ប្រទេសវៀតណាមបានរុះរើតង់ទាំងអស់តាមបណ្តោយព្រំដែនជាមួយកម្ពុជា ស្ថិតនៅក្នុងតំបន់មិនទាន់មានឯកភាពគ្នា ចំពោះការបោះបង្គោលខណ្ឌសីមា នៃព្រំដែនរវាងប្រទេសទាំងពីរ។ នេះបើយោងតាមការបកប្រែក្រៅផ្លូវការនៃលិខិតមួយច្បាប់ សរសេរជាភាសាវៀតណាមរបស់គណៈកម្មាធិការប្រជាជនវៀតណាម ខេត្តអានយ៉ាង ដែលវីអូអេទទួលបាននៅថ្ងៃសុក្រនេះ។
លិខិតចុះថ្ងៃទី១៣ ខែឧសភា ឆ្នាំ ២០២០ នេះ ដែលផ្ញើជូនអាជ្ញាធរខេត្តកណ្តាលរបស់កម្ពុជា បញ្ជាក់ថា ភាគីវៀតណាមបានបញ្ជាឲ្យកងកម្លាំងរបស់ខ្លួនចុះរុះរើចេញអស់ហើយរាល់តង់ទាំងអស់ ដែលបោះ«ជាប់នឹងខ្សែព្រំប្រទល់ខេត្តកណ្តាល»នោះ។
ការផ្ញើលិខិតរបស់គណៈកម្មាធិការប្រជាជនវៀតណាម ខេត្តអានយ៉ាងនេះ ធ្វើឡើងក្រោយពីកម្ពជាបានបញ្ជូនកំណត់ទូតមួយទៅឲ្យភាគីវៀតណាម កាលពីថ្ងៃទី១៣ ខែឧសភា ឆ្នាំ ២០២០ ដោយចាត់ទុកវត្តមានយោធារបស់វៀតណាមនៅតំបន់តាមបណ្តោយព្រំដែន ដែលមិនទាន់មានឯកភាពគ្នាថា ជា«ការរំលោភកិច្ចព្រមព្រៀងព្រំដែន» រវាងប្រទេសទាំងពីរ។ នេះបើយោងតាមរបាយការណ៍ព័ត៌មាននៃប្រព័ន្ធផ្សព្វផ្សាយក្នុងស្រុក។
សារព័ត៌មានវីអូឌីបានរាយការណ៍ កាលពីថ្ងៃពុធ ដោយដកស្រង់សម្តីអ្នកនាំពាក្យក្រសួងការបរទេសកម្ពុជា លោក កុយ គួង ដែលថា វៀតណាមបានបោះតង់និងដាក់កម្លាំងយោធាចំនួន ៣១ កន្លែងនៅស្រុកលើកដែក និងស្រុកកោះធំ ក្នុងខេត្តកណ្តាល។
ភាគីវៀតណាមបានបញ្ជាក់ក្នុងលិខិតរបស់ខ្លួនថា ការបោះតង់ទាំងនោះ «គឺគ្រាន់តែជាការងារបណ្តោះអាសន្នក្នុងគោលបំណងបង្ការការរាតត្បាតនៃជំងឺកូវីដ១៩» ដែលអាចឆ្លងរវាងខេត្តអានយ៉ាង របស់វៀតណាម និងខេត្តកណ្តាលរបស់កម្ពុជា។
វីអូអេ មិនទាន់អាចទាក់ទងលោក កុយ គួង អ្នកនាំពាក្យក្រសួងការបរទេសកម្ពុជា ដើម្បីស្នើសុំការបញ្ជាក់បន្ថែមបាននៅឡើយទេ នៅត្រឹមម៉ោង៧កន្លះល្ងាចថ្ងៃសុក្រនេះ ម៉ោងនៅក្នុងប្រទេសកម្ពុជា។ ចំណែកលោក ផៃ ស៊ីផាន អ្នកនាំពាក្យរដ្ឋាភិបាលកម្ពុជា មានប្រសាសន៍ថា លោកមិនទាន់ទទួលបានព័ត៌មានអំពីការរុះរើតង់របស់ភាគីវៀតណាមនេះនៅឡើយទេ៕
