តារាបាល់ទាត់អង់គ្លេសដ៏ល្បីឈ្មោះ David Beckham បានមកធ្វើទស្សនកិច្ចក្នុងប្រទេសកម្ពុជាដើម្បីទាក់ទាញចំណាប់អារម្មណ៍មេដឹកនាំពិភពលោកឱ្យផ្តោតលើកុមារ ដែលរងគ្រោះដោយសារអំពើហិង្សា និងការរំលោភបំពាន។ នេះបើតាមការបញ្ជាក់របស់អង្គការយូនីសេហ្វ។
លោក David Beckham ក្នុងបេសកកម្មជាទូតសុឆន្ទៈ របស់អង្គការយូនីសេហ្វបានចំណាយពេលពីរថ្ងៃក្នុងប្រទេសកម្ពុជា មុននឹងចាកចេញវិញនៅល្ងាចថ្ងៃច័ន្ទនេះ។ ក្នុងអំឡុងពេលនោះ លោកបានជួបជាមួយកុមារ ដែលទទួលរងគ្រោះពីអំពើហិង្សា និងការរំលោភបំពាន និងកុមារដែលងាយរងគ្រោះដោយសារអំពើហិង្សា។
លោក ដេវីដ ប៊ែកខេម បានមានប្រសាសន៍តាមសេចក្តីប្រកាសព័ត៌មានរបស់អង្គការយូនីសេហ្វថា៖ «សម្រាប់ខ្ញុំ វាតក់ស្លុតណាស់ ដែលមានកុមារម្នាក់នៅរៀងរាល់ប្រាំនាទី បានស្លាប់ដោយសារអំពើហិង្សា នៅកន្លែងណាមួយនៅក្នុងពិភពលោក»។
ដំណើរទស្សនកិច្ចនេះក៏ជាផ្នែកមួយ ដើម្បីទាក់ទាញមេដឹកនាំពិភពលោកឱ្យចាប់អារម្មណ៍លើបញ្ហារបស់កុមារ និងផ្តល់អាទិភាពលើតម្រូវការរបស់កុមារទាំងនោះ។
លោកស្រី អ៊ីម៉ាន់ ម៉ូរូខា ប្រធានព័ត៌មាននៃអង្គការយូនីសេហ្វប្រចាំប្រទេសកម្ពុជាបានបញ្ជាក់ប្រាប់វីអូអេថា៖
«លោក David Beckham ទូតសុឆន្ទៈរបស់អង្គការយូនីសេហ្វ កំពុងធ្វើការជាមួយនឹងអង្គការយូនីសេហ្វ ដើម្បីធានាថាមេដឹកនាំពិភពលោកផ្តល់អាទិភាពដល់កុមារក្នុងពេលជួបប្រជុំកំពូលនោះហើយយល់ស្របនឹងគោលដៅអភិវឌ្ឍន៍ថ្មី ដែលនឹងជួយបញ្ចប់អំពើហិង្សា មរណភាពដែលអាចបង្កាបាន និងភាពក្រីក្រដែលកើតឡើងមកលើកុមារគ្រប់រូប»។
ក្រុមមេដឹកនាំពិភពលោកនឹងជួបប្រជុំគ្នានៅទីក្រុងញូយ៉ក នាខែកញ្ញាខាងមុខ ដើម្បីធ្វើការប្តេជ្ញាអនុវត្តតាមគោលដៅអភិវឌ្ឍន៍ទាំងនេះក្នុងរយៈពេល១៥ឆ្នាំខាងមុខទៀត៕
