ក្រសួងការបរទេសកម្ពុជា កាលពីថ្ងៃច័ន្ទ បានកោះហៅឯកអគ្គរដ្ឋទូតវៀតណាមប្រចាំកម្ពុជាគឺលោក Vu Quang Minh ឲ្យមកបំភ្លឺអំពីករណីវៀតណាមបោះតង់៣១កន្លែងនៅតាមតំបន់ព្រំដែនដែលមិនទាន់ឯកភាពគ្នារវាងប្រទេសទាំងនេះ។
សេចក្តីប្រកាសព័ត៌មានរបស់ក្រសួងការបរទេសនិងសហប្រតិបត្តិការអន្តរជាតិកម្ពុជាចុះផ្សាយថ្ងៃទី២ខែមិថុនាឆ្នាំ២០២០នេះ បានរៀបរាប់ថា កម្ពុជាបានស្នើឲ្យវៀតណាមរុះរើតង់ចេញទាំងអស់ឲ្យបានឆាប់។ ទោះជាយ៉ាងណាសេចក្តីប្រកាសនេះមិនបានឲ្យដឹងថា ឯកអគ្គរដ្ឋទូតវៀតណាមបំភ្លឺយ៉ាងណាទេ។
ការណ៍នេះកើតឡើង ក្រោយពីវៀតណាមបានអះអាងតាមរយៈលិខិតមួយច្បាប់កាលពីខែឧសភាឆ្នាំ២០២០ថាប្រទេសវៀតណាមបានរុះរើតង់ទាំងនោះចេញអស់ហើយ។ ប៉ុន្តែលោកកុយ គួង អ្នកនាំពាក្យក្រសួងការបរទេសកម្ពុជា កន្លងមក បានប្រាប់សារព័ត៌ក្នុងស្រុកថាវៀតណាមបានរុះរើតង់ចេញតែ៣កន្លែងប៉ុណ្ណោះ។
ក្រសួងការបរទេសកម្ពុជាបានបញ្ជាក់ថា ភាគីវៀតណាម កាលពីថ្ងៃទី២៨ខែឧសភា បានផ្ញើកំណត់ទូតឆ្លើយតបនឹងការស្នើសុំរបស់កម្ពុជា ដោយនិយាយថា អាជ្ញាធរវៀតណាមបានសន្យាថា នឹងរុះរើតង់ដែលបានបោះជាបណ្តោះអាសន្នទាំងអស់ចេញពីតំបន់នោះ ហើយថា ការបោះតង់ទាំងនោះគឺជាវិធានការបណ្តោះអាសន្នដើម្បីទប់ស្កាត់ការឆ្លងរាលដាលឆ្លងដែននៃជំងឺកូវីដ១៩។
តាមអាជ្ញាធរកម្ពុជា តង់ដែលវៀតណាមបានបោះនោះគឺស្ថិតនៅស្រុកលើកដែក និងស្រុកកោះធំក្នុងខេត្តកណ្តាលជាប់នឹងខេត្តអានយ៉ាងនៃប្រទេសវៀតណាម។
វីអូអេ មិនទាន់ឃើញមានការឆ្លើយពីស្ថានទូតវៀតណាមប្រចាំក្រុងភ្នំពេញនៅឡើយទេនៅត្រឹមថ្ងៃអង្គារនេះ៕
