មន្ត្រីម្នាក់នៃក្រសួងការពារប្រទេសសហរដ្ឋអាមេរិកបាននិយាយប្រាប់ VOA កាលពីថ្ងៃអាទិត្យថា ស.រ.អា.បានទម្លាក់គ្រាប់កាំភ្លើង៥០តោនតាមឆ័ត្រយោងពីយន្តហោះ ឱ្យក្រុមឧទ្ទាមនៅតំបន់ផ្នែកខាងជើងនៃប្រទេសស៊ីរី។
លោកវរសេនីយឯក Steve Warren អ្នកនាំពាក្យនៃក្រុមចម្រុះប្រឆាំងនឹងក្រុមរដ្ឋឥស្លាមបាននិយាយថា ការទម្លាក់គ្រាប់កាំភ្លើងតាមឆ័ត្រយោងនេះ បានទៅដល់«ក្រុមអារ៉ាប់ស៊ីរី ដែលមេដឹកនាំពួកគេត្រូវបានត្រួតពិនិត្យត្រឹមត្រូវដោយស.រ.អា. ហើយដែលបានប្រយុទ្ធប្រឆាំងនឹងក្រុម ISIL»។ លោកបានផ្តល់សេចក្តីលម្អិតតែបន្តិចបន្តួចដោយសារ «សន្តិសុខខាងកិច្ចប្រតិបត្តិការ»។
មន្ត្រីម្នាក់នៃក្រសួងការពារប្រទេសស.រ.អា. បានពណ៌នាការទម្លាក់គ្រាប់កាំភ្លើងតាមឆ័ត្រយោងពីយន្តហោះនេះថា ជាការកើតមានឡើង«ធម្មតាថ្មីមួយ» ដែលក្រុមចម្រុះនឹងធ្វើ«តាមសេចក្តីត្រូវការ»។
កាលពីថ្ងៃសុក្រ ក្រសួងការពារប្រទេសស.រ.អា.បាននិយាយថា ខ្លួនបានបញ្ចប់កម្មវិធីដែលមិនបានទទួលជោគជ័យរបស់ខ្លួន ក្នុងការហ្វឹកហ្វឺននិងផ្តល់អាវុធឱ្យក្រុមឧទ្ទាមស៊ីរី ហើយជំនួសវិញដោយបង្កើនការគាំទ្រខាងសម្ភារៈដល់កងឯកភាពដែលប្រយុទ្ធនៅលើសមរភូមិក្នុងប្រទេសស៊ីរី នៅពេលដែលការហ្វឹកហ្វឺនត្រូវបានផ្តល់ដល់តែក្រុមមេដឹកនាំឧទ្ទាមក្នុងប្រទេសតួកគី៕
