ដោយសម្លឹងទៅរកការទទួលបានជ័យជម្នះមកវិញនៅក្នុងការប្រជែងការបោះឆ្នោតដ៏តឹងតែងមួយក្នុងប្រទេសម៉ាឡេស៊ីនៅថ្ងៃទី ១៩ ខែវិច្ឆិកាខាងមុខ គណបក្ស United Malays National Organization (UMNO) បានលើកឡើងអំពី «ស្ថិរភាពនិងវិបុលភាព» នៅក្នុងគោលនយោបាយរបស់ខ្លួនដែលរួមមានវិធានការនានាដូចជាការកាត់បន្ថយពន្ធ ជំនួយហិរញ្ញវត្ថុ និងកំណែទម្រង់មួយចំនួនជាដើម។
គណបក្ស UMNO នេះធ្លាប់ជាគណបក្សដ៏មានឥទ្ធិពលមួយដែលត្រូវបានទទួលស្គាល់តាមរយៈការអភិវឌ្ឍនិងការធ្វើទំនើបកម្មប្រទេសម៉ាឡេស៊ី ប៉ុន្តែការខឹងសម្បារបស់ប្រជាពលរដ្ឋពាក់ព័ន្ធនឹងអំពើពុករលួយរបស់រដ្ឋាភិបាលដែលដឹកនាំដោយគណបក្ស UMNO នេះបានធ្វើឱ្យគណបក្សនេះទទួលរងបរាជ័យយ៉ាងធ្ងន់នៅក្នុងការបោះឆ្នោតកាលពីឆ្នាំ ២០១៨។
គណបក្សនេះបានវិលត្រឡប់មកវិញនៅឆ្នាំ ២០២០ ក្នុងលក្ខណៈជាផ្នែកមួយនៃរដ្ឋាភិបាលថ្មី ប៉ុន្តែទំនាក់ទំនងរបស់គណបក្សនេះជាមួយនឹងសម្ព័ន្ធមិត្តរបស់ខ្លួនបានធ្លាក់ចុះ ហើយគណបក្សនេះកំពុងស្វះស្វែងដើម្បីបានកាន់កាប់អំណាចសារជាថ្មី។
នៅពេលបច្ចុប្បន្ននេះ អ្វីដែលអំណោយផលសម្រាប់គណបក្សនេះគឺថា គណបក្សប្រឆាំងកំពុងប្រេះស្រាំ ហើយអ្នកបោះឆ្នោតកំពុងឆ្អែតឆ្អន់ជាមួយនឹងភាពចលាចលនយោបាយ អតិផរណាកើនឡើង និងសេដ្ឋកិច្ចធ្លាក់ចុះ។
ទោះជាយ៉ាងណាក៏ដោយ គណបក្ស UMNO កំពុងប្រឈមនឹងការបាត់បង់ទំនុកចិត្តពីប្រជាពលរដ្ឋ បន្ទាប់ពីមេដឹកនាំជាន់ខ្ពស់របស់ខ្លួនត្រូវបានចោទប្រកាន់ពីបទពុករលួយ។ គណបក្សនេះបានបរាជ័យនៅក្នុងការលះបង់ចោលនូវវប្បធម៌បក្ខពួកនិយមនិងវប្បធម៌កេងចំណេញ ហើយជម្លោះផ្ទៃក្នុងគណបក្សក៏ជាបញ្ហាចោទផងដែរ។
ជាងនេះទៀត គេឃើញថាអាចមានការរិះគន់ពីសាធារណជនចំពោះការអំពាវនាវឱ្យមានការបោះឆ្នោតមុនកាលកំណត់នៅចំរដូវភ្លៀងធ្លាក់នេះ ដោយសារតែទឹកជំនន់ដែលបង្កឡើងដោយសារភ្លៀងធ្លាក់អាចបង្អាក់ដល់ការចេញទៅបោះឆ្នោតរបស់ពលរដ្ឋ។
លោក Amir Fareed Rahim ប្រធានផ្នែកយុទ្ធសាស្រ្តនៃក្រុមហ៊ុនប្រឹក្សាយោបល់ផ្នែកកិច្ចការសាធារណៈនិងហានិភ័យនយោបាយ KRA Group បាននិយាយថា ការជំរុញឱ្យមានកំណែទម្រង់នៅក្នុងជួរគណបក្ស UMNO មានភាពយឺតយ៉ាវ បន្ទាប់ពីគណបក្សនេះបានចូលកាន់កាប់រដ្ឋាភិបាលឡើងវិញក្នុងពេល ២២ ខែក្រោយមកបន្ទាប់ពីខ្លួនបានចាញ់ការបោះឆ្នោតនៅឆ្នាំ ២០១៨។
លោក Rahim ថ្លែងដូច្នេះថា៖ «ថ្នាក់ដឹកនាំកំពូលៗរបស់គណបក្ស UMNO ហាក់មិនមានការផ្លាស់ប្ដូរ ដែលនេះមានន័យថា សាធារណជននៅតែមានទស្សនៈអវិជ្ជមាននិងកង្វះជំនឿទុកចិត្តលើគណបក្សនេះ»។
គណបក្ស UMNO ដឹកនាំក្រុមសម្ព័ន្ធភាព Barisan Nasional ដែលបានដឹកនាំប្រទេសម៉ាឡេស៊ីចាប់តាំងពីម៉ាឡេស៊ីទទួលបានឯករាជ្យពីចក្រភពអង់គ្លេសរហូតដល់ឆ្នាំ ២០១៨។
ការបោះឆ្នោតកាលពីឆ្នាំ ២០១៨ បាននាំឱ្យមានក្តីសង្ឃឹមអំពីកំណែទម្រង់ផ្សេងៗ ស្របពេលដែលមេដឹកនាំមួយចំនួននៃគណបក្ស UMNO ដែលធ្លាប់មានអំណាចខ្លាំងក្លាកាលពីលើកមុន ត្រូវបានដាក់ពន្ធនាគារឬនាំយកមកតុលាការដើម្បីកាត់ទោសពីបទពុករលួយ។
អតីតនាយករដ្ឋមន្រ្តីម៉ាឡេស៊ីលោក Najib Razak បានក្លាយជាមេដឹកនាំម៉ាឡេស៊ីដំបូងគេបង្អស់ដែលបានជាប់ពន្ធនាគារពាក់ព័ន្ធនឹងករណីលួចថវិកាវិនិយោគទ្រង់ទ្រាយធំរបស់ក្រុមហ៊ុន 1MDB របស់រដ្ឋ ដែលករណីនេះបានបណ្ដាលឱ្យគណបក្ស UMNO របស់លោកចាញ់ការបោះឆ្នោត។ ភរិយារបស់លោក Najib ក៏កំពុងប្រឈមនឹងការកាត់ទោសរបស់តុលាការដាច់ដោយឡែកមួយផងដែររឿងពុករលួយ ដែលមានស្ថានទម្ងន់ទោសជាប់ពន្ធនាគារ ១០ ឆ្នាំ។
ប៉ុន្តែអ្វីដែលគួរឱ្យភ្ញាក់ផ្អើលផងដែរដូចទៅនឹងការបរាជ័យរបស់គណបក្ស UMNO នេះនៅក្នុងការបោះឆ្នោតកាលពីឆ្នាំ ២០១៨ គឺការវិលត្រឡប់ចូលមកកាន់អំណាចវិញយ៉ាងឆាប់រហ័សរបស់គណបក្សនេះកាលពីដើមឆ្នាំ ២០២០ បន្ទាប់ពីការផ្តាច់ខ្លួននានាបានធ្វើឱ្យក្រុមសម្ព័ន្ធភាពគណបក្ស Pakatan Harapan (PH) ដែលជាគណបក្សដឹកនាំប្រទេសដែលមានទស្សនៈកំណែទម្រង់និយមនៅពេលនោះបានដួលរលំ។
សម្ព័ន្ធភាពបែបមិត្តនិងសត្រូវរបស់គណបក្ស UMNO ជាមួយនឹងគណបក្សពីរផ្សេងទៀតនៅក្នុងប្រទេសម៉ាឡេស៊ី ដែលគណបក្សទាំងអស់នេះបានទាក់ទាញការគាំទ្រពីអ្នកបោះឆ្នោតដែលជាជនជាតិដើមម៉ាឡេស៊ី បានប្រឈមនឹងភាពច្របូកច្របល់ជាបន្តបន្ទាប់។
សរុបមក ប្រទេសម៉ាឡេស៊ីមាននាយករដ្ឋមន្រ្តី ៣ រូបចាប់តាំងពីឆ្នាំ ២០១៨ មក។ នៅទីបំផុត លោកនាយករដ្ឋមន្រ្តី Ismail Sabri Yaakob បានរងសម្ពាធពីគណបក្ស UMNO ហើយបានរំលាយសភាកាលពីខែមុនដើម្បីឱ្យមានការបោះឆ្នោតមុនកាលកំណត់។
លោក Ismail គឺជានាយករដ្ឋមន្រ្តីម៉ាឡេស៊ីដំបូងបង្អស់ដែលមិនមែនជាមេដឹកនាំគណបក្ស UMNO ដោយករណីនេះបានបង្កើតឱ្យមានការបែងចែកជាក្រុមបក្ខពួកផ្សេងៗនៅក្នុងជួរគណបក្ស។ នេះគឺដោយសារតែប្រធានគណបក្ស UMNO លោក Ahmad Zahid Hamidi កំពុងប្រឈមនឹងការចោទប្រកាន់ពីអំពើពុករលួយរាប់សិបករណី ហើយមន្រ្តីកំពូលលំដាប់ទីពីរនៅក្នុងជួរគណបក្សគឺមិនមែនជាតំណាងរាស្រ្ត។
ថ្នាក់ដឹកនាំគណបក្សប្រឆាំងបានរំឭកអ្នកបោះឆ្នោតថា លោក Zahid ដែលជំរុញឱ្យមានការបោះឆ្នោតមុនកាលកំណត់ កំពុងរំពឹងលើការឈ្នះរបស់ក្រុមសម្ព័ន្ធភាពរបស់លោកដើម្បីឱ្យលោកអាចរួចផុតពីការកាត់ទោសពាក់ព័ន្ធនឹងអំពើពុករលួយនិងបានកាន់តំណែងជានាយករដ្ឋមន្រ្តី។ លោក Zahid បានចាត់ទុកខ្លួនលោកនិងលោក Najib ថាជាជនរងគ្រោះនៃការធ្វើទុក្ខបុកម្នេញផ្នែកនយោបាយ៕
ប្រែសម្រួលដោយលោក ណឹម សុភ័ក្រ្តបញ្ញា
គណបក្ស UMNO នៅម៉ាឡេស៊ីស្វែងរកជ័យជម្នះនៅក្នុងការបោះឆ្នោត
ទីក្រុងគូឡាឡាំពួ ប្រទេសម៉ាឡេស៊ី —
