កងយោធារដ្ឋាភិបាលអ៊ីរ៉ាក់បានអះអាងថា បានវាយប្រហារត្រូវចំក្បួនរថយន្តរបស់មេដឹកនាំរដ្ឋឥស្លាមឈ្មោះ Abu Bakr al-Baghdadi នៅក្នុងការវាយឆ្មក់តាមអាកាសមួយ នៅក្នុងខេត្ត Anbar នាផ្នែកខាងលិចនៃប្រទេសអ៊ីរ៉ាក់នៅជិតព្រំដែនប្រទេសស៊ីរី។
សេចក្តីថ្លែងការណ៍មួយរបស់កងកម្លាំងសន្តិសុខអ៊ីរ៉ាក់បាននិយាយថា «កងទ័ពអាកាសអ៊ីរ៉ាក់បានធ្វើប្រតិបត្តិការមួយប្រកបដោយវីរភាព ដោយបានវាយប្រហារយកក្បួនរថយន្តរបស់ភេរវជនឧក្រិដ្ឋឈ្មោះ Abu Bakr al-Baghdadi ជាគោលដៅវាយប្រហារ។»
គេមិនបានដឹងអំពីជោគវាសនារបស់មេដឹកនាំជ្រុលនិយមរូបនេះទេ។ Baghdadi បានប្រកាសខ្លួនឯងថាជាប្រមុខនៃក្រុម caliphate មួយក្នុងតំបន់ដែលក្រុមនិកាយនិយម Sunni តឹងបំផុតរបស់គាត់ត្រួតត្រានៅក្នុងប្រទេសអ៊ីរ៉ាក់និងប្រទេសស៊ីរី។
លោកវីរសេនីយឯកស.រ.អា. Steve Warren អ្នកនាំពាក្យក្រុមចម្រុះប្រឆាំងនឹងក្រុមរដ្ឋឥស្លាមបាននិយាយថា ក្រុមមន្ត្រីស.រ.អា.«បានឃើញសេចក្តីថ្លែងការណ៍របស់អ៊ីរ៉ាក់ហើយអំពី al-Baghdadi ក៏ប៉ុន្តែគ្មានព័ត៌មានដែលបញ្ជាក់ថាជាការពិតទេ៕»
