ក្រុមចលនានិស្សិតដើម្បីលទ្ធិប្រជាធិបតេយ្យ ដែលមានមូលដ្ឋាននៅសហរដ្ឋអាមេរិក នៅថ្ងៃសុក្រនេះ បានអំពាវនាវឲ្យរដ្ឋាភិបាលកម្ពុជាជំរុញយោធាវៀតណាមរុះរើតង់ ដែលវៀតណាមបានបោះនៅតាមតំបន់ព្រំដែនរវាងប្រទេសទាំងពីរ។
ការអំពាវនាវនេះធ្វើឡើង ក្រោយពីមានរបាយការណ៍ថា យោធាវៀតណាមបានបង្កើនការបោះតង់នៅតាមតំបន់ព្រំដែន រហូតដល់ ២៥៦ កន្លែង ទោះបីជាមានការជំទាស់ និងទាមទារពីរដ្ឋាភិបាលកម្ពុជា ឲ្យភាគីវៀតណាមរុះរើតង់ទាំងនោះចេញ ហើយរក្សាតំបន់ដែលមិនទាន់មានការឯកភាពគ្នាឲ្យនៅស្ថានភាពដូចមុនពេលមានការផ្ទុះឡើងនូវការរីករាលដាលនៃជំងឺកូវីដ១៩ ក៏ដោយ។
លោក ទូច វិបុល ប្រធានចលនានិស្សិតដើម្បីលទ្ធិប្រជាធិបតេយ្យ ដែលទើបនឹងប្រកាសដំណើរការឡើងវិញក្នុងសហរដ្ឋអាមេរិកកាលពីពេលថ្មីៗនេះ បានមានប្រសាសន៍ប្រាប់វីអូអេ នៅថ្ងៃសុក្រនេះថា ការបោះតង់របស់ភាគីវៀតណាម គឺជាការរំលោភបំពានអធិបតេយ្យភាពរបស់កម្ពុជា។
«ទោះបីវៀតណាមយកហេតុផលរឿងកូវីដ១៩ ឬក៏ថា ជាតំបន់ដែលមិនទាន់ឯកភាពគ្នា ហើយថាវៀតណាមកំពុងតែបោះតង់នៅលើដែនដីរបស់ខ្លួនយ៉ាងណាក៏ដោយ គឺមតិជាតិ និងអន្តរជាតិ ជាពិសេសប្រជាពលរដ្ឋខ្មែរ មិនអាចទទួលយកបានទេ»។
ភាគីកម្ពុជា និងវៀតណាម បានបញ្ជូនកំណត់ទូតឲ្យគ្នាទៅវិញទៅមកលើបញ្ហាបោះតង់នេះ។
ក្រសួងការបរទេសវៀតណាមបានផ្ញើកំណត់ទូតឲ្យកម្ពុជា នៅថ្ងៃទី២៧ ខែឧសភា ដោយសរសេរថា ការបោះតង់នៅតាមបណ្តោយព្រំដែនរវាងប្រទេសទាំងពីរ គឺដើម្បីបង្ការនិងគ្រប់គ្រងការធ្វើដំណើរឆ្លងព្រំដែន ក្នុងគ្រាមានកូវីដ១៩។
នៅថ្ងៃទី១ ខែមិថុនា ក្រសួងការបរទេសកម្ពុជាបានកោះហៅឯកអគ្គរដ្ឋទូតវៀតណាមប្រចាំកម្ពុជា គឺលោក Vu Quang Minh ឲ្យមកបំភ្លឺអំពីករណីវៀតណាមបោះតង់នៅតាមតំបន់ព្រំដែន ដែលមិនទាន់ឯកភាពគ្នារវាងប្រទេសទាំងពីរ ហើយស្នើឲ្យភាគីវៀតណាមរុះរើតង់ទាំងនោះចេញឲ្យបានឆាប់ និងរក្សាស្ថានភាពដើមមិនកែប្រែនៅតាមតំបន់នោះ រហូតដល់គណៈកម្មការព្រំដែននៃប្រទេសទាំងពីរ ដោះស្រាយចប់សព្វគ្រប់សិន៕
