សាកលវិទ្យាល័យ North Carolina នៅទីក្រុង Chapel Hill ដែលជាសាកលវិទ្យាល័យដ៏ធំបង្អស់មួយនៅក្នុងសហរដ្ឋអាមេរិកនឹងលុបចោលកម្មវិធីដែលតម្រូវឱ្យពួកនិស្សិតចូលរៀនក្នុងថ្នាក់ដោយផ្ទាល់បន្ទាប់ពីមានការផ្ទុះឡើងនូវការឆ្លងជំងឺកូវីដ១៩។
ការផ្លាស់ប្តូរភ្លាមៗទៅការសិក្សាតាមអនឡាញនេះគឺកើតឡើងមួយសប្តាហ៍ក្រោយមក បន្ទាប់ពីថ្នាក់រៀនបានចាប់ផ្តើមឆ្នាំសិក្សាថ្មីនៅរដូវស្លឹកឈើជ្រុះនេះ។ សាកលវិទ្យាល័យនេះបានប្ដូរការសិក្សាទៅតាមបែបអនឡាញ សម្រាប់ថ្នាក់ភាគ ច្រើនកាលពីខែមីនា ក្នុងអំឡុងពេលនៃការរាលត្បាតវីរុសកូរ៉ូណាលើកដំបូង។
កាលពីថ្ងៃចន្ទម្សិលមិញ មន្រ្តីសាកលវិទ្យាល័យបាននិយាយថា និស្សិតចំនួន ១៧៧ នាក់បានធ្វើតេស្តឃើញមានផ្ទុកវីរុសកូរ៉ូណា ហើយនិស្សិតចំនួន ៣៥០ នាក់ទៀតត្រូវស្ថិតនៅដាច់ពីគេនៅក្នុងអន្តេវាសិកដ្ឋាន និងកន្លែងស្នាក់នៅនៅខាងក្រៅបរិវេណសាកលវិទ្យាល័យ ដោយសារតែនិស្សិតទាំងនេះអាចឆ្លងវីរុសនេះ។
លោក Kevin M. Guskiewicz សាកលវិទ្យាធិការសាកលវិទ្យាល័យ និងលោក Robert A. Blouin អ្នកចាត់ចែងសាកលវិទ្យាល័យនេះ បានសរសេរនៅក្នុងសេចក្តីប្រកាសមួយថា៖ «យើងយល់ពីការព្រួយកង្វល់ និងការរកាំចិត្តនៃការផ្លាស់ប្តូរទាំងនេះដែលនឹងលើកឡើងដោយពួកនិស្សិត និងមាតាបិតា។ យើងជឿថាយើងបានប្រឹងប្រែងដើម្បីបង្កើតនូវបរិយាកាសសុវត្ថិភាព និងមានសុខមាលភាពសម្រាប់ការសិក្សា និងការស្នាក់នៅក្នុងសាកលវិទ្យាល័យ។ យើងជឿថាទិន្នន័យពេលបច្ចុប្បន្ននេះ បង្ហាញពីស្ថានភាពដែលមិនអាចបន្តទៅមុខបាន»។
សាកលវិទ្យាល័យ North Carolina នៅក្រុង Chapel Hill មាននិស្សិតថ្នាក់ឧត្តមសិក្សា និងក្រោយឧត្តមសិក្សាប្រហែល ៣ ម៉ឺននាក់។ មន្ត្រីសាកលវិទ្យាល័យនិយាយថា និស្សិតជាច្រើនពាក់ម៉ាស និងអនុវត្តការរក្សាគម្លាតនៅបរិវេណសាកលវិទ្យាល័យ។
យ៉ាងហោចណាស់ក៏មានសាកលវិទ្យាល័យ ២ ផ្សេងទៀតផងដែរ គឺសាកលវិទ្យាល័យ Oklahoma State និងសាកលវិទ្យាល័យ Notre Dame បានរាយការណ៍អំពីការផ្ទុះឆ្លងនៃជំងឺកូវីដ១៩ ហើយមន្រ្តីនៅសាកលវិទ្យាល័យជាច្រើនទៀត បាននិយាយថា ពួកគេអាចក្លាយជាកន្លែងឆ្លងជំងឺនេះបន្ទាប់៕
