណាដាកាលនៅជំនាន់លោក Bush កាន់តំណែងជាប្រធានាធិបតីអាមេរិកពីឆ្នាំ១៩៨៩ដល់ឆ្នាំ១៩៩៣បានថ្លែងថា នៅក្នុងប្រវត្តិសាស្រ្តអាមេរិកលោកមិនជឿថាមានប្រធានាធិបតីណាដែលមានសេចក្តីក្លាហាន មានគោលការណ៍ និងគួរឲ្យគោរពជាងលោក George Herbert Walker Bush នេះនោះទេ»។
លោកអតីតសមាជិកព្រឹទ្ធសភា Simpsonបានរឮកអំពីមិត្តភាពដ៏យូរអង្វែងរវាងលោក និងលោក Bush ដោយលោកបានថ្លែងថា លោក Bush គឺជា មនុស្សម្នាក់ពូកែតាំងពីកើតរហូតដល់ស្លាប់ទៅវិញ។ លោកគឺ «មនុស្សឧត្តុងឧត្តមម្នាក់»។ ចំណែកឯលោក Meacham បានចាត់ទុកលោក Bush ជាទាហានដ៏អស្ចារ្យចុងក្រោយម្នាក់របស់អាមេរិក។ លោកបានថ្លែងថាជីវិតរបស់លោក Bushបានលះបង់សម្រាប់បេសកកម្មដ៏សំខាន់នៅពេលលោកបម្រើការងារជាអ្នកបើកយន្តហោះចម្បាំងនៅពេលលោកមានអាយុ២០ឆ្នាំ។ លោកគឺជាមនុស្សតែម្នាក់គត់ដែលបានរួចពីការចាប់ខ្លួនឬសម្លាប់ដោយទាហានជប៉ុននៅអំឡុងសង្គ្រាមលោកលើកទី២នៅតំបន់ប៉ាស៊ីហ្វីកកាលពីឆ្នាំ១៩៤៤។
ចាប់តាំងពីថ្ងៃដែលលោកបានស្លាប់ លោក Bush ត្រូវបានគេចង់ចាំអំពីវីរភាពរបស់លោក នៅពេលលោកបម្រើការងារជាអ្នកបើកយន្តហោះ ជាដឹកនាំវេទិកាពិភពលោកនៅពេលដែលសហភាពសូវៀតបានដួលរលំ និងការរួមបញ្ចូលគ្នារវាងអាល្លឺម៉ង់ខាងកើតនិងអាល្លឺម៉ង់ខាងលិចកាលពីដើមទសវត្សរ៍ ១៩៩០ និងភាពសប្បុរសរបស់លោកទាំងក្នុងជីវិតផ្ទាល់ខ្លួន និងដល់សាធារណៈ។
រថយន្តបានដឹកមឈូសដែលមានគ្របទង់ជាតិអាមេរិកចេញពីវិមានរដ្ឋសភាឆ្ពោះទៅវិហារជាតិកាតូលិក National Cathedral ដែលកន្លែងសម្រាប់រៀបចំពិធីបុណ្យសពរបស់លោក Bush បន្ទាប់ពីសពរបស់លោកត្រូវបានកម្កល់ទុកនៅកណ្តាលវិមានរដ្ឋសភាអាមេរិកតាំងពីយប់ថ្ងៃចន្ទមក ដែលមានមនុស្សរាប់ពាន់នាក់បានចូលគោរពវិញ្ញាណក្ខន្ឌលោកជាលើកចុងក្រោយ៕
