ភ្ជាប់​ទៅ​គេហទំព័រ​ទាក់ទង

រដ្ឋមន្ត្រី​ក្រសួង​យុត្តិធម៌​អាមេរិក​បដិសេធ​ការ​ចោទប្រកាន់​ដែល​ថា លោក​កុហក​ថា​មិន​បាន​ដឹង​អំពី​ទំនាក់ទំនង​រវាង​យុទ្ធនាការ​លោក ត្រាំ និង​រុស្ស៊ី


លោក Jeff Sessions ​រដ្ឋមន្ត្រី​ក្រសួង​យុត្តិធម៌​អាមេរិក​អញ្ជើញ​ផ្តល់​សក្ខីកម្ម​នៅ​ក្នុង​សវនាការ​គណៈកម្មាធិការ​យុត្តិធម៌​របស់​សភា​ នៅ​វិមាន​សភា Capitol Hill ក្នុង​រដ្ឋធានី​វ៉ាស៊ីនតោន កាលពី​ថ្ងៃទី១៤ ខែវិច្ឆិកា ឆ្នាំ២០១៧។

លោក Jeff Sessions ​រដ្ឋមន្ត្រី​ក្រសួង​យុត្តិធម៌​អាមេរិក កាល​ពី​ថ្ងៃ​អង្គារ បាន​បដិសេធ​ចំពោះ​ការ​ចោទប្រកាន់​ដែល​ថា លោក​បាន​កុហក​ទៅ​តំណាងរាស្ត្រ នៅ​ពេល​ដែល​លោក​បាន​ផ្តល់​សក្ខីកម្ម​កាល​ពី​លើក​មុន ​ថា​លោក​មិន​បាន​ដឹង​អំពី​ទំនាក់ទំនង​រវាង​យុទ្ធនាការ​ឃោសនា​បោះឆ្នោត​លោក​ ដូណាល់ ត្រាំ កាល​ពី​ឆ្នាំ​មុន ជាមួយ​នឹង​ភ្នាក់ងារ​រុស្ស៊ី​នោះ​ទេ។ ​

លោក Sessions បាន​ថ្លែង​ទៅ​កាន់​គណៈកម្មាធិការ​អង្គចៅក្រម​សភា​ថា លោក​ចាំ​មិន​បាន​ថា​បាន​ជួប​ជាមួយ​នឹង​លោក George Papadopoulos ដែល​ជា​ជំនួយការ​យុទ្ធនាការ​ឃោសនា​បោះឆ្នោត​របស់​លោក​ ត្រាំ កាល​ពី​ឆ្នាំ​២០១៦​នោះ​ទេ។ លោក Papadopoulos បាន​ពិភាក្សា​អំពី​ទំនាក់ទំនង​ជាមួយ​នឹង​អ្នក​ដែល​បាន​និយាយ​ថា ពួកគេ​អាច​រៀបចំ​ឲ្យ​មាន​ជំនួប​រវាង​លោក ត្រាំ និង​លោក​ប្រធានាធិបតី​រុស្ស៊ី Vladimir Putin បាន។ ហើយ​កាល​ពី​ពេល​ថ្មីៗ​នេះ សេចក្តីរាយការណ៍​ព័ត៌មាន​នានា​បាន​បង្ហាញ​ថា លោក​បាន​ធ្វើ​ជា​ប្រធាន​នៃ​ជំនួប​នោះ។ ​

លោក Sessions បាន​និយាយ​ថា «នៅ​ក្នុង​សក្ខីកម្ម​របស់​ខ្ញុំ​ទាំងអស់ ខ្ញុំ​អាច​ត្រឹម​តែ​ផ្តល់​ចម្លើយ​ទៅ​លើ​សំណួរ​របស់​អ្នក​តាម​តែ​ខ្ញុំ​យល់​បាន​និង​តាម​ការ​ចងចាំ​របស់​ខ្ញុំ​ប៉ុណ្ណោះ។ ប៉ុន្តែ​ខ្ញុំ​នឹង​មិន​ទទួល​យក​ និង​បដិសេធ​ចំពោះ​ការ​ចោទប្រកាន់​ដែល​ថា ខ្ញុំ​បាន​កុហក។ វា​គឺ​ជា​ពាក្យ​កុហក»។ ​

ចាប់​តាំង​ពីបង្ហាញ​ខ្លួន​នៅ​ចំពោះ​មុខ​គណៈកម្មាធិការ​សភា​មួយ​កាល​ពី​ពាក់​កណ្តាល​ខែ​តុលា​មក សេចក្តីរាយការណ៍​នានា​បាន​ផ្សាយ​ថា លោក Papadopoulos បាន​សារភាព​ទទួល​កំហុស​កាល​ពី​ដើម​ខែ​តុលា ថា​បាន​កុហក​ទៅ​កាន់​ភ្នាក់ងារ​សហព័ន្ធ ដែល​ស៊ើបអង្កេត​ទៅ​លើ​ករណី​ពាក់ព័ន្ធ​រវាង​យុទ្ធនាការ​ឃោសនា​បោះឆ្នោត​របស់​លោក ត្រាំ និង​រុស្ស៊ី ហើយ​លោក​ក៏​កំពុង​សហការ​ជាមួយ​នឹង​លោក​រដ្ឋអាជ្ញា​ពិសេស Robert Mueller នៅ​ក្នុង​ការ​ស៊ើបអង្កេត​ឧក្រិដ្ឋកម្ម​របស់​លោក​ផង​ដែរ៕

XS
SM
MD
LG